މިދިޔަ މަހުގެ 14 އިން ފެށިގެން 19 ވަނަ ދުވަހުގެ ނިޔަލަށް އިނގިރޭސިވިލާތުން ރާއްޖެ އައި މީހުންގެ ތެރެއިން 45 މީހެއްގެ ސާމްޕަލް ނަގާފައިވާ ކަމަށް ކޮވިޑް19ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
މިރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ، މި ދިޔަ މަހުގެ 14 ވަނަ ދުވަހުން ފެށިގެން 19 ވަނަ ދުވަހުގެ ނިޔަލަށް އިނގިރޭސިވިލާތުން ރާއްޖެ އައި މީހުންގެ ތެރެއިން މިއަދާ ހަމައަށް 45 މީހެއްގެ ސާމްޕަލް ނަގާފައިވާ ކަމަށެވެ.
އެޗްޕީއޭއިން މަސައްކަތް ކުރަމުން ދަނީ ވީހާވެސް އަވަހަކަށް އެމުއްދަތުގައި އިނގިރޭސިވިލާތުން ރާއްޖެއައި އެންމެންގެ ސާމްޕަލް ނަގުމަށް ކަމަށާއި، ނަމަވެސް މިހާލަތުގައި ބައެއް ފަރާތްތަކުން ދޮގު މައުލޫމާތު ފަތުރަމުންދާ ކަމަށް މަބްރޫކް ވިދާޅުވިއެވެ. އެއީ ވަރަށް ދެރަކަމެއް ކަމަށް މަބުރޫކް ވިދާޅުވިއެވެ.
މިއަދު ސޯޝަލް މީޑިއާގައި މިކަމާ ގުޅޭގޮތުން ފަތުރާފައިވާ ވާހަކަތަކަށް އަލިއަޅުއްވާލައްވަމުން މަބްރޫކް ވިދާޅުވީ، މިދަނޑިވަޅުގައި އެއްވެސް މީހަކު ހަގީގަތް އޮޅުވާލައި ދޮގު މައުލޫމާތު ނުފެތުރުމަށެވެ. މި ހާލަތުގައި ރާއްޖެއިން ބޭރުން އަންނަ އެއްވެސް މީހަކާމެދު ތަފާތުގޮތަކަށް އަމަލުކޮށްފައި ނުވާނެ ކަމަށާއި ސަރުކާރުން ގާއިމް ކޮށްފައިވާ ކަރަންޓީން ފެސިލިޓީތަކުގައި ދައުލަތުގެ ވަޒީރުންގެ ދަރިންނާއި، އެނޫންވެސް އިސް މަގާމުތަކުގައި ތިއްބެވި އާއިލާތަކުގެ މެންބަރުންވެސް އެބަ ތިއްބެވި ކަމަށް މަބްރޫކް ވިދާޅުވިއެވެ.
މަބްރޫކް މިހެން ވިދާޅުވެފައި ވާއިރު، މިއަދު ރައްޔިތުން މަޖިލީހުގެ ރައީސް މުހައްމަދު ނަޝިދުވެސް ވަނީ ކޮވިޑް-19 އަށް ޓެސްޓު ކުރައްވާފައެވެ. ރައީސް ނަޝީދު އިނގިރޭސިވިލާތަށް ވަޑައިގަތުމަށް ފަހު ރާއްޖެ ވަޑައިގެން ފައިވަނީ މިދިޔަ މަހުގެ 15 ވަނަ ދުވަހުއެވެ.
މިހާތަނަށް ރާއްޖެއިން މި ބައްޔަށް 19 މީހުން ޕޮޒިޓިވް ވެފައި ވާއިރު މިހާރު މި ބައްޔަށް ރާއްޖޭގައި ފަރުވާ ދެމުން ދަނީ ޕޮޒިޓިވްވި 4 ދިވެހިންނަށެވެ. އެ ހަތަރު ދިވެހިންނަކީ އިނގިރޭސިވިލާތުން ރާއްޖެއަށް އައި ދިވެހިންނެވެ.
މަބްރޫކް ހާމަކުރަންވާނީ ތެދު ރައްޔިތުންތިބީ ވަރަށްބޮޑު ބިރުވެރިކަމެއްގަ ޚަބަރުލިބޭ އިނގިރޭސިވިލާތުގަ ކިޔަވަންތިބި މާލޭގެ ބޮޑަތިވޭފުޅުންގެ ދަރިން މާލެގެނައިމަ އެމީހުން އެކަހެރިވެގެން ގޭގައިނުތިބޭކަމަށް ޚަބަރުތައް އެބަފެތުރޭ މީކިހާވަރެއްގެ ކަބަރެއްކަން ސާފުކޮށްދިނުންއެދެން
މާލޭގެ މުއްސަނދި ބޮޑުންގެ ދަރީން ޔޫކޭގައިކިޔަވަންތިބެފަ މާލެ ގެނެސް ގެއަށްދޫކޮށްލިކަމުގެ ތުހުމަތު ސޯސަލްމީޑިއާގައި ދައުރުވަމުންއެބަދޭ މީ ތެދެއްކަމަށްވަނީނަމަ މީފޫނުބެއްދޭނެ ފަދަނުރައްކާތެރިކަމެއް މިހާރުވެސް ޕޮޒިޓިވްވި ދިވެހިން ނިސްބަތްވަނީ ޔޫކޭއަށް ގައުމުގެ އެއްމެހާރައްޔިތުންގެ ރައްކާތެރިކަންގެއްލިގެންދާނެ މިފަދަކަންކަން ނުހިފެހެއްޓޭކަމުގައި ވާނަމަ ދެންއަލުން ރައްކާތެރިކަން އިއާދައެއްނުކުރެވޭނެ. ވަﷲއަޢުލަމް.