ރިސޯޓް ކޮންސްޓެންށް މޫފުށިން ކޮވިޑް-19 އަށް ޝައްކު ކުރެވޭ ދިވެއްސަކާއި ބިދޭސީއެއްގެ ސާމްޕަލް ނަގާ، ރަށް މޮނިޓަރިންއަށް ނަގާފައިވާ ކަމަށް ހެލްތް ޕްރޮޓްކްޝަން އެޖެންސީ(އެޗްޕީއޭ) ބުނެފިއެވެ.
މިހާރު ދަރުބާރުގޭގައި ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، މޫފުށި ރިސޯޓުން އެ ބައްޔަށް ޝައްކު ކުރެވޭ ދިވެއްސަކާއި ބިދޭސީއެއްގެ ސާމްޕަލް ނަގާ، ރަށް މޮނިޓަރިންއަށް ގެނެވިފައިވާ ކަމަށެވެ. މީގެ އިތުރުން ކެޔޮދޫވެސް ޝައްކު ކުރެވޭ ދިވެއްސަކު ފެނި އެ މީހާގެ ސާމްޕަލް ނެގުމަށް އެ ރަށް ވަނީ މޮނިޓަރިން އަށް ގެނެސްފައި ކަމަށް މަބްރޫކް ވިދާޅުވިއެވެ.
މި ބައްޔަށް ޝައްކު ކުރެވޭ މީހުންގެ ސާމްޕަލް ނަގަމުންދާއިރު، މިއަދު މިހާތަނަށް ޖުމްލަ 1288 ސާމްޕަލް ނަގާފައިވާ ކަމަށާއި އޭގެ ތެރެއިން 1261 ސާމްޕަލް ނެގެޓިވެ ވެފައިވާ ކަމަށާއި ނަތީޖާ ނުލިބި އެއް ސާމްޕަލެއްވާ ކަމަށް އެޗްޕީއޭއިން ބުނެއެވެ.
ރާއްޖޭގެ އައިސޮލޭޝަން ފެސިލިޓީތަކުގައި ޖުމްލަ 18 މީހަކު އެބަ ތިއްބެވެ. އެއީ ވެލިދޫ އައިލެންޑް ރިސޯޓުގައި 15 މީހަކާއި ދަރުމަވަންތަ ހޮސްޕިޓަލުގައި 3 މީހެކެވެ. އަދި ކަރަންޓީން ފެސިލިޓީތަކުގައި ޖުމްލަ 880 މީހުން ތިބި ކަމަށްވެސް އެޗްޕީއޭއިން ބުނެއެވެ.
ރާއްޖޭގެ ކޮވިޑް-19ގެ ހާލަތައް ބަލާއިރު، މިހާތަނަށް ޕޮޒިޓިވްވެފައި ވަނީ 19 މީހުންނެވެ. އޭގެ ތެރޭގައި ހިމެނެނީ 4 ދިވެއްސަކާއި، 15 ބިދޭސީންނެވެ. އަދި މި މީހުންގެ ތެރެއިން 13 ބިދޭސީއަކު ވަނީ މިހާތަނަށް މި ބަލިން ރަނގަޅުވެފައެވެ. މިހާރު ފަރުވާ ދެމުން ދަނީ 4 ދިވެހިންނަށެވެ. މީގެ އިތުރުން ރާއްޖޭގައި ކަރަންޓީނު ކުރުމަށް ފަހު އަނބުރާ ގައުމަށް ދިއުމަށް ހުއްދަ ދިން 2 މީހަކު، އިޓަލީއަށް ދިއުމަށް ފުރިފަހުން ޕޮޒިޓިވް ވެފައި ވާކަން ވަނީ އެނގިފައެވެ.
ރާއްޖެއިން މި ބައްޔަށް ޕޮޒިޓިވް ވެފައިވާ ބިދޭސީންނަކީ، ކުރެއްދޫ އައިލެންޑް ރިސޯޓުން 4 ފަތުރުވެރިންނާއި 1 ސްޓާފެއް އަދި އަނަންތަރާ އައިލެންޑް ރިސޯޓުން 2 ފަތުރުވެރިން، ކުރަމަތި އައިލެންޑް ރިސޯޓުގެ 2 ފަތުރުވެރިން، ސޭންޑީސް ބަތަލާ ރިސޯޓުން 2 ފަތުރުވެރިން އަދި އައިލެންޑް ސަފާރީން 4 ފަތުރުވެރިންނެވެ. އަދި މި ބައްޔަށް ޕޮޒިޓިވްވި ދިވެހިންނަކީ އިނގިރޭސި ވިލާތުން އައި ހަތަރު ދިވެހިންނެވެ.
