ކަނޑައެޅިގެން ވަކި ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) ނުރައްކާ ދަރަޖައަކަށް ފެތުރެމުންދާ އެމެރިކާގައި، ބޮޑު ވަޅުގަނޑެއްގައި ގިނަ އަދަދެއްގެ ގަބުރުތަކެއް ވަޅުލަމުންދާ މަންޒަރު އާންމުވެއްޖެއެވެ.
މީޑިއާގައި ދައުރުވަމުންދާ މަންޒަރުތަކަކީ ކޮވިޑް-19ގެ ނުރައްކާ، އެމެރިކާއިން އެންމެ ބޮޑުވެފައިވާ ނިއުޔޯކް ސިޓީގެ މަންޒަރުތަކެއް ކަމަށް ޚަބަރު ލިބެއެވެ. މިމަންޒަރުތަކުން ފެނިގެންދަނީ ހެޒްމެޓް ސޫޓުގައި ތިބޭ ބަޔަކު، ހަރުގަނޑެއް ބަހައްޓައިގެން ބޮޑު ވަޅުގަނޑަކަށް ފައިބާ، އެ ވަޅުގަނޑު ތެރޭގައި ސަންދޯއްތަކެއް އަތުރަމުންދާ މަންޒަރެވެ.
'ހާޓް އައިލަންޑް'ގެ ގޮތުގައި ފާހަގަކޮށްފައިވާ މިސަރަހައްދަކީ، ނިއުޔޯކްގައި ދިރިއުޅޭ މީހުންގެ ތެރެއިން އާއިލީ ގޮތުން ގާތް މީހަކު ނެތް މީހުންނާ، ޖަނާޒާއެއް ބޭއްވޭނެ ތަނަވަސްކަން ނެތް މީހުން މަރުވުމުން، އެމީހުން ވަޅުލުމުގެ އިންތިޒާމުތައް ހަމަޖައްސާ ސަރަހައްދެވެ.
އެންމެ ފަހުގެ ތަފާސް ހިސާބުތަކަށް ބަލާއިރު މުޅި އެމެރިކާއިންވެސް ކޮވިޑް-19ގެ ކޭސްތައް އެންމެ ގިނައީ ނިއުޔޯކް ސިޓީގައެވެ. އިއްޔެ އެކަނިވެސް 10000 އަށްވުރެ ގިނަ މީހުން ސިޓީއިން ޕޮޒިޓިވްވެފައިވާއިރު، ނިއުޔޯކް އިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދު މިހާރު ވަނީ 159937 އަށް އަރާފައެވެ. މީގެ ތެރެއިން 7000 މީހެއްގެ ފުރާނަވަނީ ގެއްލިފައެވެ.
އެމެރިކާއިން އާންމުވެގެން އުޅޭ މަންޒަރުތަކުން ފެންނަ ސަންދޯއްތަކުގައިވާ ގަބުރުތަކަކީ، އާއިލީ ގާތްކަން ނެތް މީހުންނާ، ޖަނާޒާ ބާއްވާނެ ތަނަވަސްކަން ނެތް މީހުންކަން ކަނޑައެޅިގެން ބުނާކަށް ނޭނގެއެވެ. ނަމަވެސް އެ ގަބަރުތަކުގެ ތެރޭގައި، ކޮވިޑް-19ގެ ޝިކާރައަކަށްވެ މިދުނިޔެއާއި ވަކިވި މީހުންގެ ގަބުރުތައް ގިނަވާނެ ކަމަށް ބައިނަލްއަގުވާމީ މީޑިއާއިން ވަކާލާތުކުރެއެވެ.
މި ސަރަހައްދުގައި ޖަނާޒާ ބޭއްވުމުގެ މަސައްކަތުގައި އާންމުކޮށް ހަރަކާތްތެރިވަނީ ގައިދީންނެވެ. މިސަރަހައްދުގައި ޖަނާޒާ ބާއްވަމުން ދިޔައީ ހަފުތާއަކު 1 ދުވަހުއެވެ. ނަމަވެސް ކޮވިޑް-19އާ ގުޅިގެން މަރުވާ މީހުންގެ އަދަދު އިންތިހާއަށް އިތުރުވާން ފެށުމުން، ޖަނާޒާގެ މަސައްކަތް ހަފުތާގެ 5 ދުވަހަށް އިތުރުކޮށް، ކޮންޓްރެކްޓް އުސޫލުން މުވައްޒަފުން ބައިވެރިކޮށްގެން ކުރިއަށް ގެންދާކަމަށް ޚަބަރު ލިބެއެވެ.
ކޮވިޑް-19އާ ގުޅިގެން އެމެރިކާއިން 60000 އެއްހާ މީހުން މަރުވާނެކަމަށް ލަފާކުރެވޭ ކަމަށް، ވައިޓްހައުސްގެ ކޮރޯނާވައިރަސް ޓާސްކްފޯސްގެ މެމްބަރު ޑރ އެންތަނީ ފައޫޗީ ވަނީ އިއްޔެގެ ވަގުތެއްގައި ވިދާޅުވެފައެވެ. މި ބަލީގައި 1-2 ލައްކާއާއި ދެމެދު އަދަކަށް އެމެރިކާއިން މީހުން މަރުވުން އެކަށީގެންވާ ކަމަށް ޑރ ފައޫޗީ ވަނީ މީގެ ކުރިން ވަނީ ވިދާޅުވެފައެވެ.
