ހަލުވިކަމާއެކު ފެތުރެމުންދާ ކޮރޯކާވައިރަސް ޑިޒީޒް (ކޮވިޑް-19) ކޮންޓްރޯލް ކުރުމަށް ސިންގަޕޫރުން އަޅަމުންދާ ހަރުކަށި ފިޔަވަޅުތަކުގެ ތެރެއިން، އެގައުމަށް ހިޖުރަކޮށްގެން އުޅޭ ބިދޭސީ މަސައްކަތްތެރިން، އަސްކަރީ ކޭމްޕުތަކާ ފްލޯޓިންގް ހޮޓާތަކަށް ބަދަލު ކުރަން ނިންމައިފިއެވެ.
ސިންގަޕޫރުގެ ސަރުކާރުން މިފަދަ ނިންމުމެއް ނިންމާފައި މިވަނީ ކޮވިޑް-19ގެ ކޭސްތައް އެގައުމުގައި އަނެއްކާވެސް އިތުރުވާން ފަށާފައިވާ ދަނޑިވަޅެއްގައެވެ.
ސިންގަޕޫރުގެ ސިއްހަތާ ބެހޭ ވުޒާރާއިން އިއްޔެ ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި ހާމަކުރި ގޮތުގައި، އެގައުމުން ކޮވިޑް-19އަށް ޕޮޒިޓިވްވާ ކޭސްތަކަށް ބަލާއިރު ބުރާސްފަތި ދުވަހު އެކަނިވެސް ބިދޭސީ މަސައްކަތްތެރިންނާ ގުޅޭ 200 ކޭހެއް ފާހަގަކުރެވިފައިވާކަމަށެވެ.
ސިންގަޕޫރުން މިދިޔަ ހޯމަ ދުވަހު ބުނީ 19800 އެއްހާ ހިޖުރަވެރި މަސައްކަތްތެރިން، އެމީހުންގެ ޑޯމްތަކުގައި ކަރަންޓީނު ކުރާނެ ކަމަށެވެ. ނަމަވެސް އެވަރުންވެސް ބަލި ފެތުރުން ކޮންޓްރޯލް ކުރެވިފައެއް ނުވެއެވެ.
އެހެންކަމުން ހިޖުރަވެރި މަސައްކަތްތެރިންގެ ތެރެއިން ބައްޔަށް އިންފެކްޓްވެފައި ނުވާ މަސައްކަތްތެރިން އައިސޮލޭޓް ކުރުމުގެ މަސައްކަތް މިހާރު ވަނީ ފަށާފައެވެ. ސިންގަޕޫރުގެ މަލްޓި-މިނިސްޓްރީ ޓާސްކްފޯހުގެ ކޯ-ޗެއާ ލޯރެންސް ވޮންގް ވިދާޅުވީ، ހިޖުރަވެރި މަސައްކަތްތެރިން އެކަހެރި ކުރަމުންދާނީ އަސްކަރީ ކޭމްޕުތަކާ ފްލޯޓިންގް ހޮޓާތަކުގެ އިތުރުން، މައުރުޒު ބާއްވާން ހާއްސަކޮށްފައިވާ މާލަންތަކާ، ހުސްކޮށްހުރި ސަރުކާރު އިމާރާތްތަކުގައި ކަމަށެވެ.
ބިދޭސީ ހިޖުރަވެރި މަސައްކަތްތެރިން އެކަހެރި ކުރުމުގައި ޒަރޫރީ ޚިދުމަތްތަކުގެ ދާއިރާގައި މަސައްކަތްކުރާ ފަރާތްތަކަށް އިސްކަން ދޭނެ ކަމަށާ، އެހެނީ، އެމީހުންގެ ޚިދުމަތަކީ މިއަދު އެގައުމަށް އިންތިހާއަށް ބޭނުންވާ ޚިދުމަތްތަކަކަށްވުން ކަމަށްވެސް ވޮންގް ވަނީ ފާހަގަކުރައްވާފައެވެ.
ސިންގަޕޫރުގެ ސަރުކާރުންވަނީ ހިޖުރަވެރި މަސައްކަތްތެރިންނަށް ހާއްސަކޮށްގެން އެހީގެ ޕެކޭޖުތަކެއްވެސް ތައާރަފުކޮށްފައެވެ. އެގޮތުން މާސްކުގެ އިތުރުން ހުން ބަލަން ބޭނުންކުރާ ކަށިގަނޑު ނުވަތަ ތެމޯމީޓަރުވެސް ފޯރުކޮށްދެމުންދާއިރު، ދުވާލުގެ ތިން އިރަށް ކޮއްތުވެސް ހަމަޖައްސާދެމުންދަނީ ސިންގަޕޫރު ސަރުކާރުން ކަމަށް ޚަބަރު ލިބެއެވެ.
ކޮވިޑް-19އާ ގުޅިގެން ގައުމުތަކުން ފިޔަވަޅު އަޅަމުންދާއިރު، ސިންގަޕޫރުން ކަންކުރާ ގޮތް ބަލާ، އެކަންކަން ތަޖުރިބާކުރުމަށް މަސައްކަތްކުރާ ގައުމުތައްވެސް އޮވެއެވެ.
ސިންގަޕޫރުގެ އަދުގެ ހާލަތަށް ބަލާއިރު، އެގައުމުން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 1910 އަށް އަރާފައެވެ. އަދި 6 މީހަކު މި ބަލީގައި މަރުވެފައިވާކަމަށް ރެކޯޑްތަކުން ދައްކައެވެ.
