މިހާތަނަށް ވަކި ފަރުވާއެއް ދެނެގަނެވިފައި ނުވާ ކޮރޯނާވައިރަސް ޑިޒީޒް (ކޮވިޑް-19)ގެ ޝިކާރައަކަށްވެ، އެމެރިކާއިން މަރުވި މީހުންގެ އަދަދު 6088 އަށް އަރައިފިއެވެ.
އިއްޔެ 968 މަރު ރިޕޯޓްކޮށްފައި ވާއިރު، މިއަދު އެކަނިވެސް 18 މަރުގެ ރިޕޯޓެއް އެމެރިކާއިން ވަނީ ކޮށްފައެވެ. މިއާއެކު އެމެރިކާއަކީ މި ބަލީގައި 3 ވަނައަށް އެންމެ ގިނަ އަދަދަކަށް މީހުން މަރުވި ގައުމެވެ. އެމެރިކާގެ ކުރިން މި ލިސްޓުގައި އޮތީ 13915 މަރުގެ ކޭސް ރިޕޯޓްކުރި އިޓަލީވިލާތާ، 10348 މަރުގެ ކޭސް ރިޕޯޓްކުރި ސްޕެއިންއެވެ.
އެމެރިކާއިން ބަލިޖެހުނު މީހުންގެ ތަފާސް ހިސާބުތަކަށް ބަލާއިރު މި އަދަދު މިހާރު ވަނީ 245184 އަށް އަރާފައެވެ. މުޅި އެމެރިކާއަށް ބަލާއިރު ކޮވިޑް-19ގެ ނުރައްކާ އެންމެ ބޮޑުވެފައިވަނީ ނިއު ޔޯކް ސިޓީގައެވެ. އެ ސަރަހައްދުގައި ބާކީ ހުރީ 6 ދުވަހަށް ފުދޭ ވަރުގެ ވެންޓިލޭޓަރު ކަމަށް ގަވަރުނު އެންޑްރޫ ކޫމޯ ވަނީ ވިދާޅުވެފައެވެ. މެޝިންތައް ހުސްވާއިރުވެސް އާ ޝިޕްމަންޓް ނުލބިއްޖެނަމަ ބަލި މީހުންގެ މެދުގައި ވެންޓީލޭޓަރު ބަހަންޖެހިދާނެ ކަމަށްވެސް ކޫމޯ ވަނީ ވިދާޅުވެފައެވެ.
ކަންމިހެން އޮތްއިރު، އެމެރިކާގެ އިންފެކްޝަސް ޑިޒީޒަސް އެކްސްޕާޓް އަދި ކޮވިޑް-19އަށް ހާއްސަކޮށްގެން ވައިޓް ހައުސްއިން އެކުލަވާލި ޓާސްކްފޯސްގެ މެމްބަރު ޑރ އެންތަނީ ފޯޗީ ވަނީ މުޅި ގައުމު ލޮކްޑައުން ހާލަތަށް ގެންދަން ފެންނިވަޑައިގަންނަވާކަން ހާމަކުރައްވާފައެވެ.
