މިވަގުތު ދިވެހިރާއްޖޭގެ ޖުމްލަ 10 ރިސޯޓެއްގައި ފަތުރުވެރިން ތިބި ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
މިހާރު ދަރުބާރުގޭގައި ކުރިއަށް ގެންދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓޫރިޒަމް މިނިސްޓަރު އަލީ ވަހީދު ވިދާޅުވީ، މިވަގުތު ރާއްޖޭގެ 10 ރިސޯޓެއްގައި ފަތުރުވެރިން ތިބި ކަމަށާއި، އަދި މަސައްކަތް ކުރަމުންދަނީ އެ ގައުމުތަކުގެ ފްލައިޓުތަކުގަ އެ ފަތުރުވެރިންވެސް އަނބުރާ ގައުމުތަކަށް ފޮނުވުމުގެ އިންތިޒާމް ހަމަޖެއްސުމަށް ކަމަށެވެ.
ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަލީ ވަހީދު ވިދާޅުވީ ރާއްޖޭގައި 10 ރިސޯޓެއްގައި ފަތުރުވެރިން ތިބިއިރު އެއީ 50 ގައުމެއްގެ ރައްޔިތުން ކަމަށެވެ. އޭނާ ވިދާޅުވީ އެ ފަތުރުވެރިންގެ ކަންކަން ސަރުކާރުން ބަލަމުން ގެންދާ ކަމަށެވެ.
"އެހެން ގައުމުތަކުން މީހުން ބަލާ އަންނަ ފްލައިޓުތަކުގައި އެގައުމުތަކުގައި ތިބި ދިވެހިން ގެނައުމުގެ މަަސައްކަތް ހާރިޖީ ވުޒާރާއާ ގުޅިގެން އެކަން ކުރަން. މި ފުރުސަތުތަކުގެ ތެރޭގައި އެހެން ގައުމުތަކުގައި ތިބި ދިވެހިންނަށް ރާއްޖެ އާދެވޭނެ ގޮތް ހަމަޖެއްސުމަށް މަސައްކަތް ކުރާނަން،" ޓޫރިޒަމް މިނިސްޓަރު ވިދާޅުވިއެވެ.
ރާއްޖެއިން ބޭރުގައި މިވަގުތު ތިބި ދިވެހިންގެ ތެރެއިން ރާއްޖެ އަންނަން ބޭނުންވެފައި ތިބި ދިވެހިން އެނބުރި ރާއްޖެ ގެނައުމަށް ކުރަމުން ދިޔަ މަސައްކަތް އެއްކޮށް ހުއްޓާ ނުލާ ކަމަށާއި ނަމަވެސް އެ މަސައްކަތް މިވަގުތު މެދުކެނޑިފައި ވަނީ ރާއްޖޭގައި ކޮމިއުނިޓީ ސްޕްރެެޑެއް ފެތުރެން ފަށާފައިވާތީ ކަމަށް މިނިސްޓަރު ވިދާޅުވިއެވެ.
ރާއްޖޭގެ 10 ރިސޯޓެއްގައި ތިބި ފަތުރުވެރިން އެނބުރި އެމީހުންގެ ގައުމުތަކަށް ފޮނުވާލުމުގެ މަސައްކަތް ކުރަމުން އަންނަ ކަމަށް މިނިސްޓަރު ވިދާޅުވިއިރު މީގެކުރިން ވެސް ވަނީ އެކި ރިސޯޓުތަކުގައި ތިބި ފަތުރުވެރިން އެމީހުންގެ ގައުމުތަކަށް ފޮނުވާލައިފައެވެ. ބައެއް ގައުމުތަކުން ވަނީ އެގައުމުތަކުގެ ރައްޔިތުން ބަލާ ޗާޓާޑް ފްލައިޓުތައް ރާއްޖެ އަށް ބާއްވާފައެވެ.
މިހާތަނަށް ރާއްޖެއިން 214 މީހަކު ވަނީ ކޮވިޑް19 އަށް ޕޮޒިޓިވްވެފައެވެ.
