ބިދޭސީން ދިރިއުޅޭ ތަންތަނުގެ ތެރެއިން 28 ތަނެއް މޮނިޓާ ކުރަމުން ދާ ކަމަށާއި މިހާތަނަށް ސާމްޕަލް ނުނެގި ހުރީ ފަސް ތަނަކުން ކަމަށް ކޮވިޑްގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މަބްރޫކް ވިދާޅުވީ، މީގެ ދެ ދުވަސް ކުރިން ބިދޭސީން ދިރިއުޅޭ ހަތް ތަނެއްގެ ސާމްޕަލް ނެގިފައި ވުމުން، މިހާރު 23 ތަނެއްގެ ސާމްޕަލް ނެގިފައި ވާ ކަމަށެވެ. އަދި ސާމްޕަލް ނުނެގި ބާކީ ހުރީ ފަސް ތަނެއް ކަމަށްވެސް މަބްރޫކް ވިދާޅުވިއެވެ.
މިދިޔަ މަހުގެ 30 ވަނަ ދުވަހު ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފައި ވަނީ 1085 ބިދޭސީން ދިރިއުޅޭ 23 ތަނެއް މިހާރު ވަނީ ކަރަންޓީނު ކޮށްފައި ކަމަށެވެ. އަދި އެތަންތަނުގައި ތިބި މީހުންގެ ކަންކަން ރެޑްކްރެސެންޓުން ބަލަހައްޓަމުން ގެންދާ ކަމަށް ވެސް އެޗްޕީއޭން ބުނެފައި ވެއެވެ.
މިހާތަނަށް ރާއްޖެއިން ޕޮޒިޓިވް ވެފައި ވަނީ ޖުމްލަ 573 ފަރާތެކެވެ. އެއީ 205 ދިވެހިންނާއި 322 ބިދޭސީންނެވެ. މިހާތަނަށް 4441 ކޮންޓެކްޓް ޓްރޭސިން ހޯދިފައިވާ އިރު ޖުމްލަ 258 ތަނެއް ވަނީ މޮނިޓަރިންގެ ހާލަތަށް ބަދަލު ކޮށްފައެވެ. އައިސޮލޭޝަން ފެސިލިޓީގައި މިވަގުތު 555 މީހުން ތިބި އިރު ކަރަންޓީން ފެސިލިޓީގައި ތިބީ 1790 މީހުންނެވެ.
ރާއްޖެއިން ޕޮޒިޓިވް ވި މީހުންގެ ތެރެއިން ދެބައިކޮށް އެއްބައި މީހުންނަކީ ބަންގްލަދޭޝްގެ މީހުންނެވެ. 28 ތަނެއް މޮނިޓަރިންގެ ހާލަތުގައި ވާއިރު، ބަންގަލްދޭޝްގެ 289 މީހަކު ވަނީ ޕޮޒިޓިވް ވެފައެވެ.
