ކޮރޯނާވައިރަސް ޑިޒީޒް (ކޮވިޑް-19) ޖެހި އެ ބަލިން ރަނގަޅުވުމަށް ފަހު އަނެއްކާވެސް ޕޮޒިޓިވްވާ ކޭސްތަކެއްގެ މައްސަލަ ފެންމަތި ވެފައި ވާއިރު އެކަން ބަލަމުން އަންނަ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ) އިން ހާމަކޮށްފިއެވެ.
ޑަބްލިއު.އެޗް.އޯއިން ރޮއިޓާޒް މީޑިއާއަށް ދިން ބަޔާނެއްގައި ބުނެފައިވަނީ ޕޮލީމަރޭޒް ޗެއިން ރިއެކްޝަން (ޕީސީއާރް) ޓެސްޓުގައި ކޮވިޑް-19އަށް ނެގެޓިވް ވެފައިވާ ޕޭޝަންޓުން، ދުވަސްކޮޅެއް ފަހުން ކޮވިޑް-19އަށް ޕޮޒިޓިވްވާ ކަމުގެ މައުލޫމާތު ލިބިފައި ވާކަމަށެވެ.
ޑަބްލިއު.އެޗް.އޯއިން ބުނީ އެ އިދާރާގެ ތަޖުރިބާކާރުންގެ އެހީތެރިކަމާއެކު މިފަދަ ކޭސްތަކާ ބެހޭ އިތުރު މައުލޫމާތު އެއްކުރަމުން ދާކަމަށެވެ. އަދި ކޮވިޑް-19އަށް ޝައްކު ކުރެވޭ ޕޭޝަންޓުން ޓެސްޓު ކުރުމަށް ސާމްޕަލް ނަގާ ޓެސްޓު ކުރުމުގެ މަރުހަލާތައް ކުރިއަށްދަނީ ކަނޑައަޅާފައިވާ އިޖުރާއަތުތަކާ އެއްގޮތަށްކަން ކަށަވަރު ކުރުމަކީ މުހިންމު ކަމެއްކަންވެސް އެ ޖަމިއްޔާއިން ވަނީ ފާހަގަކޮށްފައެވެ.
މިދިޔަ ހުކުރު ދުވަހު ދެކުނު ކޮރެއާއިންވަނީ ކޮވިޑް-19އަށް ޕޮޒިޓިވް ވުމަށް ފަހު ފަރުވާކޮށްގެން ރަނގަޅުވެފައިވާ 91 މީހަކު އަލުން އަނެއްކާ އެ ބައްޔަށް ޕޮޒިޓިވް ވި ކަމަށް ރިޕޯޓް ކޮށްފައެވެ. ދެކުނު ކޮރެއާއިން ވަނީ، މިއީ އެ ޕޭޝަންޓުން ދެވަނަ ފަހަރަށް އިންފެކްޓްވީ ނޫން ކަމަށާ، އެއީ ފަހަރުގައި ވައިރަސް ރީއެކްޓިވޭޓް ވެގެން މެދުވެރި ހާލަތަކަށްވުން އެކަށީގެންވާ ކަމަށްވެސް ތުހުމަތު ކޮށްފައެވެ.
ޑަބްލިއު.އެޗް.އޯއިންވަނީ މިކަމާ ބެހޭ ރިޕޯޓްއެއް ފޯރުކޮށްދިނުމަށް ދެކުނު ކޮރެއާއަށް ގޮވާލާފައެވެ.
ޑަބްލިއު.އެޗް.އޯގެ ގައިޑްލައިންގައިވާ ގޮތުން ކޮވިޑް-19ގެ ޕޭޝަންޓެއް ޑިސްޗާޖު ކުރެވޭނީ ނުވަތަ ސިއްހީ ހިދުމަތްދޭ ތަނަކުން ދޫކޮށްލެވޭނީ، ޑޮކްޓަރުން ބަލާބެލުމަށް އޭނާ ރަނގަޅު ވެފައި ވާކަމަށް ކަނޑައަޅާ ޕޭޝަންޓުންގެ ހަށިގަނޑުން ސާމްޕަލް ނަގައިގެން ހަދާ 2 ޓެސްޓެއް ނެގެޓިވް ވުމަށް ފަހުގައެވެ. އަދި މި 2 ޓެސްޓުގެ ދެމެދުގައި މަދުވެގެން 24 ގަޑިއިރުގެ މުހުލަތެއް ހޭދަވާން ޖެހެއެވެ.
އެންމެ ފަހުގެ ހޯދުންތަކަށް ބަލާއިރު، ބަލީގެ އަލާމާތްތައް ފެންނަން ފަށާ ހިސާބުން ބަލި ރަނގަޅުވުމާ ދެމެދު އެވަރޭޖުކޮށް ހޭދަވަނީ ގާތްގަނޑަކަށް 2 ހަފުތާއެއްހާ ދުވަހުގެ މުއްދަތެކެވެ.
ދުނިޔޭގެ އެކި ކަންކޮޅުތަކުން 1780315 މީހުން ކޮވިޑް-19އަށް ޕޮޒިޓިވް ވެފައި ވާއިރު، 404031 މީހަކު ވަނީ މި ބަލިން ރަނގަޅުވެފައެވެ.
