ވ. ކެޔޮދޫ އިން ކޮވިޑް-19އަށް ޝައްކު ކުރެވޭ ދިވެއްސަކު ފެނިގެން ރަށް މޮނިޓަރިންނަށް ނަގާފައިވާ ކަމަށް ކޮވިޑް19ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
މިހާރު ދަރުބާރުގޭގައި ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ، ކެޔޮދޫ އިން ޝައްކު ކުރެވޭ ދިވެއްސަކު ފެނި އެ މީހާގެ ސާމްޕަލް ނެގުމަށް ރަށް މޮނިޓަރިން އަށް ގެނެސްފައިވާ ކަމަށެވެ.
"ދަ ޕްރެސް"އަށް މައުލޫމާތު ލިބިފައިވާ ގޮތުގައި އެ މީހާ އަކީ އިނގިރޭސިވިލާތުން އައި މީހަކާއި ކޮންޓެކްޓް ވެފައިވާ މީހެކެވެ.
ކެޔޮދޫން ދިވެއްސެއްގެ ސާމްޕަލް ނަގާފައިވާއިރު، މިހާތަނަށް ޖުމްލަ 1288 ސާމްޕަލް ނަގާފައިވާ ކަމަށް އެޗްޕީއޭއިން ބުނެއެވެ. އަދި އޭގެ ތެރެއިން 1261 ސާމްޕަލް ނެގެޓިވެ ވެފައިވާ ކަމަށާއި ނަތީޖާ ނުލިބި އެއް ސާމްޕަލެއްވާ ކަމަށްވެސް އެޗްޕީއޭއިން ބުނެއެވެ.
ރާއްޖޭގެ ކޮވިޑް-19ގެ ހާލަތައް ބަލާއިރު، މިހާތަނަށް ޕޮޒިޓިވްވެފައި ވަނީ 19 މީހުންނެވެ. އޭގެ ތެރޭގައި ހިމެނެނީ 4 ދިވެއްސަކާއި، 15 ބިދޭސީންނެވެ. އަދި މި މީހުންގެ ތެރެއިން 13 ބިދޭސީއަކު ވަނީ މިހާތަނަށް މި ބަލިން ރަނގަޅުވެފައެވެ. މިހާރު ފަރުވާ ދެމުން ދަނީ 4 ދިވެހިންނަށެވެ. މީގެ އިތުރުން ރާއްޖޭގައި ކަރަންޓީނު ކުރުމަށް ފަހު އަނބުރާ ގައުމަށް ދިއުމަށް ހުއްދަ ދިން 2 މީހަކު، އިޓަލީއަށް ދިއުމަށް ފުރިފަހުން ޕޮޒިޓިވް ވެފައި ވާކަން ވަނީ އެނގިފައެވެ.
