ނަތީޖާ ނެރެވޭ ގޮތަށް ރައްޔިތުންގެ މަޖިލިސް ނުބޭއްވިއްޖެ ކަމަށްވާ ނަމަ ޑިމޮކްރަސީގެ ފޭރާން ވީދިގެން ހިނގައިދާނެ ކަމަށް ރައްޔިތުން މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވެއްޖެއެވެ.
ހަސަން ލަތީފް ކުރައްވާފައިވާ ޓްވީޓެއްގައި ވިދާޅުވީ މަޖިލީހުގެ ޖަލްސާތައް ފުރިހަމަ ނަތީޖާ ނެރެވޭ ގޮތަށް ނުބޭއްވި ގިނަ ދުވަސްވާ ނަމަ ޑިމޮކްރަސީގެ ފޭރާން ވީރާނާވެ ގާނޫނީ ދައުލަތެއްގެ ސިފަ ގެއްލިގެން ހިނގައިދާނެ ކަމަށެވެ. އޭނާ ވިދާޅުވީ ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ އިރުޝާދުތަކަށް ބަލައިގެން ޒިންމާދާރު ކަމާއި އެކުގައި މަޖިލީހުގެ މަސައްކަތް ފެށުން މުހިއްމު ކަމަށެވެ.
ހަސަން ލަތީފް މިފަދައިން ވިދާޅުވިއިރު ކޮވިޑް19 ގެ ސަބަބުން މަޖިލީހުގެ މަސައްކަތްތައް އޮންލައިންކޮށް ދެ ހަފްތާއެއްހާ ދުވަހު ކުރިޔަށް ވަނީ ގެންގޮސްފައެވެ. އަދި މި ހަފްތާގައިވެސް މަޖިލިސް ޖަލްސާތައް ބޭއްވުމަށް އެޖެންޑާކުރިއެވެ. ނަމަވެސް ފަހުން ވަނީ މި ހަފްތާގައި މަޖިލީހުގެ ޖަލްސާތައް ނުބާއްވާން ނިންމާފައެވެ. މަޖިލީހުގެ އިދާރާއިން ބުނީ މަޖިލީހުގެ ޖަލްސާތައް މަޖިލިސް ތަޅުމުގައި ކުރިޔަށް ގެންދިއުމަށް މަޖިލިސް ރައީސް ބޭނުންފުޅުވާ ކަމަށާއި އެ މަސައްކަތް އެގޮތަށް ކުރިޔަށް ގެންދިއުމަށް މަސައްކަތް ކުރަމުން އަންނަ ކަމަށެވެ.
އެގޮތުން އިއްޔެ މަޖިލީހުގެ އިދާރާގައި ވަނީ ސިޔާސީ ޕާޓީތަކުގެ ލީޑަރުންނާއި ކޮމެޓީތަކުގެ މުގައްރިރުންނާއި އެކުގައި މަޖިލިސް ރައީސް ބައްދަލުކުރައްވާ މަޖިލިސް ތަޅުމުގައި ޖަލްސާތައް ކުރިޔަށް ގެންދާނެ ގޮތަކާއި ގުޅޭ ގޮތުން މަޝްވަރާ ކުރައްވާފައެވެ. ގިނަ މެންބަރުން ވަނީ މަޖިލިސް ތަޅުމުގައި ޖަލްސާތއް ބޭއްވުމަށް ވާހަކަދައްކަވާފައެވެ. ނަމަވެސް އެއީ ރައްކާތެރިކަމުގެ ފިޔަވަޅުތައް އަޅައިގެންނެވެ.
ރައްޔިތުންގެ މަޖިލީހަށް މިހާރު ހުށަހެޅިފައިވާ އެންމެ މުހިއްމު ދެ ބިލަކީ ކައުންސިލް އިންތިހާބު ފަސް ކުރުމުގެ ބިލާއި މިހާރު ތިބި ކައުންސިލަރުންގެ ދައުރު ދަންމާލަން ހުށަހަޅާފައި އޮތް ބިލެވެ.
