ކޮވިޑް-19 އާ ގުޅިގެން ގައުމަށް ދިމާވެފައި އިގްތިސޯދީ ގޮންޖެހުނަތަކުގައި ގެއްލުންވެފައިވާ ވިޔަފާރިތައް ސަލާމަތް ކުރުމަށް ސަރުކާރުން ތައާރަފް ކުރި ރިލީފް ލޯނުން މިހާތަނަށް 70 މިލިއަން ރުފިޔާ ދޫކޮށްފިއެވެ.
މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވީ އެސްއެމްއީ ބޭންކުން ހުޅުވާލި ފުރުސަތުގައި މިހާތަނަށް 1167 ލޯނު އެޕްލިކޭޝަން ލިބިފައިވާ ކަމަށެވެ. އޭގެ ތެރޭގައި ހިމެނެނީ ވިޔަފާރިތަކުން ހުށަހަޅާފައިވާ 764 އެޕްލިކޭޝަނާއި އަމިއްލަ މަސައްކަތްކުރާ މީހުންގެ 403 އެޕްލިކޭޝަން އެވެ.
މިއަދާ ހަމައަށް ފައިސާ ޑިސްބާސް ކުރެވުނީ 38 ލޯނަށް ކަމަށާއި އަދި އެޕްރޫވް ކުރެވިފައި އޮތީ 263 އެޕްލިކޭޝަން ކަމަށް ފައްޔާޒް ވިދާޅުވިއެވެ. އަދި އޭގެތެރެއިން 57 ލޯނު އެޕްލިކޭޝަން ވަނީ ރިޖެކްތް ކުރެވިފައި ކަަމށްވެސް ފައްޔާޒް ވިދާޅުވިއެވެ.
މިނިސްޓަރު ވިދާޅުވީ ލޮކްޑައުން އަށް ދިއުމާ ގުޅިގެެން ލޯނުތައް ޕްރޮސެސް ކުރުން ލަސްވެފައިވާ ކަމަށެވެ. މީގެ އިތުރުން މި މަސައްކަތުގައި އުޅޭ ބައެއް މުވައްޒަފުން އައިސޮލޭޝަނަށް ދިޔުމުގެ ސަބަބުންވެސް ލޯނު ޕްރޮސެސް ކުރުމުގައި ލަސްތަކެއް އައިކަމަށް މިނިސްޓަރު ވިދާޅުވިއެވެ. ނަމަވެސް މިހާރު އެ މަސައްކަތް ބާރަށް ކުރިއަށްދާ ކަމަށާއި ކުރިއަށް އޮތް ހަފްތާގެ ތެރޭ ލޯނުގެ 90 ޕަސެންޓް އެޕްލިކޭޝަން ޕްރޮސެސް ކުރެވޭނެ ކަމަށް ފައްޔާޒު ވިދާޅުވިއެވެ.
ކޮރޯނާ ވައިރަސް އާއި ގުޅިގެން އެންމެ ކުދި،އަދި މެދުފަންތީގެ ވިޔަފާރިތަކަށާއި އަމިއްލަ މަސައްކަތްކުރާ ފަރާތްތަކަށް ދިމާވެފައިވާ މާލީ ދަތިތަކުން އަރައިގަތުމަށް އިތުރު ފުރުސަތު ފަހިކޮށްދިނުމަށް "ކޮވިޑް 19 ވިޔަފާރި އެހީ" ގެ ނަމުގައި ފިނޭންސް މިނިސްޓްރީ އާއި ގުޅިގެން އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން ތައާރަފުކުރި ލޯނުގެ ގޮތުގައި ދޫކުރަން ނިންމާފައިވަނީ ގިނަވެގެން 500،000 ރުފިޔާއެވެ.
