ތުރުކީވިލާތުން ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވެފައިވާ މީހުންގެ އަދަދު 82329 އަށް އަރާފައިވާކަމަށް އެ ގައުމުގެ ސިއްހަތާ ބެހޭ ވަޒީރު ފަހުރުއްދީން ކޯޖާ ހާމަކުރައްވައިފިއެވެ.
މިއާއެކު މެދުއިރުމަތީ ސަރަހައްދުގައި ކޮވިޑް-19އަށް އެންމެ ގިނަ އަދަދެއްގެ ބަޔަކު ޕޮޒިޓިވްވި ގައުމަކަށް ތުރުކީވިލާތް މިވަނީ ވެފައެވެ. މީގެ ކުރިން، ކޮވިޑް-19ގެ ކޭސްތައް އެންމެ ގިނައިން ރިޕޯޓްކުރަމުންދިޔައީ އީރާނުންނެވެ.
ތުރުކީވިލާތުން ލިބިފައިވާ މައުލޫމާތަށް ބަލާއިރު 24 ގަޑިއިރުގެ ތެރޭގައި 3783 މީހަކު ވަނީ ބައްޔަށް ޕޮޒިޓިވްވެފައެވެ. 24 ގަޑިއިރުގެ ތެރޭގައި 40520 ސާމްޕަލްއެއް ނަގާފައިވާކަމަށްވެސް ތުރުކީވިލާތުގެ ސިއްހަތާ ބެހޭ ވަޒީރު ވަނީ ހާމަކުރައްވާފައެވެ.
މި ބަލީގައި ތުރުކީވިލާތުން މަރުވި މީހުންގެ އަދަދު ވަނީ 1890 އަށް އަރާފައެވެ.
ތުރުކީވިލާތުން މި ބަލި ޖެހުނު މީހުންގެ ތެރެއިން 1822 މީހަކު ވަނީ ޝިފާ ލިބި، ބަލިން ރަނގަޅުވެފައެވެ.
