ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމާ ގުޅުންހުރި ޚަބަރާ މައުލޫމާތު މިނިވަންކަމާއެކު ގެނެސްދިނުމަށް ބައެއް ގައުމުތަކުން މީޑިއާއަށް ފިއްތުންތައް ކުރިމަތިކުރަމުންދަނީ ކަންބޮޑުވާންޖެހޭ ދަރަޖައަކަށް ކަމަށް، އިންސާނީ ހައްގުތަކާ ބެހޭ އދގެ އިސްވެރިޔާ މިޝޭލް ބެޝެލެޓް ވިދާޅުވެއްޖެއެވެ.
ބެޝެލެޓް ވިދާޅުވީ ކޮވިޑް-19އާ ދެކޮޅަށް ކުރަމުންދާ ހަނގުރާމައިގެ އެންމެ މުހިންމު އެއް އަސާސް ކަމުގައި ވީ ނަމަވެސް، މިނިވަންކަމާއެކު ޚަބަރާ މައުލޫމާތު ފެތުރުމަށް ހުރަސްތަކެއް ކުރިމަތިކޮށް، ނޫސްވެރިން ހައްޔަރުކުރުމާ، އަނިޔާ ލިއްބައިދެނިވި ރޫހެއްގައި ބައެއް ގައުމުތަކުން އަމަލު ކުރަމުންދާ ކަމަށެވެ.
މިމޭރުމުން ބެޝެލެޓް ވިދާޅުވީ، ބައެއް ގައުމުތަކުން ކޮވިޑް-19ގެ ބަލިމަޑުކަން ބޭނުންކުރަމުންދަނީ މައުލޫމާތު ފެތުރުން ކޮންޓްރޯލް ކޮށް، ފާޑުކިއުންތަކުގެ އަޑު ކަނޑުވާލުމަށް ލިބުނު ފުރުސަތެއްގެ ގޮތުގައި ކަމަށެވެ.
މިނިވަން މީޑިއާއަކީ މުހިންމު އެއްޗެއް ކަމަށާ، ނަމަވެސް ކޮވިޑް-19ގެ ބަލިމަޑުކަމުގައި އެތައް ބަޔަކު ފުރާނަ ސަލާމަތް ކުރުމުގެ ގޮތުން ގެތަކުގައި ބަންދުވެފައިވާއިރު މީޑިއާ ބަރޯސާވާންޖެހިފައިވަނީ އިންތިހާއަށްކަން ބެޝެލެޓް ވަނީ ފާހަގަކުރައްވާފައެވެ.
މިފަދަ ދަނޑިވަޅެއްގައި އޭޝިއާ-ޕެސިފިކް، އެމެރިކާ އަދި ވިލާތާ މެދުއިރުމަތި އަދި އެފްރިކާގެ ގައުމުތަކުގައި ނޫސްވެރިންނަށް ހުރަސްތަކާ ކުރިމަތިވަމުން އަންނަކަން އދގެ އޮފިޝަލު ވަނީ ފާހަގަކުރައްވާފައެވެ. އެގޮތުން، ކޮވިޑް-19ގެ ތަފާސް ހިސާބުތަކުގެ ސައްހަކަމާ މެދު ސުވާލު އުފެއްދި ބައެއް ނޫސްވެރިންނަށް ބިރު ދެއްކުމާ، ގެއްލުވާލުން ފަދަ ޖަރީމާތައް ހިންގަމުންދާކަން ބެޝެލެޓް ވަނީ ފާހަގަކުރައްވާފައެވެ.
ބެޝެލެޓް މިފަދަ ރޫހެއްގައި ވާހަކަދައްކަވާފައިވާއިރު، ނޫސްވެރިންގެ މިނިވަންކަމަށް ވަކާލާތު ކުރަމުންދާ ރިޕޯޓާޒް ވިތައުޓް ބޯޑާޒްއިންވަނީ، ޗައިނާގައި މީޑިއާގެ މިނިވަންކަން އޮތްނަމަ އަދު ދުނިޔެ ދެކެމުންމިދާ ކޮވިޑް-19ގެ ބަލިމަޑުކަން މި ދަރަޖައިގައި ދެކެން ނުޖެހުނީސްކަން ދޭހަވާފަދަ ރޫހެއްގައި ވާހަކަދައްކާފައެވެ.
