ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަން އަންގައިދެނީ ނަފްސާނީ ބަލި ތަހައްމަލު ކުރަމުންދާ މީހުންނާ މެދު އަޅާ ނުލެވި، އެ ފަދަ ފަރާތްތަކަށް ބޭނުންވާ ފަރުވާ ދިނުމުގެ ދާއިރާގައި އިންވެސްޓްމަންޓްތަކެއް ކުރެވިފައި ނުވާތާ އެތައް އަހަރެއް ފާއިތުވެ ގޮސްފައިވާކަންކަމަށް އދއިން ބުނެފިއެވެ.
މިއާއެކު އދއިން ވަނީ ކޮވިޑް-19އާ ގުޅިގެން ރެކޯޑް މިންވަރަކަށް އިތުރުވެގެންދާނެކަމަށް ލަފާކޮށްފައިވާ ނަފްސާނީ ބަލިތަކާ، އަމިއްލައަށް މަރުވާ މީހުންގެ އަދަދު އިތުރުވުމާ، މަސްތުވާތަކެތީގެ ވަބާގައިޖެހޭ މީހުންގެ އަދަދު އިތުރުވުމުގެ މައްސަލައާ ކުރިމަތިލުމަށް ވަރުގަދަ އެއްބާރުލުމެއް ދިނުމަށްވެސް ގޮވާލާފައެވެ.
ސުވިޓްޒަލަންޑްގެ ޖެނީވާގައި ކުރިއަށް ގެންދަން ހަމަޖެހިފައިވާ ވާލްޑް ހެލްތް އެސެމްބްލީއަށް ވަގުތު ކުޑަތަންވަމުންދާ މި ދަނޑިވަޅުގައި، އދގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒް ވަނީ ނަފްސާނީ ގޮތުން ނުތަނަވަސްކަމާ ކުރިމަތިލާންޖެހިފައިވާ ފަރާތްތަކަށް ހިމާޔަތާ ރައްކާތެރިކަން ފޯރިކޮށްދިނުމަށް މިހާރަށްވުރެ ގިނަ މަސައްކަތްތަކެއް ކުރުމަށް ބައިނަލްއަގުވާމީ މުޖުމައަމަށް ގޮވާލައްވާފައެވެ.
ނަފްސާނީ ބަލިމަޑުކަމާ ދެކޯލަށް އދއިން އެކުލަވާލި ޕޮލިސީ ބްރީފް ތައާރަފުކޮށްދެއްވަމުން ގުޓެރޭޒް ވިދާޅުވީ، އަދުގެ ހާލަތުގައި އެންމެ ބޮޑު ނުރައްކަލެއްގެ ތެރޭގައި ތިބީ ސިއްހީ ހިދުމަތްތެރިންގެ ތެރެއިން އެންމެ ކުރީ ސަފުގައި ހަރަކާތްތެރިވާ މީހުންނާ، ދޮށީ އުމުރުގެ މީހުންނާ، ޅަ އުމުރުގެ ޒުވާނުންނާ، މިހާރުވެސް ނަފްސާނީ ބަލިމަޑުކަން ތަހައްމަލު ކުރަމުންދާ މީހުންގެ އިތުރުން ހަމަނުޖެހުންތަކާ ހަނގުރާމަތަކުގައި ތާށިވެފައިވާ މީހުން ކަމަށެވެ. އަދި މިފަދަ ފަރާތްތަކާއެކުގައިވެ، އެފަދަ ފަރާތްތަކަށް އެހީތެރިކަން ފޯރުކޮށްދިނުމަށްވެސް ގުޓެރޭޒް ވަނީ ގޮވާލައްވާފައެވެ.
އދގެ ގައިޑްލައިންތައް ބުނާ ގޮތުގައި ކޮވިޑް-19ގެ ބަލިމަޑުކަމުގެ ކުރިއަށް ބަލާއިރު ޑިޕްރެޝަންއާއި އެންޒައިޓީ ނުވަތަ މާޔޫސްކަމާ ހާސްކަމުގެ ނަފްސާނީ ބަލީގެ ސަބަބުން ދުނިޔޭގެ އިގުތިސޯދުން އަހަރަކު ގާތްގަނޑަކަށް 1 ޓްރިލިއަން ޑޮލަރު ޚަރަދުވެއެވެ.
ދުނިޔޭގެ އެކި ކަންކޮޅުތަކުން 264 މިލިއަން މީހަކު ޑިޕްރެޝަންގެ ތަކުލީފު އުފުލަމުންދާއިރު ނަފްސާނީ ބަލީގެ ދެބައިކުޅަ އެއްބައި މީހުންގެ ކިބައިން މި ބަލީގެ އަލާމާތްތައް ފެންނަނީ އުމުރުން އެންމެ 14 އަހަރުގައި ކަން ފާހަގަކުރަންޖެހެއެވެ. އުމުރުން 15-29 އަހަރާ ދެމެދުގެ އުމުރުފުރާއަށް ބަލާއިރު، މި ގިންތިން 2 ވަނައަށް އެންމެ ގިނަ އަދަދަކަށް ފުރާނަ ގެއްލިދަނީ އަމިއްލައަށް މަރުވުމުގެ ހާދިސާތަކުގައި ކަންވެސް އދއިން ފާހަގަކުރެއެވެ.
ކަންމިހެން އޮތްއިރު ކޮވިޑް-19ގެ ބަލިމަޑުކަމާއެކު ނަފްސާނީ ބަލީގެ 'ސޫނާމީ'އެއް އުފެދިދާނެ ކަމުގެ އިންޒާރު، ނަފްސާނީ ބަލީގެ ޑޮކްޓަރުންގެ ޓީމަކުން ވަނީ ދީފައެވެ. އަދި މީގެ ކުރިން ނަފްސާނީ ތަކުލީފުތަކާއެކު، ކޮންމެވެސް ގޮތަކުން އެކަން ތަހައްމަލުކޮށްގެން އުޅުނު މީހުންނަށް، މި ބަލިމަޑުކަމުގައި އެކަން އެގޮތަށް ނުކުރެވުމުގެ މައްސަލަ ކުރިމަތިވެދާނެ ކަމުގެ އިންޒާރުވެސް، ކަމާބެހޭ ތަޖުރިބާކާރުން ވަނީ ދީފައެވެ.
