މުޅި ދުނިޔެ ކުޑަކަކޫ މައްޗަށް ތިރިކޮށްލި ކޮރޯނާވައިރަސް ޑިޒީޒް (ކޮވިޑް-19) ބަލިމަޑުކަމުގެ ދެވަނަ ރާޅެއްގެ އިންޒާރު، ޗައިނާގެ ރައީސް ޝީ ޖީންޕިންގް ދެއްވައިފިއެވެ.

ޗައިނާގެ ދައުލަތުގެ ޚަބަރުފަތުރާ ޝީންހުއާއާ ހަވާލާދީ ބައިނަލްއަގުވާމީ މީޑިއާއިން ރިޕޯޓްކޮށްފައިވާ ގޮތުގައި، މިފަދަ އިންޒާރެއް ޝީ ދެއްވާފައިވަނީ، ޗައިނާގެ ވެރިކަން ކުރަމުން އަންނަ ކޮމިއުނިސްޓް ޕާޓީގެ އެންމެ އިސްވެރިންގެ ގޮފި ނުވަތަ ޕޮލިޓްބިއުރޯ ސްޓޭންޑިންގް ކޮމިޓީގެ ބައްދަލުވުމެއްގައެވެ.

މި ބައްދަލުކުރެއްވުމުގައި ވާހަކަފުޅުދައްކަވަމުން ޝީ ވިދާޅުވީ، ކޮވިޑް-19އާއިއެކު ދުނިޔޭގެ އިގުތިސޯދު އިނދަޖެހެމުންދާއިރު، ކަށަވަރުނުވާ އަދި ހަމަނުޖެހި އޮތް ކަންކަން އިތުރުވަމުންދާކަމަށެވެ.

ޗައިނާއިން ބުނާ ގޮތުގައި އެގައުމުގައި ފެތުރެމުންދިޔަ ކޮވިޑް-19ގެ ބަލިމަޑުކަން މިހާރު ވަނީ ކޮންޓްރޯލް ކުރެވިފައެވެ. އާބާދީގެ މެދުގައި ބަލި ފެތުރޭ މިންވަރު އިންތިހާއަށް ދަށް ކުރެވިފައިވާއިރު މީހުން މަރުވާ ނިސްބަތްވެސް މަދުކަމަށް ޗައިނާއިން ދޭ ތަފާސް ހިސާބުތަކުން ދައްކައެވެ. ބަލީގެ ކޭސްތައް ފުރަތަމަ ފެންނަން ފަށާ، އިންތިހާ ނުރައްކާ ދަރަޖައަކަށް ވެއްޓިގެންދިޔަ ވޫހާން ސިޓިގެ ބޯޑަރުތައްވެސް އިއްޔެގެ ވަގުތެއްގައި ވަނީ ހުޅުވާލާފައެވެ.

ކަންމިހެން އޮތްއިރު، ބޭރުފުށުން އަލާމާތްތައް ނުފެނި ބަލި ފަތުރާ މީހުންގެ އަދަދު ޗައިނާގައި އިތުރުވަމުން އަންނައިރު، މިއީ އެތައް ބަޔަކު އިންތިހާ ކަންބޮޑުވުމެއްގެ ތެރެއަށް ވައްޓާލި ކަމަކަށް ވަނީ ވެފައެވެ. ޗައިނާއިން ބުނާ ގޮތުގައި އެގައުމުން މިހާރު ފެންނަމުންދާ ކޭސްތަކަކީ އެގައުމަށް އިމްޕޯޓްވެފައިވާ ކޭސްތަކެކެވެ. ނުވަތަ ބޭރު ގައުމުތަކަށް ދަތުރު ކުރުމަށްފަހު އެގައުމަށް އެތެރެވި މީހުންގެ ފަރާތުން ރިޕޯޓްކުރާ ކޭސްތަކެކެވެ.

އިގުތިސޯދީ އަދި އިގުތިސޯދީ ތަރައްގީގެ މަސައްކަތްތައް އަލުން ފަށައިގަތުމަށް ޗައިނާއަށް އާ ގޮންޖެހުންތަކަކާ ދަތި އުނދަގޫތަކެއް ކުރިމަތިވެފައިވާކަން ފާހަގަކުރައްވަމުން ޝީ ވަނީ، ޗައިނާއަށް އިމްޕޯޓްވަމުންދާ ކޭސްތަކަށް ހާއްސަ ސަމާލުކަމެއް ދިނުމަށް ކަމާބެހޭ ފަރާތްތަކަށް ގޮވާލައްވާފައެވެ. އަދި ކޮވިޑް-19ގެ ދެވަނަ ރާޅެއްގެ ނުރައްކަލުން ޗައިނާ ސަލާމަތް ކުރުމަށް މަސައްކަތްކުރުމަށް ޝީ ވަނީ ކަމާބެހޭ ފަރާތްތަކަށް ގޮވާލައްވާފައެވެ.

ޗައިނާގެ އަދުގެ ހާލަތަށް ބަލާއިރު އެގައުމުން ކޮވިޑް-19އަށް ޕޮޒިޓިވްވި މީހުންގެ އަދަދު 81865 އަށް އަރައެވެ. މިއަދުގެ މިވަގުތާ ހިސާބަށް 63 މީހަކު ޕޮޒިޓިވްވެފައިވާކަމަށް އެންމެ ފަހުގެ ތަފާސް ހިސާބުތަކުން ދައްކައެވެ. މި ބަލީގައި ޗައިނާއިން މަރުވި މީހުންގެ އަދަދު 3335 އަށް ވަނީ އަރާފައެވެ.

ކޮވިޑް-19 ދުނިޔެ ސިއްހަތު ޗައިނާ