ވިޔަފާރި ކުރުމުގެ ހުއްދަ ފުލުހުން މެދުވެރިކޮށް ދޫކުރުން ވަގުތީ ގޮތުން ހުއްޓާލައިފިއެވެ.
މިނިސްޓްރީ އޮފް އިކޮނޮމިކް ޑިވެލޮޕްމަންޓުން މިއަދު ގެޒެޓް ކޮށްފައިވާ ލިޔުމުގައިވާ ގޮތުން ޒަރޫރީ ބޭނުންތަކަށް މުދާ ވިއްކާ ފަރާތްތަކަށް ފުލުހުން މެދުވެރިކޮށް ހުއްދަ ދޫކުރުން، މިމަހު 28 ވަނަ ދުވަހުގެ ނިޔަލަށް، ވަގުތީ ގޮތުން ހުއްޓާލާފައިވާ ކަމަށެވެ.
ވިޔަފާރި ކުރުމުގެ ހުއްދަ ފުލުހުން ދޫކޮށްފައި ވަނީ އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނުކުރުމާ ގުޅިގެން، ގޭބިސީތަކުން ބޭރަށް ނުކުމެ އުޅުން މަނާކޮށްފައިވާ މުއްދަތުގައެވެ.
އިކޮނޮމިކް މިނިސްޓްރީން ބުނީ ވިޔަފާރި ކުރުމުގެ ހުއްދަ ދޫކުރުން މެދުކަނޑާލީ ނަމަވެސް، މި މުއްދަތުގެ ތެރޭގައި މާލެ ޕޯޓުގައި، މުދާ ކްލިއާ ކުރުމަށް މޯލްޑިވްސް ޕޯޓްސް ލިމިޓެޑުން ކަނޑައަޅާ ފަރާތްތަކަށް ހުއްދަ ދޫކުރެވޭނެ ކަމަށެވެ.
އިކޮނޮމިކް މިނިސްޓްރީން މިފަދައިން ނިންމާފައި ވާއިރު، މި މުއްދަތުގެ ތެރޭގައި ފުލުހުން ވަނީ 2965 ވިޔަފާރި ކުރުމުގެ ހުއްދަ ދޫކޮށްފައެވެ. މީގެ އިތުރުން، އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާނު ކުރުމާ ގުޅިގެން، މިމަހު 28 ވަނަ ދުވަހުގެ ނިޔަލަށް ރާއްޖެ ވަނީ ލޮކްޑައުން ކޮށްފައެވެ.
މިހެން ވިޔަސް. މީހުން ދިރިއުޅޭ ހިސާބުތަކުގައި ހިންގާ ސައިކަލު ގަރާޖުތައް (ނަމުގައި ސައިކަލު މަރާމާތު އެކަމަކު މަގުމަތީ ބާއްވައިގެން ކާރާ ޕިކަޕާ ލޯރިޔަށް ދަންދެން މަރާމާތު ކުރާނެ އަވައްޓެރިންނަށް އުނދަގޫ ކުރަމުން) ގަދަޔަށް ހިންގައި، އެތަންތަނުގެ ދޮށަށް މީހުންގަނޑު އެއްވެ އުޅުނަސް އޯކޭ ދޯ؟