ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) މަޑުޖެހުމުގެ ކުރިން، އެމެރިކާގެ އަބާދީގެ 60 – 70 ޕަސެންޓް މީހުން އެ ބައްޔަށް ޕޮޒިޓިވްވުން ގާތްކަމުގެ އިންޒާރު، ޔުނިވާސިޓީ އޮފް މިނެސޯޓާގެ ސެންޓާ ފޮ އިންފެކްޝަސް ޑިޒީޒް ރިސާޗް އެންޑް ޕޮލިސީގެ ޑައިރެކްޓަރު މައިކަލް އޮސްޓަލޯމް ދެއްވައިފިއެވެ.
ކޮވިޑް-19ގެ ހާލަތު ސިފަކުރައްވަމުން އޮސްޓަލޯމް ވިދާޅުވީ، މިއީ 9 އިނިންގްސް ހިމެނޭ ގޭމެއްގެ ގޮތުގައި ބަލާނަމަ މިހާރު އަދި މިއުޅެވެނީ 2 ވަނަ އިނިންގްސްގައި ކަމަށެވެ. މިމޭރުމުން އޮސްޓަލޯމް އިތުރަށް ވިދާޅުވީ، މިވަގުތު ކޮވިޑް-19އަށް އިންފެކްޓްވެފައިވަނީ އެމެރިކާގެ އާބާދީގެ 5-15 ޕަސެންޓްއާ ދެމެދު އަދަދެއްގެ މީހުން ކަމަށް ބެލެވޭ ކަމަށެވެ.
އޮސްޓަލޯމް ވިދާޅުވީ، ބަލިމަޑުކަން ފެތުރުން މަޑުޖައްސާލުމަށް ކުރަމުން އަޅަމުންދާ ފިޔަވަޅުތަކުން ކޮންމެވެސް ވަރެއްގެ ކޮންޓްރޯލެއް އަންނާނެ ކަމަށާ، ނަމަވެސް ވައިރަސް ދާނީ ކުރިއަށް ކަމަށާ، އެހެނީ ވައިރަސް ކުރާ ކަމަކީވެސް އެއީ ކަމަށެވެ.
އޮސްޓަލޯމް ވިދާޅުވީ ކޮވިޑް-19އިން ދިފާއުވުމަށް އާބާދީ އިމިއުންވުމަށް އަދި ދިގު ރާސްތާއެއް ކަޑަތު ކުރަންޖެހޭ ކަމަށެވެ.
އޮސްޓަލޯމްއާއި އޭނާގެ ޓީމުން ވަނީ އެމެރިކާގައި ކޮވިޑް-19ގެ ބަލިމަޑުކަން ކުރިއަށް ލަފާކުރާ ގޮތުގެ 3 ހާލަތެއްވެސް ހިއްސާކުރައްވާފައެވެ. އެއީ:
- އެކެއްގެ ގައިން އަނެކެއްގެ ގަޔަށް ބަލި ފެތުރިގެންދާ މިންވަރު ހޫނު މޫސުމުގެ ދުވަސްވަރު މަޑުޖެހިދާނެއެވެ. ނަމަވެސް އަހަރުގެ ފަހުކޮޅު ފިނި މޫސުމަށް އަޅައިގެން އަންނައިރު ބަލިމަޑުކަން އިތުރަށް ގަދަވެގެންދާނެއެވެ.
- ބަލިމަޑުކަން އިންތިހާއަށް އޮބިގެންދާ ދުވަސްވަރުތަކަކާ، އިންތިހާއަށް ގަދަވެގެންދާ ދުވަސްތަރުތަކެއް ރާޅުބާނީތަކެއްގެ ސިފާގައި އަންނާނެއެވެ. އަދި މިއީ އެކި ދުވަސްވަރު އެކި ތަނަށް އެކި ގޮތަށް އަންނާނެ އޮއެވަރުތަކެކެވެ.
- ލަސްދުވެއްޔެއްގައި ބަލިމަޑުކަން އޮބިގެން ދިއުމެވެ. މިކަމަށް 18 ވަރަކަށް މަސްދުވަސް ނުވަތަ އެއަށްވުރެވެސް ދިގު މުއްދަތެއް ހޭދަވުން އެކަށީގެންވެއެވެ.
ކޮވިޑް-19ގެ ބަލިމަޑުކަމަކީ އިސާހިތަކު މި ދުނިޔެއިން ފިލައި ހިނގައިދާނެ ވައިރަހެއް ކަމަށް ބުނެ ހީކުރެވުންދާ ކުށް ހީތައް ދޫކޮށްލުމަށްވެސް އޮސްޓަލޯމް ވަނީ މުޅި ދުނިޔެއަށް ގޮވާލައްވާފައެވެ.
އެމެރިކާގެ އަދުގެ ހާލަތު
ޖޯންސް ހޮޕްކިންސް ޔުނިވާސިޓީގެ ރެކޯޑްތަކަށް ބަލާއިރު އެމެރިކާއިން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 1204351 އަށް އަރާފައެވެ. އަދި މި ބަލީގައި މަރުވި މީހުންގެ ޖުމުލަ އަދަދު 71070 އަށް އަރާފައިވާކަމަށް މައުލޫމާތު ލިބެއެވެ.
ކަންމިހެން އޮތްއިރު މި ބަލިމަޑުކަމާ ގުޅިގެން އެމެރިކާގެ ރައީސް ދައްކަވަމުން ގެންދަވާ ވާހަކަފުޅުތަކަށް އެމެރިކާގެ އޮފިޝަލުންނާ ތަޖުރިބާކާރުންވެސް ގެންދަވަނީ ފާޑުވިދާޅުވަމުންނެވެ. އެގޮތުން ކޮވިޑް-19 ގައި އެމެރިކާއިން މަރުވެދާނެ ކަމަށް ލަފާކުރާ އަދަދުތައް ޓްރަމްޕް ވިދާޅުވެފައިވަނީ ގޯސްކޮށް ކަމަށް، އެމެރިކާގައި ކޮވިޑް-19 ފެތުރިގެންދާ ގޮތުގެ މޮޑެލް ހެއްދެވުމުގައި އިސްކޮށް ހަރަކާތްތެރިވެވަޑައިގަންނަވާ ތަޖުރިބާކާރު ޑރ ކްރިސްޓަފާ މަރީ ވިދާޅުވެފައެވެ. ހަމަ މިފަދައިން ކޮވިޑް-19 ޖައްސާ ވައިރަހުގެ ފެށުމަކީ ޗައިނާގެ ވޫހާން ސިޓީގެ ލެބެއް ކަމަށް ބާރު ދޭ ހެކި ދެކިވަޑައިގެންނެވި ކަމަށް ޓްރަމްޕް ވިދާޅުވިއިރު، އެމެރިކާގެ ސިއްހީ އޮފިޝަލު ޑރ އެންތަނީ ފައޫޗީ ވަނީ، މި ތުހުމަތުތައް ދޮގު ކުރައްވާފައެވެ.
