މާލޭ ސިޓީގައި ބަލި ފެތުރުމުގެ ފުރުސަތު އެންމެ ބޮޑީ ވިޔަފާރިކުރަން ފިހާރަތަކަށް ދާން ބޭރަށް ނުކުންނަ މީހުންގެ ފަރާތުން ކަމަށް ވާތީ އެކަމަށް ސަމާލުވުމަށް ޑރ. އިބްރާހިމް އަފްޒަލް އިލްތިމާސް ކުރައްވައިފިއެވެ.
ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި "ދަ ޕްރެސް" އިން ކުރި ސުވާލަކަށް ޖަވާބު ދެއްވަމުން ޑރ.އަފްޒަލް ވިދާޅުވީ މާލޭ ސިޓީ ލޮކްޑައުން ކޮށްފައި ވާ މި ހާލަތުގައި، ވިޔަފާރި ކުރަން ބޭރަށް ނުކުންނަ ފަރާތްތަކުން ސަމާލުކަން ދޭންވީ ކަންތައްތަކެއް އެބަހުރި ކަމަށެވެ.
އެގޮތުން އެއްޗެހި ގަތުމަށް ފިހާރައަށް ދާ މީހުން، ގައިދުރުކަން ބެހެއްޓުމަށް ސަމާލުކަން ދިނުމަށާއި މާސްކް އަޅައިގެން ފިހާރައަށް ދިއުމާއި ފިހާރަކޮށް ނިމިގެން ގެއަށް ގޮސް އަތް ދޮވެ ސާފުކުރަން ޑރ.އަފްޒަލް ވަނީ އިލްތިމާސް ކުރައްވާފައެވެ.
މީގެ އިތުރުން ގަންނަ ތަކެއްޗަކީ ސާފުކުރެވޭ ކަހަލަ އެއްޗަކަށް ވާނަމަ ސާފުކުރުމަށާއި ރެޑީމޭޑް އެއްޗެއް ނަމަވެސް ގޭގައި ހުންނަ ކޮންޓެއިނަރަކަށް އެ ބަދަލުކޮށް ފިހާރައިން ގެނައި ޕެކޭޖިން ރައްކާތެރިގޮތުގައި އެއްލައިލުމަށާއި އެއަށް ފަހު ވެސް ސައިބޯނި ލައިގެން ރަނގަޅަށް އަތް ދޮވުމަށް އިރުޝާދު ދެއްވިއެވެ.
ޑރ.އަފްޒަލްގެ އިތުރުން ކޮވިޑް-19ގެ ތަރުޖަމާނު މުހައްމަދު މަބްރޫކް އަޒީޒުވެސް ވަނީ، ގެއަށް ޑެލިވަރީކުރާ އަދަދު މަދުކުރުމަށް ވެސް އިލްތިމާސް ކުރައްވައިފައެވެ. އެގޮތުން ޑެލިވަރީއެއް ކުރާ ކޮންމެ ފަހަރަކު، އެކަން ކުރެވޭ ގޮތަށް އޮތިއްޔާ ގިނަ އަދަދަށް ތަކެތި ހޯދާނަމަ، ޑެލިވަރީ ކުރުމަށް އަންނަ ފަރާތާ ދިމާވާ މިންވަރު ކުޑަވާނެ ކަމަށް މަބްރޫކް ވިދާޅުވިއެވެ.
ޑެލިވަރީގެ ޒަރީއާއިން ކޮވިޑް ފެތުރިދާނެ ކަމަށް ޑޮކްޓަރުން ވިދާޅުވެފައި ވާއިރު، މިހާތަނަށްވެސް ރާއްޖެއިން، ޑެލިވަރީ ކުރުމުގައި ހަކަތްތެރިވި ބައެއް މީހުން ކޮވިޑަށް ޕޮޒިޓިވް ވެފައި ވާކަން ފާހަގަ ކުރެވެއެވެ.
މާލޭގއި ތިބި މީހުންނަށް ރަށަށް ދެވޭނީ ކޮން ދުވަހަކުންބާ؟ ނޫސްވެރިންވެސް ރައްޔިތުންނަށް ބޭނުންވާނެ ސުވާލު ކުރަން އިސްކަންދޭންވީނުންދޯ، ސަރުކާރުން ކުރާކަންތައް ފޮރުވުމުގެ ބަދަލުގައި....... ފިހާރައިން ޑެވިވަރީ ނުކުރަންޔާ އެހެން ގޮތެއް ނޯންނާނެ