ހުޅުލޭ އައިލެންޑު ހޮޓަލް (އެޗްއައިއެޗް)ގެ ޓްރާންސްޕޯޓް މުވައްޒަފުން ވަޒީފާއިން ވަކިކުރަމުންދާ ކަމަށް ޓޫރިޒަމް އެމްޕްލޯއީ އެސޯސިއޭޝަން އޮފް މޯލްޑިވްސް (ޓީމް) އިން ބުނެފިއެވެ.
ޓީމް އިން ކޮށްފައިވާ ޓްވީޓެއްގައި ބުނެފައި ވަނީ ސަރުކާރު ހިއްސާވާ ކުންފުންޏެއްގެ މުވައްޒަފުންތަކެއް ވަޒީފާއިން ވަކިކުރުމަކީ ބަލައިގެނެވޭނެ ކަމެއް ނޫން ކަމަށާއި ވަޒީފާތަކުން މުވައްޒަފުން ވަކިކުރުން ހުއްޓާލާ އަންއެމްޕްލޮއިމަންޓް ބެނެފިޓް އަވަސް ކުރަންޖެހޭ ކަމަށެވެ.
އެ ޖަމިއްޔާއިން ކޮށްފައިވާ ޓްވީޓުގައި ސޯޝަލް މީޑިއާގައި ދައުރުވާ، ވަޒީފާއިން ވަކިކުރި ކަމުގެ ލިއުމެއް ވެއެވެ. އެ ލިޔުމުގައި ބުނެފައިވަނީ އެޗްއައިއެޗްގެ އޮޕަރޭޝަނަށް އައި ބަދަލެއްގެ ސަބަބުން އެ ހޮޓަލް ފަރާތުން ޓްރާންސްޕޯޓް އޮޕަރޭޓް ނުކުރާނެ ކަމަށާއި ޓްރާންސްޕޯޓް ޑިޕާޓްމަންޓު އެއްކޮށް އިއްޔެ އިން ފެށިގެން އުވާލާފައިވާ ކަމަށެވެ.
ކޮވިޑް-19 އާ ގުޅިގެން އިގްތިސޯދަށް ކުރިމަތިވި ހީނަރުކަމުގެ ތެރޭގައި ވަޒީފާގައި ތިބި މީހުންގެ ވަޒީފާ ދެމެހެއްޓުމަށްޓަކައި ސަރުކާރުން ވަނީ ސްޓިމިއުލަސް ޕެކޭޖުގެ ދަށުން ވިޔަފާރިތަކަށް އެހީ ފޯރުކޮށްދިނުމަށް ނިންމާފައެވެ. އެ އެހީ ފޯރުކޮށްދެމުން ދަނީ މުވައްޒަފުންގެ ހައްގުތައް ކަށަވަރުކޮށްދޭ ހަރުކަށި ޝަރުތުތަކާއެކުގައި ކަމަށް ސަރުކާރުން ބުނެއެވެ.
ދިވެހިރާއްޖޭ ބަރޯސާވެފައިވާ ފަތުރުވެރިކަމުގެ ދާއިރާއަށް ބޮޑު ހީނަރުކަމެއް އައިސްފައިވާ އިރު، ގިނަ ރިސޯޓުތަކާއި ހޮޓެލްތަކެއް ވަނީ ބަންދު ކޮށްފައެވެ. އެއާއެކު ޓޫރިޒަމްގެ ދާއިރާގައި މަސައްކަތްކުރާ ގިނަ މުވައްޒަފުންތަކެއް ވަޒީފާއިން ވަކުކުރުމާއި ނޯޕޭއަށް ފޮނުވުމުގެ ޝަކުވާ ވަނީ އިތުރުވެފައެވެ. މިފަދަ ދަނޑިވަޅެއްގައި ވާޒިފާއާ ބެހޭ ގާނޫނާ ހިލާފުވާ ރިސޯޓުތަކާއި މެދު ފިޔަވަޅު އަޅާނެ ކަމަށްވެސް ޓޫރިޒަމް މިނިސްޓްރީން ވަނީ ބުނެފައެވެ.
ކޮވިޑް-19 ގެ ސަބަބުން ވަޒީފާގެ ހާލަތަށް ބަދަލެއް އައިސްފައިވާ ނަމަ ޖޮބް ސެންޓަރުގައި ރިޕޯޓްކުރުމަށް އިކޮނޮމިކް މިނިސްޓްރީން ވަނީ އިލްތިމާސްކޮށްފައެވެ. އިކޮނޮމިކް މިނިސްޓްރީއާ، ހަޔާ އެޑިއުކޭޝަން މިނިސްޓްރީ ގުޅިގެން ގާއިމްކޮށްފައިވާ ޖޮބް ސެންޓަރަކީ ދިވެހިންނަށް ވަޒީފާގެ ފުރުސަތު ފަހިކޮށް ދިނުމަށް ގާއިމްކޮށްފައިވާ ޕޯޓަލްއެކެވެ. އެގޮތުން އިއްޔެއާ ހަމައަށް ޖޮބް ސެންޓަރުގައި ވަނީ 1100 އަށް ވުރެ ގިނަ މީހުން ރަޖިސްޓްރީ ކޮށްފައެވެ.
