ރާއްޖެއިން ކޮވިޑް-19 އަށް ޕޮޒިޓިވްވެ، އެ ބަލިން ރަނގަޅުވެފައިވާ 10 މީހަކު ޑިސްޗާޖު ކުރުމަށް ނިންމައިފިއެވެ.
މިކަން ހާމަ ކުރެއްވީ، ކޮވިޑް-19އާ ގުޅިގެން އެންމެފަހުގެ މައުލޫމާތު ދިނުމަށް މިހާރު ދަރުބާރުގޭގައި ކުރިއަށްދާ ނޫސްވެރިންގެ ބައްދަލުވުމުގައި އައިޖީއެމްއެޗްގެ ޑޮކްޓަރު، މޫސާ މުރާދެވެ. ޑރ. މުރާދު ވިދާޅުވީ، ރަނގަޅުވި މީހުންގެ ތެރެއިން ދަރުމަވަންތަ ހޮސްޕިޓަލުގައި އެޑްމިޓް ކުރި މީހުން ނޫން އެހެން އެންމެން ދޫކޮށްލުމަށް ޓެގް ޓީމުން ނިންމާފައިވާ ކަމަށެވެ.
ޑރ. މުރާދު ވިދާޅުވީ ވެލިދޫ އައިސޮލޭޝަންގައި މޮނިޓާ ކުރަމުން ދިޔަ މި 10 މީހުން މިހާރު އެޗްޕީއޭގެ ބެލުމުގެ ދަށުން ދޫކޮށްލާފައިވާ ކަމަށެވެ. ޑރ. މުރާދު ވިދާޅުވީ، މިހާރު އެޗްޕީއޭގެ ބެލުމުގެ ދަސުގައި ތިބީ ކޮވިޑް-19 އަށް ޕޮޒިޓީވްވެފައިވާ ދެ ދިވެހިން އެކަނި ކަމަށެވެ.
ޑރ. މުރާދު މިހެން ވިދާޅުވެފައި ވާއިރު، ރާއްޖެއިން ކޮވިޑް-19 އަށް ޕޮޒިޓިވްވެފައި ވަނީ 17 މީހުންނެވެ. އޭގެ ތެރޭގައި ހިމެނެނީ 2 ދިވެއްސަކާއި، 15 ބިދޭސީންނެވެ. އަދި މި މީހުންގެ ތެރެއިން 13 ބިދޭސީއަކު ވަނީ މިހާތަނަށް މި ބަލިން ރަނގަޅުވެފައެވެ. މީގެ އިތުރުން ރާއްޖޭގައި ކަރަންޓީނު ކުރުމަށް ފަހު އަނބުރާ ގައުމަށް ދިއުމަށް ހުއްދަ ދިން 2 މީހަކު، އިޓަލީއަށް ދިއުމަށް ފުރިފަހުން ޕޮޒިޓިވް ވެފައި ވާކަން ވަނީ އެނގިފައެވެ.
ރާއްޖެއިން މި ބައްޔަށް ޕޮޒިޓިވް ވެފައިވާ ބިދޭސީންނަކީ، ކުރެއްދޫ އައިލެންޑް ރިސޯޓުން 4 ފަތުރުވެރިންނާއި 1 ސްޓާފެއް އަދި އަނަންތަރާ އައިލެންޑް ރިސޯޓުން 2 ފަތުރުވެރިން، ކުރަމަތި އައިލެންޑް ރިސޯޓުގެ 2 ފަތުރުވެރިން، ސޭންޑީސް ބަތަލާ ރިސޯޓުން 2 ފަތުރުވެރިން އަދި އައިލެންޑް ސަފާރީން 4 ފަތުރުވެރިންނެވެ. އަދި މި ބައްޔަށް ޕޮޒިތިވްވި ދިވެހިންނަކީ އިނގިރޭސި ވިލާތުން އައި ދެ ދިވެހިންނެވެ.
