ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ޝިކާރައަކަށްވެ، އެއްދުވަހާ 2000 އަށްވުރެ ގިނަ މަރު ރިޕޯޓްކުރި ގައުމަކަށް އެމެރިކާވެއްޖެއެވެ.
އެމެރިކާއިން ކޮވިޑް-19އަށް ޕޮޒިޓިވްވި މީހުންގެ އަދަދު ބައި މިލިއަނަށްވުރެ މައްޗަށް އަރާފައިވާއިރު، ފާއިތުވީ 24 ގަޑިއިރެއްހާއިރު ތެރޭގައި އެމެރިކާއިން 2100 އަށްވުރެ ގިނަ މީހުން މަރުވި ކަމަށް ޖޯން ހޮޕްކިންސް ޔުނިވާސިޓީގެ ރެކޯޑްތަކުން ދައްކައެވެ. މިއަދު އެކަނިވެސް 136 މީހެއްގެ ފުރާޏަ ގެއްލުނު ކަމަށް އެމެރިކާއިންވަނީ ރިޕޯޓްކޮށްފައެވެ.
ޖުމުލަ ރެކޯޑްތަކަށް ބަލާއިރު އެމެރިކާއިން މަރުވި މީހުންގެ ޖުމުލަ އަދަދު މިހާރު ވަނީ 18883 އަށް އަރާފައެވެ. މިއީ ކޮވިޑް-19ގައި އެންމެ ގިނަ އަދަދަކަށް މީހުން މަރުވެގެން ރިޕޯޓްކުރި ގައުމުވެސްމެއެވެ. މިއާ އެންމެ ގާތް ކުރާ އަދަދަކަށް މަރުގެ ކޭސްތައް ރިޕޯޓްކޮށްފައިވަނީ، 18849 ކޭސް ރިޕޯޓްކުރި އިޓަލީވިލާތުންނެވެ. ދެން އެންމެ ގިނަ ބަޔަކު މަރުވެގެން ރިޕޯޓްކޮށްފައިވަނީ ސްޕެއިންއިންނެވެ. ސްޕެއިންއިން މަރުވި މީހުންގެ ޖުމުލަ އަދަދު މިހާރު ވަނީ 16353 އަށް އަރާފައެވެ. ފަރަންސޭސިވިލާތުން މަރުވި މީހުންގެ އަދަދު ވަނީ 13197 އަށް އަރާފައެވެ.
ސިއްހީ އެކިކަންކަމުގައި އެމެރިކާގެ ރައީސް ޑޮނާލްޑް ޓްރަމްޕަށް ލަފާއަރުވާ މުޝީރު ޑރ އެންތަނީ ފައޫޗީ ވަނީ، ކޮވިޑް-19ގެ ބަލިމަޑުކަމުގައި އެމެރިކާއިން 60000 އެއްހާ މީހުންގެ ފުރާނަގެއްލިދިއުން އެކަށީގެންވާކަމަށް ލަފާކުރައްވާފައެވެ.
