ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަން ކޮންޓްރޯލް ކުރުމަށް ފަރުދީ ފެންވަރުގައި އެޅެން އޮތް އެންމެ އަސާސީ އެއް ފިޔަވަޅަކީ އިޖުތިމާއީ ގައިދުރުކަން ނުވަތަ ސޯޝަލް ޑިސްޓަންސިންގް ކަމުގައި ވީ ނަމަވެސް، އެކަމަށް މީހުންގެ ފަރާތުން އެކަށީގެންވާވަރަށް އެއްބާރުލުން ނުލިބޭތީ، އިންޑޮނޭޝިއާގެ އަވަށަކުން އާދަޔާ ހިލާފު ފިޔަވަޅެއް އަޅަން ފަށައިފިއެވެ.
އިންޑޮނޭޝިއާގެ ޖާވާ އައިލަންޑްގެ ކޫޕޫ އަވަށުގެ ރަށްވެހިން ގައިދުރުކުމަށް ސަމާލުކަން ދޭ މިންވަރު ކުޑަވަމުންދާތީ، އެ އަވަށުން ވަނީ ބިރުވެރި ވާހަކަތަކުގައި ސިފަކުރާ "ގޯސްޓް" ގެ ގޮތުގައި ހެދުން އަޅުވައިގެން "ރޫހާނީ" ވޮލަންޓިއަރުން މަގުތަކަށް ފޯރިމަރަން ނެރެފައެވެ.
އިންޑޮނޭޝިއާގެ ފޯކްލޯރު ބުނާ ގޮތުގައި 'ޕޮކޮންގް' ނުވަތަ ރޫހަކީ، ދުނިޔޭގައި ތާށިވެފައިވާ މަރުވެފައިވާ މީހުންގެ ރޫހުތަކެވެ.
ބޭރަށް ނިކުމެ އުޅޭ މީހުންގެ އަދަދު މަދުކޮށް، އިޖުތިމާއީ ގައިދުރުކަން ޕްރޮމޯޓް ކުރުމުގެ ނަމުގައި ކީޕޫގެ މަގުތަކަށް 'ޕޮކޮންގް' ނެރެފައިވާއިރު، ހާސިލުވަމުންދަނީ އުއްމީދުކުރި ގޮތާ ހިލާފު ނަތީޖާއެއް ކަމަށް އެ ސަރަހައްދަށް ޒިޔާރަތްކުރި ރޮއިޓާޒްގެ މުވައްޒަފުން ވަނީ ހިއްސާކޮށްފައެވެ.
"ރޫހާނީ" އެއްޗިހިތަކެއް ފެނިގެން ގެތަކުގައި ތިބުމުގެ ބަދަލުގައި، އެ ވޮލަންޓިއަރުން ބަލާލަން މަގުތަކަށް ނިކުން މީހުންގެ އަދަދު ގިނަ ކަމަށް ޚަބަރު ލިބެއެވެ. ނަމަވެސް ކީޕޫގެ ރަށްވެހިން ބުނާ ގޮތުގައި، މިކަން ކުރަން ފެށިފަހުން، މަގުތަކަށް ނިކުންނަ މީހުންގެ އަދަދު ދަނީ މަދުވަމުންނެވެ.
މަގުތަކަށް "ޕޮކޮންގް" ނެރުމާ ބެހޭ ގޮތުން، އެ ސަރަހައްދުގެ މިސްކިތެއް ބަލަހައްޓަމުންދާ އަންޖަރު ޕަންކާ ބުނީ، މަޝްރޫއު ކާމިޔާބު ވަމުންދަނީ، ކޮވިޑް-19އަކީ ފުރާނައަށް ކިހާ ނުރައްކާތެރި ބަލިމަޑުކަމެއްކަން، މި "ރޫހު"ތަކުގެ ސަބަބުން މީހުންނަށް ހަނދާން ކޮށްދޭތީ ކަމަށެވެ.
ހަރުކަށި ފިޔަވަޅުތަކެއް ނާޅައިފިނަމަ އިންޑޮނޭޝިއާގެ ސިއްހީ ނިޒާމު އިނދަޖެހިދާނެ ކަމުގެ ބިރުވެރިކަން އިންތިހާއަށް އުފެދިފައިވީ ނަމަވެސް، ގައުމީ ފެންވަރުގައި ލޮކްޑައުންގެ އަމުރެއް އިއުލާން ކުރައްވާކަށް ރައީސް ޖޯކޯ ވިޑޯޑޯ އަދި ނިންމަވާފައެއް ނުވެއެވެ. އިންޑޮނޭޝިއާގެ މަސްރަހުން ލިބިފައިވާ އެންމެ ފަހުގެ ތަފާސް ހިސާބުތަކަށް ބަލާއިރު، 4557 މީހަކު ވަނީ ކޮވިޑް-19އަށް ޕޮޒިޓިވްވެފައެވެ. އަދި 399 މީހަކު ވަނީ މި ބަލީގައި މަރުވެސްވެފައެވެ.
ކޮވިޑް-19 ފެތުރުން ކޮންޓްރޯލް ކުރުމަށް އިންޑޮނޭޝިއާގެ މަގުތަކަށް "ރޫހާނީ" ވޮލަންޓިއަރުން ނެރެފައިވާއިރު، އަވަށްޓެރި އިންޑިއާއިން ވަނީ، ސަލާމަތީ ބާރުތަކަށް ކޮވިޑް-19 ރަމްޒުވާ ހެލްމެޓް ދިނުމަށްފަހު މަގުތަކަށް ނެރެ، މީހުންގެ ހޭލުންތެރިކަން އިތުރުކުރުވުމަށް ކެމްޕޭނެއް ހިންގާފައެވެ.
