ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އެކުލަވާލާފައިވާ ގައިޑްލައިންގެ ދަށުން މާލޭ ގައި ކޮންސްޓްރަކްޝަން މަސައްކަތްތައް ފަށާފައިވާ ކަމަށް މާލެ ސިޓީ ކައުންސިލުން ބުނެފިއެވެ.
އެކައުންސިލުން ބުނީ މާލެ ސަރަހައްދު ލޮކްޑައުން ކޮށްފައި އޮތުމުން ކޮންސްޓްރަކްޝަން މަސައްކަތްތައް މެދުކަނޑާލާފައިވާ ކަމަށެވެ. އެހެންނަމަވެސް އެޗްޕީއޭގެ ގައިޑްލައިނާއި އެއްގޮތަށް އަދި އެކައުންސިލުން އެކުލަވާލާފައިވާ އުސޫލުތަކާއި އެއްގޮތަށް އެ މަސައްކަތްތައް ފަށާފައިވާ ކަމަށެވެ.
މަސައްކަތްތަކަށް ކުރުމަށް ނެރޭ މީހުންގެ އިޖުތިމާއީ ގައިދުރުކަން ބަހައްޓަން ޖެހޭނެ ކަމަށާއި އެއްވެސް މީހަކު ބައްޔަށް ޕޮޒިޓިވްވެފައިވާ ނަމަ ނުވަތަ ކޮންޓެކްޓު ވެފައިވާ މީހަކު ހުރި ނަމަ އެމީހަކު ނެރެންވާނީ އައިސޮލޭޝަން ފުރިހަމަ ކުރުމަށްފަހު ކަމަށްވެސް އެ އުސޫލުގައި ބުނެފައިވެއެވެ.
ކޮވިޑް19ގެ އެއްވެސް އަލާމާތެއް ހުރި މީހަކު މަސައްކަތަށް ނެރެގެން ނުވާނެ ކަމަށާއި އަދި މަސައްކަތް ކުރާ ތަން ނޫން އެހެން އެއްވެސް ތަނަކަށް އެމީހުން ގެންގޮސްގެން ނުވާނެ ކަމަށްވެސް މާލެ ސިޓީ ކައުންސިލުގެ އުސޫލުގައިވެއެވެ.
މީގެ އިތުރުން މަސައްކަތުގައި އުޅޭއިރު ހެވީޑިއުޓީ މާސްކާއި އަންގި ބޭނުން ކުރުމާއި ގިނައިން އަތްދޮވުމަށް ބާރުއަޅައި މަސައްކަތުގެ މާހައުލުގައި އެކަން ކަމަށް ފަހިކޮށްދީފައި ހުންނަންވާނެ ކަމަށް އުސޫލުގައިވެއެވެ.
މިހާތަނަށް 11 ފަރާތަކަށް ވަނީ އެ އުސޫލުގެ ދަށުން ކޮންސްޓްރަކްޝަން މަސައްކަތް ކުރުމަށް ހުއްދަ ދީފައި ކަމަށް މާލެ ސިޓީ ކައުންސިލުން ބުންޏެވެ.
