ގަލްފް އެކްސްޕޯއާ ގުޅޭ ދެ ޕޮޒިޓިވް ކޭސް ރާއްޖެއިން ފެނިފައިވާ ކަމަށް ޑރ. އިބްރާހިމް އަފްޒަލް ވިދާޅުވެއްޖެއެވެ.
ޑރ. އަފްޒްލް މިހެން ވިދާޅުވީ، މިރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ގަލްފް އެކްސްޕޯއަށް ދިޔަ މީހުންގެ ތެރެއިން 2 މީހަކު ކޮވިޑަށް ޕޮޒިޓިވްވެފައިވާ އިރު، އެ އެކްސްޕޯއަށް ދިޔަ ފަރާތްތައް އެޗްޕީއޭއަށް މައުލޫމާތު ހިއްސާ ކުރުމަށް ރޭ ވަނީ އެދިފައެވެ.
އެކްސްޕޯއަށް ދިޔަ އެންމެންގެ މައުލޫމާތު ހިއްސާ ކުރުމަށް އެދިފައި ވަނީ، މި އެކްސްޕޯއަށް ދިޔަ މީހުންގެ ފަރާތުން ތަފާތު ގޮތަކަށް ބަލި ފެނިފައިވާތީ ކަމަށް ޑރ. އަފްޒަލް ވިދާޅުވެފައި ވެއެވެ. އެގޮތުން އެ އެކްސްޕޯއަށް ދިޔަ ފަރާތްތަކުގެ ތެރެއިން ކޮވިޑް-19 ޖެހިފައިވާ ފަރާތްތައް މި ބަލި ޖެހިގެން ހޭދަވާ މުއްދަތު އިތުރުވެފައި ވާކަން ފާހަގަ ކުރެވިފައިވާތީ އާއި އެމީހުންގެ ތެރެއިން ކޮވިޑް-19 އަށް ޕޮޒިޓިވްވެ ރަނގަޅުވާ މީހުންވެސް އަލުން ބަލި ޖެހޭކަން ފާހަގަވެފައިވާތީ ކަމަށް ރޭ ޑރ، އަފްޒަލް ވަނީ ފާހަގަކުރައްވާފައެވެ.
ގަލްފް އެކްސްޕޯއަށް ދިޔަ މީހުންގެ މައުލޫމާތު ހިއްސާ ކުރުމަށް އެޗްޕީއޭގެ ހިޓްލައިން 1676 އަށް ގުޅުމަށް ވަނީ އެދިފައެވެ.
"ގަލްފް ފުޑް އެކްސްޕޯ" ކުރިއަށް ގެންގޮސްފައިވަނީ މިދިޔަ ފެބްރުއަރީ މަހުގެ 16 ވަނަ ދުވަހުން ފެށިގެން 20 ވަނަ ދުވަހުގެ ނިޔަލަށް ދުބާއީގައެވެ. މި އެކްސްޕޯގައި ރާއްޖެގާއި މަސައްކަތް ކުރާ ބިދޭސީންގެ އިތުރުން ދިވެހިންވެސް ވަނީ ބައިވެރިވެފައެވެ.
