ކޮރޯނާވައިރަސް ޑިޒީޒް (ކޮވިޑް-19)ގެ ޕޭޝަންޓަކު އެ ބަލީގައި ފުރަތަމަ 10 ދުވަސް ހޭދަކުރީ އާދައިގެ ގޮތަކަށެވެ.
އުމުރުން 38 އަހަރުގެ އެ ފިރިހެނާ އަކީ ކޮވިޑް-19ގެ ހައި ރިސްކް ޕޭޝަންޓުންގެ ގިންތީގައި ލިސްޓުކުރެވޭ އެއްވެސް ޝަރުތެއް ހުރި ޒުވާނެއް ނޫނެވެ.
އެމެރިކާގެ ނިއުޔޯކްގެ ޕަމޯނާގެ ވެސްކިއުލާ ސާޖަން ޑރ ޝޯން ވެންގާޓާ ވިދާޅުވީ، ޕޭޝަންޓްގެ ހަށިގަނޑުން ނޭވާލާ ނިޒާމުގެ ބަލިމަޑުކަން ފެންނަމުންދިޔައީ ވަރަށް އާދައިގެ ގޮތަކަށް ކަމަށެވެ. އޭނާ އައިސޮލޭޓްކޮށްފައި ހުރީވެސް އަމިއްލަ ގޭގައެވެ. ކެއްސުމެއް ފިޔަވާ އިތުރު ކަމެއް އޭނާގެ ހަށިގަނޑަކުން ފާހަގައެއް ނުވެއެވެ.
ނަމަވެސް އެއީ ކޮވިޑް-19ގެ އެންމެ އާދަޔާ ހިލާފު ސައިޑް އިފެކްޓްގެ އަސަރު ފެންނަން ފެށުމާ ހަމައަށެވެ.
"އެއް ދުވަހު ހެނދުނު އޭނާ ހޭލިއިރު ދެފައި ވަނީ އައްސިވެ، ފިނިވެފަ. އެއްވެސް ވަރެއް ނެތް. ހިނގައެއް ނުގަނެވުނު" ޕޭޝަންޓްގެ ހާލަތު ބަދަލުވެގެންދިޔަ ގޮތް ތަފްސީލުކޮށްދެއްވަމުން ޑރ ވެންގާޓާ ވިދާޅުވިއެވެ.
ކޮވިޑް-19އިން ލޭކޮޅުކޮޅު ގަނޑުކޮށްލައި
މި ޒުވާން ޕޭޝަންޓްއަށްވެސް ވީ މިފަދަ ގޮތެކެވެ. އޭނާގެ ހަށިގަނޑު މައި ލޭ ހޮޅީގައި ވަރުގަދަ ލޭކޮޅެއް ގަނޑުވިއެވެ. ކޮންމެ ފައެއް ވަކިވަކިން ބޭނުންކުރުމަށް ލޭ ހޮޅި ދެކަފިވާ ހިސާބުގައެވެ. ނަތީޖާއަކަށްވީ އޭނާގެ ދެފައަށްވެސް ލޭ ފޯރާ ގޮތް ނުވުމެވެ.
ޑރ ވެންގާޓާ ވިދާޅުވީ މިއީ ކޮވިޑް-19ގެ 20-50 ޕަސެންޓްއާއި ދެމެދު އަދަދެއްގެ ޕޭޝަންޓުންގެ ފުރާނަ ދުއްވާލަނިވި ނުރައްކާތެރި ކަމެކެވެ. އަދި މިއީ 38 އަހަރުގެ މީހަކަށް އާންމުކޮށް ކުރިމަތިވާނެ ހާލަތެއް ނޫންކަންވެސް ޑރ ވެންގާޓާ ވަނީ ފާހަގަކުރައްވާފައެވެ.
38 އަހަރުގެ ޒުވާނާގެ ހަށިގަނޑަށް އައި ބަދަލު ދެނެގަނެވުނެވެ. ސާޖަރީއެއް ހަދާ ލޭ ހޮޅި ހުޅުވާ، ގަނޑުވެފައިވާ ލޭ ކޮޅު، ކެތީޓާއެއްގެ އެހީގައި ނަގާ، އެ ޕޭޝަންޓްގެ ފުރާނަ ސަލާމަތް ކުރެވުނެވެ. ސާޖަރީ ހަދަމުންދިޔައީ 2 ސާޖަންއެކެވެ.
ކޮވިޑް-19ގެ ޕޭޝަންޓުންނަށް ފަރުވާ ދެމުންދާ ޑޮކްޓަރުންނަށް މިފަދަ ހައިރާން ކުރަނިވި އެތައް އަލާމާތެއް ފާހަގަ ކުރެވެއެވެ. އެގޮތުން ހަށިގަނޑުގެ އެކި ހިސާބުތަކުގައި ލޭކޮޅުކޮޅު ގަނޑުވުމާ، ހާޓް އިންފަލަމޭޝަންގެ އިތުރުން ދިފާއީ ނިޒާމަށް ކުރިމަތިވާ ތަފާތު އެކި މައްސަލަތައް ވަނީ ފާހަގަކުރެވިފައެވެ.
ގުނަވަންތައް ފެއިލްކޮށްލައި
ކޮވިޑް-19ގެ އެންމެ ސިވިއާ އެއް ސައިޑް އިފެކްޓްއަކީ ނޭވާލާން ދަތިކޮށްލާ ކޮށްލުމެވެ. މީގެ އިތުރުން ބައެއް މީހުންގެ އެތެރެ ހަށީގެ ގުނަވަންތައް ފެއިލްވެސްކޮށްލައެވެ.
ކޮވިޑް-19އަކީ ނޭވާލާ ނިޒާމުގެ ބައްޔެއްގެ ގޮތުގައި ސިފަކުރަމުން އައި ކަމުގައި ވީ ނަމަވެސް، މި ވައިރަހަކީ ޕޭޝަންޓްގެ މުޅި ހަށިގަނޑަށްވެސް ހަމަލާ ދޭ ވައިރަހެއްކަން މިހާރު ދަނީ އެނގެމުންނެވެ. ނޭވާލާ ނިޒާމުން ބޭރުން ވައިރަސް ދޭ އެންމެ ވަރުގަދަ ހަމަލާއެއް އަމާޒުވާ އެއް ތަނަކީ، ލޭ ހޮޅިތަކުގެ ލައިނިންގްއެވެ. މިއާއެކު ލޭކޮޅުކޮޅު ގަނޑުވެއެވެ.
ކޮވިޑް-19ގެ ޕޭޝަންޓުންނަށް ފަރުވާ ދެމުންދާ ބައެއް ޑޮކްޓަރުން ފާހަގަކުރައްވާ ގޮތުގައި ޒުވާން ޕޭޝަންޓުންނަށް ސްޓްރޯކް ޖެހޭކަން އާދަޔާ ހިލާފަށް ދަނީ ރިޕޯޓްކުރަމުންނެވެ. މީގެ އިތުރުން ފުއްޕާމޭގައި ލޭކޮޅުކޮޅު ގަނޑުވުމުގެ މައްސަލަވެސް ކުރިމަތިވާކަމަށް ރިޕޯޓްކުރެއެވެ.
މި ވައިރަހަކީ ލޭ ހޮޅިތަކަށްވެސް ހަމަލާ ދޭ ވައިރަހެއްކަން މިހާރު މި ލިބެމުންދާ މައުލޫމާތުން ދޭހަކޮށްދެއެވެ. ލޭ ހޮޅިތަކަށް ހަމަލާ ދޭ ނަމަ އެތެރެ ހަށީގެ ގުނަވަންތަކަށް އެކަމުގެ ނޭދެވޭ އަސަރު ފޯރައެވެ.
ކުޑަކުދިންގެ ދިފާއީ ނިޒާމު އޯވާރިއެކްޓް ކުރުވާ
ކޮވިޑް-19އާ ގުޅިގެން މިހާރު ފެތުރެމުންދާ އެންމެ ބޮޑު އެއް ކަންބޮޑުވުމަކީ ކުޑަކުދިންގެ ކިބައިން ފެންނަމުންދާ ގޮތް ނޭނގޭ ބަލިމަޑުކަމެކެވެ. ސިއްހީ ދާއިރާގައި މިކަމަށް ދީފައިވާ ނަމަކީ ޕީޑްރިއެޓިކް މަލްޓިސިސްޓަމް އިންފްލަމޭޓަރީ ސިންޑްރޯމްއެވެ. ދުނިޔޭގެ އެކި ހިސާބުތަކުން މިފަދަ ކޭސްތައް ވަނީ ރިޕޯޓްކޮށްފައެވެ.
މި ބަލީގެ އަލާމާތްތަކުގެ ތެރޭގައި ވިހެނުލާ ހުން އައުމުން، އިންފްލަމޭޝަން، އެތެރެހަށީގެ ގުނަވަނެއް ނުވަތަ ގުނަވަންތަކެއް އެކަށީގެންވާ ގޮތެއްގައި މަސައްކަތް ނުކުރުން، ޝޮކެއް ޖެހުމުން ފެންނަ ފަދަ ނިޝާންތަކެއް ފެނުން ހިމެނޭ ކަމަށް، ކުޑަކުދިންގެ ހާއްސަ ޑޮކްޓަރުންގެ ބައިނަލްއަގުވާމީ ގުރޫޕެއް ކަމަށް ޕީއައިސީޔޫ-ކޮވިޑް-19 ކޮލާބޮރޭޝަންއިންވަނީ ހާމަކޮށްފައެވެ.
ބައެއް ކުދިންގެ ހަށިގަނޑުން ޝޮކެއްގެ އަލާމާތްތައް ފެންނައިރު އަނެއްބައި ކުދިންގެ ހަށިގަނޑުން ފެންނަ އަލާމާތްތަކަކީ ކަވަސާކީ ޑިޒީޒްގެ އަލާމާތްތަކެވެ. ޕަމޯނާގެ ޕީޑިއަޓްރިޝަން ޑރ ގްލެން ބަޑްނިކް ވިދާޅުވީ، ކަވަސާކީ ޑިޒީޒްގެ އަލާމާތް ފަދަ އަލާމާތްތަކެއް ފެންނަނީ ކޮވިޑް-19 ޖައްސާ ވައިރަހުގެ ސަބަބުން ދިފާއީ ނިޒާމު އޯވާރިއެކްޓް ކުރަން ފެށުމުންނެވެ. ކޮވިޑް-19އިން ދިފާއުވުމަށް ކުޑަކުދިންގެ ހަށިގަނޑުން ކުރާ މަސައްކަތުގެ ނަތީޖާއެއްގެ ގޮތުން އިމިއުން ރިއެކްޝަންއެއް އަންނަ ކަމަށް ޑރ ޖޭން ނިއުބާގާ ވަނީ ފާހަގަކުރައްވާފައެވެ.
ކޮވިޑް ޓޯސް
ކޮވިޑް-19އާ ގުޅިގެން ފެންނަމުންދާ އެންމެ އާދަޔާ ހިލާފު އެއް އަލާމަތީ "ކޮވިޑް-ޓޯސް"އެވެ. ފައިގެ އިނގިލިތަކުގެ ކުލަ ރަތް ނުވަތަ ދަނބު ކުލައަކަށް ބަދަލުވާ ކަމަށް ބައެއް ޕޭޝަންޓުން ވަނީ ރިޕޯޓްކޮށްފައެވެ. ޑޮކްޓަރުން ލަފާކުރައްވާ ގޮތުގައި، މިއީ ލޭކޮޅުކޮޅު ގަނޑުވުމުގެ ސަބަބުން މެދުވެރިވާ ހާލަތެކެވެ.
ކޮވިޑް-19 ޖައްސާ ސާސް-ކޯވް-2 ވައިރަހާ ބެހޭ މާ ބޮޑު ދިރާސާތަކެއް އަދި ކޮޅެއްގައި ޖެއްސިފައި ނުވާއިރު، މި ބަލީގެ ތަކުލީފު އުފުލަމުންދާ ފަރާތްތަކަށް ދޭނެ ވަކި ފަރުވާއެއްވެސް އަދި ހޯދިފައެއް ނުވެއެވެ. މި ބަލިޖެހޭ މީހުންނަށް ފަރުވާ ދެމުންދަނީ ބަލި ޖެހޭ މީހާގެ ހަށިގަނޑުން ފެންނަ އަލާމާތްތަކަށް ބަލައިގެންނެވެ.
