ޔުނައިޓެޑް އަރަބް އެމިރޭޓްސް (ޔޫއޭއީ) އިން ކޮވިޑް19 އަށް ޕޮޒިޓިވްވި ދިވެހި މީހާގެ ތަފްސީލް މިއަދު ލިބޭނެ ކަމަށް ކޮވިޑް19 ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
ކޮވިޑް19 އާއި ގުޅޭ އެންމެ ފަހުގެ މައުލޫމަތު ހިއްސާ ކުރުމަށް މިހާރު ދަރުބާރު ގޭގައި ކުރިއަށް ގެންދާ ނޫސްވެރިންގެ ބައްދަލު ވުމުގައި ވާހަކަ ދައްކަވަމުން މަބްރޫކް ވިދާޅުވީ، ޔޫއޭއީން ކޮވިޑް19 އަށް ދިވެއްސަކު ޕޮޒިޓިވްވި ކަމަށް ރިޕޯޓުކޮށްފައިވާ އިރު، އެކަން ދިވެހި ސަރުކާރަށް ކަށަވަރު ކޮށްދެވޭނީ އެގައުމުގެ ސަރުކާރުން ދިވެހި ސަރުކާރަށް ސްޓޭޓްމަންޓެއް ދިނުމުން ކަމަށާއި، އެ ސްޓޭޓްމަންޓް މިއަދު ލިބޭނެ ކަމަށެވެ.
މަބްރޫކް ވިދާޅުވީ، އެކަމާއި ގުޅިގެން ފޮރިން މިނިސްޓްރީން މައުލޫމަތު ހޯދުމަށް މަސައްކަތް ކުރަމުންދާ ކަމަށާއި، ނަމަވެސް އެ ފަރާތް ކޮވިޑް19 އަށް ޕޮޒިޓިވްވި ކަން ޔަގީންކޮށް ބުނެވޭނީ ޔޫއޭއީގެ ސަރުކާރުން އެކަމާ ގުޅޭ ރަސްމީ ލިޔެކިޔުން ތަކެއް ދިވެހި ސަރުކަރާއި ހިއްސާ ކުރުމުން ކަމަށެވެ. އަދި އެ ރަސްމީ ލިޔެކިޔުންތައް މިއަދު ލިބޭނެ ކަމަށް ފޮރިން މިނިސްޓަރު ވިދާޅުވި ކަމަށް މަބްރޫކް ވިދާޅުވިއެވެ.އަދި އެކަމާއި ބެހޭ ތަފްސީލް މިރޭ ދެއްވާނެ ކަމަށްވެސް މަބްރޫކް ވިދާޅުވިއެވެ.
ޔޫއޭއީގެ މިނިސްޓްރީ އޮފް ހެލްތް އެންޑް ޕްރިވެންޝަން އާ ހަވާލާދީ ހާލީޖް ޓައިމްސް އިން ބުނެފައި ވަނީ ކޮރޯނާ ވައިރަސް އަށް ދިވެއްސަކު ޕޮސިޓިވް ވެފައިވާ ކަމަށެވެ. މިކަމާއި ގުޅިގެން ފޮރިން މިނިސްޓްރީން ބުނީ އެ މައުލޫމާތު ލިބުމާއެކު އެމީހާއާ ބެހޭ މައުލޫމާތު ހިއްސާކޮށް ދިނުމަށް ކަމާބެހޭ ފަރާތްތަކުގައި އެދިފައިވާނެ ކަމަށެވެ.
ޔޫއޭއީގެ ހެލްތް އެންޑް ޕްރިވެންޝަން މިނިސްޓްރީއާ ހަވާލާދީ އެ ގައުމުގެ ނޫހެއް ކަމަށްވާ، ހާލީޖު ޓައިމްސް އިން ބުނީ، އެ ގައުމުން މިއަދު އަލަށް ފެނުނު ކޮރޯނާވައިރަހުގެ 50 ކޭހުގެ ތެރޭގައި ދިވެއްސަކު ހިމެނޭ ކަމަށެވެ. އޭގެ ތެރޭގައި ދިވެއްސަކު ހިމެނޭ ކަން ކަށަވަރު ކޮށްދީފައިވާ ނަމަވެސް އޭނާ އާ ބެހޭ އިތުރު އެއްވެސް މައުލޫމާތެއް ހާމަކޮށްފައެއް ނުވެއެވެ.
ހާލިޖް ޓައިމްސުން ބުނެފައި ވަނީ އެ ގައުމުން ޕޮސިޓިވް ވެފައިވާ ގިނަ މީހުންނަކީ މީގެ ކުރިން އެގައުމުން ކޮވިޑް19 އަށް ޕޮޒިޓިވް ވެފައިވާ މީހުންނާ ބައްދަލު ވެފައިވާ މީހުންނާއި، ވަރަށް ގާތުން އެކުގައި އުޅެފައިވާ މީހުން ކަމަށެވެ.
ޔޫއޭއީގައި ގިނަ އަދަދެއްގެ ދިވެހިން ވަޒީފާ އަދާކުރަމުން ދާއިރު، ގިނަ މީހުން ވަޒީފާ އަދާކުރަމުން ދަނީ އޭވިއޭޝަން ދާއިރާގައެވެ. އޭގެ ތެރޭގައި ޕައިލެޓުންނާއި، އެއާކްރާފްޓް އިންޖިނިއަރުންނާއި، އޭވިއޭޝަން ދާއިރާގެ އެހެން ވަޒީފާތައް އަދާކުރާ މީހުން ހިމެނެއެވެ. މިއަދު ދިވެއްސަކު ޕޮޒިޓިވް ވެފައިވާ ކަމަށް އެ ގައުމުން ކަށަވަރުކޮށްދީފައި ވާއިރު، މިއަދު އެގައުމުން ޕޮޒިޓިވް ވެފައިވާ ދިވެއްސަކީ ޔޫއޭއީގައި ވަޒީފާ އަދާކުރާ ދިވެއްސެއް ކަމެއް ނުވަތަ ނޫންކަމެއް އަދި ނޭނގެއެވެ.
