ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)އަށް އެމެރިކާއިން ޕޮޒިޓިވްވި މީހުންގެ އަދަދު ބައި މިލިއަނަށްވުރެ މައްޗަށް އަރައިފިއެވެ.
ލިބެމުންދާ އެންމެ ފަހުގެ ތަފާސް ހިސާބުތަކަށް ބަލާއިރު އެމެރިކާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދަކީ 502876 އެވެ. 27314 މީހަކު ފަރުވާ ހޯދައިގެން ރަނގަޅުވެފައިވާއިރު އެކްޓިވް ކޭހުގެ އަދަދަކީ 456815އެވެ. ޚަބަރު ލިބޭ ގޮތުގައި ކޮވިޑް-19އަށް ޕޮޒިޓިވްވެ ހޮސްޕިޓަލުގައި ފަރުވާ ދެމުންދާ މީހުންގެ ތެރެއިން 10917 މީހެއްގެ ހާލު ސީރިއަސް/ކްރިޓިކަލްއެވެ. ސީރިއަސް ނުވަތަ ކްރިޓިކަލް ހާލުގައި ތިބި ޕޭޝަންޓުން އެންމެ ގިނައީވެސް އެމެރިކާގައެވެ.
އެމެރިކާގައި ކޮވިޑް-19އަށް ޕޮޒިޓިވްވި މީހުންގެ ތެރެއިން އެބަލީގައި މަރުވި މީހުންގެ އަދަދު ވަނީ 27314 އަށް އަރާފައެވެ. އެމެރިކާގެ ހުރިހާ ސްޓޭޓްއަކާ ސަރަހައްދަކަށް ބަލާއިރު، މީހަކު މަރުވެގެން ރިޕޯޓްނުކޮށް ހަމައެކަނި ތަނަކީ ވަޔޯމިންގްއެވެ.
އާރާ ބާރާ ނުފޫޒުގެ ގޮތުން ބަލާއިރު އެންމެ ކުރީގައި އޮތް އެމެރިކާއަށްވެސް ކޮވިޑް-19އާ ކުރިމަތިލުމުގައި ބޮޑެތި ގޮންޖެހުންތަކެއް ކުރިމަތިވެފައެވެ. އެގޮތުން އެމެރިކާގެ ޖަލުތަކުގައިވެސް މި ބަލިމަޑުކަން ފެތުރެމުންދިއުމުގެ ކަންބޮޑުވުން ވަނީ އިންތިހާއަށް އިތުރުވެފައެވެ. އެމެރިކާގެ ސަރުކާރުން ހިންގާ ޖަލުތަކުގައި ތިބި 300 އެއްހާ ގައިދީން މި ބައްޔަށް ޕޮޒިޓިވެފައިވާއިރު، 9 ގައިދީއަކު މި ބަލީގައި މަރުވެފައިވާކަމަށް މައުލޫމާތު ލިބެއެވެ.
އާންމު ހާލަތަށް ބަލާއިރު، ބަލީގެ ނުރައްކާ އެންމެ ބޮޑުވާ މީހުންނަށް ފަރުވާ ދިނުމަށް ބޭނުންކުރާ ބައެއް އާލާތްތައް ލިބުމުގައިވެސް ދަތިތަކެއް ހުރިކަން އެމެރިކާގެ ސްޓޭޓްތަކުން ދަނީ ފާހަގަކުރަމުންނެވެ. އެގޮތުން ވެންޓިލޭޓަރުގެ ދަތިކަން ކުރިމަތިވަމުން އަންނަކަން ބައެއް ފަރާތްތަކުން ވަނީ ފާހަގަކޮށްފައެވެ.
ކަންމިހެން އޮތްއިރު އެމެރިކާގެ އިސް ސިއްހީ ތަޖުރިބާކާރު އަދި ކޮވިޑް-19 ވައިޓް ހައުސް ޓާސްކް ފޯސް ކޮމިޓީގެ މެމްބަރު ޑރ އެންތަނީ ފައޫޗީ ވަނީ ވަނީ، ކޮވިޑް-19އަށް ހަދާ އެންޓިބޮޑީ ޓެސްޓް ވަރަށް އަހަށް ލިބޭނެ އިންތިޒާމު ހަމަޖެހިގެންދާނެ ކަން ހާމަކުރައްވާފައެވެ. ޑރ ފައޫޗީ ލަފާކުރައްވާ ގޮތުގައި ކޮވިޑް-19ގައި އެމެރިކާއިން 60000 އެއްހާ މީހުންގެ ފުރާނަ ގެއްލިދާނެއެވެ.
