ލުބްނާނުގައި ދިރިއުޅެމުންދާ ފިލިޕީންސްގެ މަސައްކަތްތެރިންގެ ހައްގުގައި ހަރުއަޑުން ވަކާލާތު ކުރައްވަމުން ގެންދެވި އެކްޓިވިސްޓް އަދި ފިލިޕީންސްއިން ލުބްނާނަށް ކަނޑައަޅާފައި ހުންނެވި ސަފީރު ބެރްނާދީތާ ކެތާއްލާ، ކޮވިޑް-19ގެ ޝިކާރައަކަށްވެ، އަވަހާރަވެއްޖެއެވެ.
ފިލިޕީންސްގެ ޑިޕާޓްމަންޓް އޮފް ފޮރިން އެފެއާޒްއިން އާންމުކޮށްފައިވާ ބަޔާނެއް ބުނާ ގޮތުގައި ސަފީރު އަވަހާރަވެފައިވަނީ ބުރާސްފަތި ދުވަހުގެ ވަގުތެއްގައެވެ. އެ ބަޔާން ބުނާ ގޮތުގައި، ކެތާއްލާއަކީ ޑިޕްލޮމެޓިކް މިޝަންތަކުގައި އެކިއެކި ހައިސިއްޔަތުން 27 އަހަރު ޚިދުމަތް ކުރައްވާފައިވާ ފަރާތެއްކަން ވަނީ ފާހަގަކޮށްފައެވެ.
ޑިޕްލޮމެޓިކް މައިދާނުގައި ކެތާއްލާ ދެއްކެވި ނަމޫނާއަކީ، ފިލިޕީންސްގެ ޑިޕްލޮމެޓުންނަށް ރާސްތާ ދައްކާދެނިވި އަލިކަމުގެ ދަންމަރެއް ކަމުގައި ފިލިޕީންސް ހާރިޖިއްޔާއިން ސިފަކުރެއެވެ.
ފިލިޕީންސްގެ ޑިޕްލޮމެޓާއެކު ކޮވިޑް-19ގައި ލުބްނާނުން މަރުވި މީހުންގެ އަދަދު މިވަނީ 16 އަށް އަރާފައެވެ. ޚަބަރު ލިބޭ ގޮތުގައި ލުބްނާނުން ކޮވިޑް-19އަށް ޕޮޒިޓިވްވި މީހުންގެ އަދަދު 494 އަށް އަރައެވެ.
