ވަން އެންޑް އޮންލީ ރީތި ރަށް ރިސޯޓުގެ މުވައްޒަފުންގެ މުސާރަތައް ކުޑަކޮށްފި

ދުނިޔޭގެ ހަލުވިކަމާއެކު ފެތުރެމުން އަންނަ ކޮވިޑް19 އާއި ގުޅިގެން ވަން އެންޑް އޮންލީ ރީތި ރަށް ރިސޯޓުގެ މުވައްޒަފުންގެ މުސާރަ ކުޑަ ކޮށްފިއެވެ.

އެ ކުންފުނީގެ ޔޫޓިއުބު ޗެނަލްއަށް އެ ރިސޯޓުގެ ސީއީއޯ ވިދާޅުވެފައިވަނީ ކޮވިޑް19 އާއި ގުޅިގެން އޭގެ އަސަރު އެންމެނަަށްވެސް ފޯރާފައިވާ ކަމަށެވެ. އަދި މިއީ މުވައްޒަފުންގެ އިތުރުން އެ ކުންފުންޏަށް ވެސް ދިމާވެފައިވާ ވަރަށް ހިތާމަވެރި ދުވަސްތަކެއް ކަމަށެވެ. ސީއިއޯ ވިދާޅުވީ ކޮވިޑް19 ފެތުރުމާއެކު ކުންފުނީގެ ގިނަ ރިސޯޓުތައް ބަންދުކޮށްފައިވާ ކަމަށާއި، ނަމަވެސް ބަންދު ނުކޮށް ހުރި ރިސޯޓްތަކުގައި ވެސް މިވަގުތު ތިބީ ވަރަށް މަދު ފަތުރުވެރިން ތަކެއް ކަމަށެވެ.

އޭނާ ވިދާޅުވީ މިފަދަ ދަނޑިވަޅެއްގައި ވެސް އެ ކުންފުނީގެ ޝެއާ ހޯލްޑަރުން މިކަމަށް ވަރަށް އެހީތެރިވާ ކަމަށެވެ. އެހެން ނަމަވެސް ރިސޯޓްތައް އަލުން އަނބުރާ ހުޅުވި ފަތުރުވެރިން އަންނަން ފަށާ، ފައިސާ ވަންނަން ފެށުމާ ހަމައަށް މާލީ ގޮތުން އެކުންފުންޏަށް ދަތިތަކަކާ ކުރިމަތިލާން ޖެހިފައިވާ ކަމަށެވެ.

ސީއީއޯގެ ވާހަކާގައި ވިދާޅުވީ މި ބަލިމަޑުކަން އަދިވެސް ހައްލުވާ މަންޒަރެއް ނުފެންނަ ކަމަށާއި، ދުވަހުން ދުވަހަށް ބަލި ދަނީ ފެތުރެމުން ކަމަށެވެ. އެހެންކަމުން މިވަގުތު ކުންފުނީގެ މުވައްްޒަފުންނާއި ކުންފުނީގެ ކުރިމަގަށް ވިސްނުން ވެސް ވަރަށް މުހިއްމު ކަމަށް އޭނާ ވިދާޅުވިއެވެ. އަދި އުންމީދު ކުރައްވަނީ ކުންފުންޏާއި އަދި މުވައްޒަފުންގެ ލާބައަށް މިހާރު އަޅާ ފިޔަވަޅުތަކުން ކުރިއަށް އޮތްތާ އެ ވިޔަފާރިއަށް އެއްވެސް ބަދަލެއް ނާންނަ ކަމަށް ރީތި ރަށުގެ ސީއީއޯ ވިދާޅުވިއެވެ. އަދި މިކަން ކުރުމަށް ބައެއް ދަތި ނިންމުންތައް ނިންމަން ޖެހޭ ކަމަށާއި އެގޮތުން ވަގުތީ ގޮތުން މުވައްޒަފުންގެ މުސާރަ ކުޑަ ކުރުންޖެހޭ ކަމަށް އޭނާ ވިދާޅުވިއެވެ. އަދި އެ ކުންފުނީގެ މެނޭޖްމަންޓް ލެވެލްގައި މަސައްކަތް ކުރާ ފަރާތްތަކުގެ މުސާރަވެސް ވަރަށް ބޮޑުތަނުން ކުޑަ ކޮށްފައިވާ ކަމަށް އޭނާ ވިދާޅުވިއެވެ.

މިއީ މިގޮތަށް މުސާރަ ކުޑަކުރި ފުރަތަމަ ރިސޯޓެއް ނޫނެވެ. މި ދަނޑިވަޅުގައި އެތައް ބައެއްގެ މުސާރަތައް ކުޑަކޮށްފައި ވާއިރު ރިސޯޓުތަކުގެ އިތުރުން އެހެނިހެން ބައެއް މަސައްކަތްތައް ކުރާ ކުންފުނިތަކުން ވެސް ވަނީ މުވައްޒަފުންގެ މުސާރަތައް ކުޑަކޮށްފައެވެ. ކުންފުނިތަކުން މުވައްޒަފުންގެ މުސާރަތައް ކުޑަ ކުރަމުން އަންނައިރު ސަރުކާރުން ތައާރަފު ކޮށްފައިވާ ރިކަވަރީ ޕެކޭޖުން ފައިސާ ދޫކުރުމުގައި މިކަމަށް، މުވައްޒަފުން ވަޒީފާއިން ވަކިކުރުމާއި މުވައްޒަފުންގެ މުސާރަތައް ކުޑަކުރުމުގައި ހާއްސަ ސަމާލުކަމެއް ސަރުކާރުން ދޭނެ ކަމަށް ވަނީ ބުނެފައެވެ.

ކޮވިޑް19 ގެ ސަބަބުން ދައުލަތުގެ އާމްދަނީއާ ވިޔަފާރިތައް ބޮޑުތަބުން ދަށަށް ގޮސްފައިވާއިރު މުވައްޒަފުންގެ ވަޒީފާގެ ހާލަތަށް އެއްވެސް ބަދަލެއް އައިސްފައިވާ ނަމަ އެކަން އެންގުމަށް އިކޮނޮމިކް މިނިސްޓްރީން ވަނީ ހާމަކޮށްފައެވެ. މިހާތަނަށް ޖޮބް ސެންޓަރަށް 449 ޝަކުވާއެއް ހުށަހަޅާފައިވާ ކަަމަށް ސަރުކާރުން ބުނެއެވެ.