ކޮރޯނާވައިރަސް ޑިޒީޒް (ކޮވިޑް-19)ގެ ބިރުވެރިކަމުގެ ތެރޭގައި މުޅި ދުނިޔެ އޮތްއިރު، މި ހަނގުރާމާގައި ފަގީރު ގައުމުތަކަށް ބޭނުންވާ އެހީތެރިކަން ފޯރުކޮށްދިނުމަށް 2 ބިލިއަން ޑޮލަރުގެ ބައިނަލްއަގުވާމީ އިންސާނީ އެހީގެ ފަންޑެއް، އދގެ ސެކްރެޓަރީ ޖެނެރަލް އެންޓޯނިއޯ ގުޓެރޭޒް އިފްތިތާހު ކުރައްވައިފިއެވެ.
ކޮރޯނާވައިރަސް ޑިޒީޒްގެ ކޭސްތައް އެންމެ ފުރަތަމަ ފެންނަން ފެށި ޗައިނާއަށްވުރެ އިޓަލީވިލާތާ ސްޕެއިންއިން މަރުވި މީހުންގެ އަދަދު މައްޗަށް އަރާފައިވާ މި ދަނޑިވަޅުގައި، ގުޓެރޭޒް ވިދާޅުވީ، ކޮވިޑް-19އަކީ މުޅި އިންސާނިއްޔަތަށް ކުރިމަތިވެފައިވާ ނުރައްކަލެއް ކަމަށާ، މި ނުރައްކަލާ އިންސާނީ ދަރިފަސްކޮޅު ކުރިމަތިލާންޖެހޭނީ އެންމެން އެކުގައި ކަމަށެވެ.
މިހާތަނަށް ބަލިޖެހުނު 471060 މީހުންނަށް ބަލާއިރު 16 ޕަސެންޓް މީހުންގެ ފުރާނަވަނީ ގެއްލިފައެވެ. 114218 މީހަކު ފަރުވާ ހޯދައިގެން ހޮސްޕިޓަލުތަކުން ދޫކޮށްލާފައިވާއިރު، 14792 މީހެއްގެ ހާލު ސީރިއަސް ކަމަށް ރެކޯޑްތަކުން ދައްކައެވެ.
