ދައުލަތުގެ އިދާރާތަކުން ބަަލައިގަންނަ ފައިސާ މޯބައިލް ޕޮއިންޓް އޮފް ސޭލް މެދުވެރިކޮށް ފިނޭންސް މިނިސްޓްރީން ގާއިމްކޮށްފަިއވާ "ބަނޑޭރި ޕޯޓަލް" މެދުވެރިކޮށް ފައިސާ ދެއްކޭ އިންތިޒާމް ހަމަޖައްސާފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
މިނިސްޓަރު އަމީރު މިހެން ވިދާލުވީ މިހާރު ދަރުބާރުގޭގައި ކުރިއަށްދާ ނޫސްވެރިންގެ ބައްދަލުވުމުގައެވެ.
އަމީރު ވިދާޅުވީ، ސަރުކާރުގެ 6 އޮފީހަކުންނާއި ކައުންޓަރުންނާއި އެހެނިހެން ގޮތްގޮތުން ބަލައިގަންނަ ފައިސާ މި ސިސްޓަމް މެދުވެރިކޮށް ބަލައިގަނެވޭނެ އިންތިޒާމް ވާނީ ހަމަޖައްސާފައި ކަމަށެވެ. އަދި ހާއްސަކޮށް ކޮވިޑް-19 އާ ގުޅިގެން ސަރުކާރަށް އެކިއެކި ފަރާތްތަކަށް ދޭ އެހީގެ ފައިސާ ވެސް މި ޕޯޓަލް މެދުވެރިކޮށް ބަލައިގަނެވޭނެ ކަމަށް އަމީރު ވިދާޅިވިއެވެ.
ހަމައެއާއެކު ކޮވިޑް-19 އާ ގުޅިގެން ރައީސް އޮފީހުން އަންގަވާފައިވާ ގޮތަށް އަމަލު ކުރުމަށްޓަކައި ދައުލަތުގެ ޕަބްލިކް އެކައުންޓިން މެދުވެރިކޮށް ކުރަންޖެހޭ ކަންކަން މަގުފަހިކޮށްދިނުމުގެ އުސޫލުތަކަށް ގެންނަންޖެހޭ ބައެއް ބަދަލުތައް ގެނެސްފައިވާ ކަމަށް އަމީރު ވިދާޅުވިއެވެ. އޭގެތެރެއިން އިދާރީ ކަންކަމުގެ ތެރެއިން ކަންތައްތަކާއި އަދި ލޯކަލް ކައުންސިލްތަކުން ރައްޔިތުންނަށާއި، އެހެންފަރާތްތަކަށް ދެމުންދާ ހިދުމަތްތައް ނުހުއްޓި ގެންދިއުމަށްޓަަކައި ގޭގައި ތިބެގެން ފައިސާއާ ބެހޭ ކަންކަން ހަމަޖައްސައި ދީފައި ވާނެ ކަމަށް އަމީރު ވިދާޅުވިއެވެ.
ކައުންސިލުތަކުންނާއި އަތޮޅުތަކުން ދޭ ހިދުމަތްތައް އިންޓަނެޓް ބޭންކިން މެދުވެރިކޮށް މަސައްކަތް ކުރެވޭނެ އިންތިޒާމްވެސް ވަނީ ހަމަޖައްސާފައެވެ. މީގެ އިތުރުން ސަރުކާރުގެ އޮފީސްތަކުން ފައިސާ އާ ގުޅުން ހުރި އިދާރީ ބައެއް ކަންކަމަށް ހައްލެއް ހޯދައިދީ އޮޑީޓާ ޖެނެރަލްގެ އޮފީހާއެކު މަސައްކަތް ކުރެވި މާލިއްޔަތު ގަވާއިދާ އެއްގޮތަށް މަސައްކަތް ކުރުމަށްޓަކައި މަސައްކަތްތަކުގެ ޕްރޮސެސްތަކަށް ވެސް މިހާރު ބަދަލު ގެނެސްފައިވާ ކަމަށް ވެސް އަމީރު ވިދާޅުވިއެވެ.
ދައުލަތުގެ އިދާރަތަކުން ބަލަގަންނަ ފައިސާ ލިބިގަތުމަށް "ބަނޑޭރި ޕޯޓަލް" ގެ ނަމުގައި ސިސްޓަމެއް ތައްޔާރުކޮށްފައިވާއިރު، މިއީ ދައުލަތުން މިހާތަނަށް އޮޓޮމޭޓަޑް ސިސްޓަމެއް މެދުވެރިކޮށް ލިބޭ ފައިސާ ބަލައިގަނެ އަދި ބޭންކް ކުރެވޭނެ އިންތިޒާމެއް ހަމަޖެއްސި ފުރަތަމަ ފަހަރެވެ.
