ކޮވިޑާ ގުޅިގެން އެކި ގައުމުތަކުން އެ ގައުމެއްގެ ރައްޔިތުން އަނބުރާ ގައުމަށް ގެންދަން ހިންގާ މަސައްކަތާ އެއްގޮތަށް، ރާއްޖޭގައ ތިބި އިންޑިއާ މީހުން ގެންދަން އެގައުމުން ރާއްޖެ އައި މަނަވަރުން 750 މީހުން ގެންދާނެ ކަމަށް ރާއްޖޭގައި ހުންނަ އިންޑިއާ ހައިކޮމިޝަނުން ބުނެފިއެވެ.
ހައިކޮމިޝަނުން ވަނީ، މިފަހަރު އެންމެ އިސްކަމެއް ދެނީ މާބަނޑު މީހުންނާއި، ވަޒީފާ ގެއްލިފައިވާ މީހުންނާއި، ރާއްޖޭގައި ތާށިވެފައި ތިބި ފަތުރުވެރިން އަނބުރާ ގެންދިއުމަށް ކަމަށް ބުނެފައެވެ.
އިންޑިއާ އަށް އެނބުރި ދިއުމަށް ބޭނުންވާ މީހުން އިމިގްރޭޝަން ކްލިއަރެންސް ހެދުމުގެ ކަންކަން ކުރަމުން ގެންދާނީ ހުޅުމާލެ ފެރީ ޓާމިނަލް އިންނެވެ. ޕަސިންޖަރުން ޓާމިނަލް އަށް ގެންދިއުމުގެ ކަންކަން ކުރަމުން ގެންދަނީ ހައިކޮމިޝަނުންނެވެ. ޓާމިނަލްއާ ހަމައަށް ޕަސިންޖަރުން ގެންދަނީ ބަހުގައެވެ.
މި ހުރިހާ ފަރާތްތަކަކީވެސް އެނބުރި ގައުމަށް ދިޔުމަށްފަހު 14 ދުވަހުގެ ކަރަންޓީނު މުއްދަތެއް ފުރިހަމަ ކުރަންޖެހޭނެ ފަރާތްތަކެކެވެ.
ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)ގެ ސަބަބުން ދިވެހިރާއްޖެއާއި އެކުވެރި އަރަބި އިމާރާތް (ޔޫއޭއީ)ގައި ތާށިވެފައި ތިބި އިންޑިއާގެ ރައްޔިތުން ގައުމަށް ގެންދިއުމަށް ހާއްސަކޮށްގެން، އިންޑިއާގެ ކަނޑުގެ އަސްކަރިއްޔާގެ 3 މަނަވަރު ފުރުވާލީ މިމަހުގެ 4 ވަނަ ދުވަހުއެވެ.
ރާއްޖެއާއި ޔޫއޭއީގައި ތިބި އިންޑިއާގެ ރައްޔިތުން ގޮވައިގެން، މި 3 މަނަވަރުވެސް އެނބުރި އިންޑިއާގައި ބަނދަރު ކުރާނީ ކޮޗިންގައި ކަމަށް އެ ގައުމުގެ އޮފިޝަލުން ވަނީ ވިދާޅުވެފައެވެ.
