ކޮވިޑް19 އަށް މިއަދު ޕޮޒިޓިވް ވި 17 މީހުންގެ ތެރެއިން ތިން މީހަކާ ގުޅޭ 190 ކޮންޓެކްޓް ހިމެނޭ 2 ހަބު ފާހަގަ ކުރެވިފައިވާ ކަމަށް ޑރ. އިބްރާހިމް އަފްޒަލް ވިދާޅުވެއްޖެއެވެ.

މިރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ، މިއަދު ކޮވިޑް19 އަށް ޕޮޒިޓިވް ވި ކޭސް ނަންބަރު 76އާއި 77 އަދި 78 އާ ގުޅުން ހުރި ދެ ހަބެއް ފާހަގަ ކުރެވިފައި ވާ ކަމަށެވެ. އޭގެތެރެއިން އެއް ހަބުން 50 ކޮންޓެކްޓު ފާހަގަ ކުރެވިފައި ވާއިރު ދެވަނަ ހަބުން 140 ކޮންޓެކްޓް ފާހަގަ ކުރެވިފައި ވާ ކަމަށެވެ. ޑރ. އަފްޒަލް ވިދާޅުވީ އެއީ ފުދޭ ވަރެއްގެ ބޮޑު ކޮންޓެކްޓް ހަބަކަށް ވެގެންދާނެ ކަމަށެވެ.

މީގެ އިތުރަށް ޑރ. އަފްޒަލް ވަނީ މިއަދު ޕޮޒިޓިވް ވި އިތުރު ކޭސްތަކާ ގުޅޭ މައުލޫމާތުގެ ތަފްސީލްވެސް ހާމަ ކުރައްވާފައެވެ. އެގޮތުން ޑރ. އަފްޒަލް ވިދާޅުވީ ކޭސް ނަންބަރު 68އަކީ ބަންގްލަދޭޝްގެ ރައްޔިތެއް ކަމަށާއި، އޭނާގެ 8 ކޮންޓެކްޓް ޓްރޭސް ކުރެވިފައިވާ ކަމަށެވެ. އަދި ކޭސް ނަންބަރު 69 [ޕޮޒިޓިވްވި ސިފައިންގެ މީހާ] ގެ 41 ކޮންޓެކްޓް ޓްރޭސް ކުރެވިފައިވާ ކަމަށް ޑރ. އަފްޒަލް ވިދާޅުވިއެވެ. އަދި ކޭސް ނަންބަރު 70އާއި 71 އަދި 72ގެ ކްލަސްޓާގައި 34 ކޮންޓެކްޓް ޓްރޭސް ކުރެވިފައިވާ ކަމަށް ޑރ. އަފްޒަލް ވިދާޅުވިއެވެ.

ޑރ. އަފްޒަލް ވިދާޅުވީ ކޭސް ނަންބަރު 73 އަކީ ކޭސް 78 އާ ގުޅުން ހުރި މީހެއް ކަމަށާއި އޭނާއަކީ ދިވެއްސެއް ކަމަށެވެ. އަދި އެމީހުންނާ ގުޅުން ހުރި ހަތަރު ކޮންޓެކްޓް ޓްރޭސް ކުރެވިފައި ވާ ކަމަށް ޑރ. އަފްޒަލް ވިދާޅުވިއެވެ. ކޭސް ނަންބަރު 74އާއި 75 އަކީ އަމީން ހިޔާ ކޮންސްޓްރަކްޝަންއާއި ކޭސް ނަންބަރު 36 އާ ގުޅުން ހުރި ކޭސްތަކެއް ކަމަށާއި، ތިން ކޮންޓެކްޓަކު ޓްރޭސް ކުރެވިފައިވާ ކަމަށާއި، އޭގެތެރެއިން 2 މީހަކު ބައްޔަށް ޕޮޒިޓިވް ވެފައިވާ ކަމަށް ޑރ. އަފްޒަލް ވިދާޅުވިއެވެ. އޭނާ ވިދާޅުވީ ކޭސް ނަންބަރު 79 އަކީ ކޭސް ނަންބަރު 31 ގުޅުން ހުރި މީހެއް ކަމަށެވެ.

ކޮވިޑް19 އަށް ހަމައެކަނި މިއަދުވެސް ރާއްޖެއިން ވަނީ 17 މީހަކު ޕޮޒިޓިވް ވެފައެވެ. މި ހުރިހާ އެންމެން ވެސް ޕޮޒިޓިވްވީ މާލެއިންނެވެ. ޕޮޒިޓިވްވި މީހުންގެ ތެރޭގައި ބަންގްލަދޭޝް މީހުންނާއި ދިވެހިންވެސް ހިމެނެއެވެ. އެގޮތުން މިއަދު ޕޮޒިޓިވްވި މީހުންގެ ތެރޭގައި އެންމެ ގިނައީ ދިވެހިންނެވެ. އަދި މިމީހުން ޕޮޒިޓިވް ވުމާއެކު މި މީހުންނާ ކޮންޓެކްޓް ޓްރޭސްވި މީހުން ހޯދުމުގެ މަސައްކަތް ކުރަމުންދާ ކަމަށް އެޗްޕީއޭ އިން ބުނެއެވެ. މުޅި ރާއްޖެއިން ކޮވިޑް19 އަށް ޕޮޒިޓިވްވި މީހުންގެ އަދަދު މިވަނީ 84 އަށް އަރާފައެވެ. މިހާތަނަށް ރާއްޖެއިން ބަލި ޖެހުނު މީހުންގެ ތެރެއިން 16 މީހަކު ވަނީ ބަލިން ރަނގަޅުވެސް ވެފައެވެ. އޭގެތެރޭގައި 13 ބިދޭސީންނާއި ތިން ދިވެހިން ހިމެނެއެވެ.

ހަބަރު ކޮވިޑް-19 ސިއްހަތު