އިތުރު 35 މީހަކު ކޮވިޑަށް ޕޮޒިޓިވްވެ، ޕޮޒިޓިވްވެފައިވާ ދިވެހިންގެ އަދަދު 300 އިން މައްޗަށް އަރާފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭން ބުނީ މިރޭ ޕޮޒިޓިވްވި 35 މީހުންގެ ތެރޭގައި ހިމެނެނީ 14 ދިވެހިންނާއި ބަންގްލަދޭޝްއަށް ނިސްބަތްވާ 14 މީހެއްގެ އިތުރުން އިންޑިއާގެ ހަތް މީހެއް ކަމަށެވެ.
މި 35 މީހުންނާއި އެކު ރާއްޖޭގައި ޕޮޒިޓިވްވި މީހުންގެ ޖުމްލަ އަދަދު ވަނީ 897 އަށް އަރާފައެވެ. އޭގެ ތެރޭގައި ހިމެނެނީ 302 ދިވެހިންނާއި 595 ބިދޭސީންނެވެ.
ރާއްޖޭގައި މިބަލި އެންމެ ގިނައިން ފެތުރެމުން ދަނީ ބިދޭސީންގެ ތެރޭގައި ކަމަށް ވީއިރު، ބިދޭސީން ދިރިއުޅޭ 33 ތަނެއް މިހާރު ވަނީ މޮނިޓަރިންގެ ހާލަތަށް ބަދަލުކޮށްފައެވެ. މިހާރު މި ބަލި ޖެހިފައިވާ ބަންގްލަދޭޝް މީހުންގެ އަދަދު ވަނީ 492 އަށް އަރާފައެވެ. އަދި މިބަލި ޖެހުނު ދިވެހިންގެ އަދަދު ވަނީ 302 އަށް އަރާފައެވެ. ރާއްޖެއިން ދެން މި ބަލި ޖެހިފައި ވަނީ 70 އިންޑިއާ މީހަކާއި، އިޓަލީ 11 މީހަކާއި، ނޭޕާލް 10 މީހަކާއި، ސްރީލަންކާގެ 5 މީހަކާއި ޕާކިސްތާންގެ 3 މީހެއްގެ އިތުރުން އެހެނިހެން ގައުމުތަކުން 3 މީހެކެވެ.
މިހާތަނަށް އައި އިރު ރާއްޖެއިން މި ބަލި ޖެހިގެން ތިން މީހަކު ވަނީ މަރުވެފައެވެ. އޭގެތެރޭގައި ހިމެނެނީ 83 އަހަރުގެ ދިވެހި އަންހެނަކާއި 33 އަހަރުގެ ބަންގްލަދޭޝް ފިރިހެނަކާއި 80 އަހަރުގެ ދިވެހި ފިރިހެނެކެވެ.
އަދި މީގެ އިތުރުން މި ބަލި ޖެހުނު މީހުންގެ ތެރެއިން 31 މީހަކު މިހާރު ވަނީ ރަނގަޅުވެފައެވެ.
