ކޮންސްޓްރަކްޝަން މަސައްކަތް ކުރާ ބިދޭސީންގެ ފަރާތުން ކޮވިޑް19ގެ އެއްވެސް އަލާމާތެއް ފެންނަނަ ނަމަ އެ މުވައްޒަފުން މަސައްކަތަށް ނުނެރުމަށް މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) އިން އިލްތިމާސް ކޮށްފިއެވެ.
މިކަމާއި ގުޅިގެން މަސީ އިން ބުނީ، ދުނިޔޭގެ ހަލުވިކަމާއެކު ފެތުރެމުންދާ ކޮވިޑް19 ރާއްޖެއިން ފެނުމާއި ގުޅިގެން، ކޮންސްޓްރަކްޝަން އިންޑަސްޓްރީ އަކީ ވަރަށްގިނަ އަދަދެއްގެ ބިދޭސީން ގެންގުޅޭ އަދި ގްރޫޕްތަކަކަށް ބަހާލައިގެން އެމީހުންގެ ނިދުމާއި ކެއުން ހަމަޖައްސާފައިވާ ބަޔަކަށް ވުމާއެކު ބިދޭސީންނާއި، ދިވެހި މުވައްޒަފުން ވެސް ކެއްސާ ކިނބިހި އަޅާ ނުވަތަ ހުން އަންނަ ނަމަ މި ދުވަސްކޮޅު މަސައްކަތަށް ނުނެރުމަށް އިލްތިމާސް ކުރާ ކަމަށެވެ.
އަދި ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ ލަފަޔާއި އިރުޝާދާއި އެއްގޮތަށް ކޮންސްޓްރަކްޝަން ސައިޓްތަކުގެ ކަންކަން އިންތިޒާމް ކުރުމަށާއި، ސައިބޯނި ލައިގެން އަތް ދޮވެވޭނޭ އިންތިޒާމްތައް ސައިޓްތަކުގައި ހަމަޖައްސައި، މާސްކާއި އެފަދަ ތަކެތި މުވައްޒަފުންނަށް ފޯރުކޮށްދީ ބޭނުންކުރެވޭ ޓިޝޫ ރައްކާތެރި ކަމާއެކު ނައްތާލެވޭނެ އިންތިޒާމްތައް ހަމަޖައްސައި ހާއްސަ ފިޔަވަޅުތަކެއް އެޅުމަށް އެޅުމަށް މަސީން ވަނީ ކޮންސްޓްރަކްޝަން ކުންފުނިތަކަށް އަންގާފައެވެ.
މަސައްކަތު ސައިޓާއި މީހުން އުޅޭ ސަރަހައްދު ތަކާއި، އާއްމު ތަންތަނަށާއި، އެހެނިހެން ތަންތަނަށް ކުޅު ޖެހުންމަނާ ކުރުމާއި، ކެއްސައި ކިނބިހި އަޅާނަމަ ޓިޝޫ އަކުން އަނގައާއި ނޭފަތް ނިވާކުރުމަށް ވެސް މުވައްޒަފުންނަށް އެންގެވުން މަސީ އިން ވަނީ ކުންފުނިތަކަށް އިލްތިމާސް ކޮށްފައެވެ.
މަސީން ބުނީ މިބަލިން އަރައިގަތުމަށް އެންމެން އެކީ އެއް އަމާޒެއްގައި ދިވެހި ސަރުކާރަށް އެއްބާރުލުން ދީ، ކޮވިޑް19 ޓާސްކްފޯސް އާއި، އެޗްޕީއޭގެ އިރުޝާދާއި އެއްގޮތަށް އަމަލުކުރަމުން ގެންދިއުމަށް ނަސޭހަތްތެރިވާ ކަމަށެވެ.
ރާއްޖޭގައި ކޮވިޑް19 ފެތުރުން ކޮންޓްރޯލް ކުރުމަށްޓަކައި ސަރުކަރުންވަނީ އެކި ފިޔަވަޅުތައް އަޅާފައެވެ. އެގޮތުން އެމްޑަބްލިއުއެސްސީ އިންވެސް ވަނީ މާލޭގެ ތިން ސަރަހައްދެއްގައި އަތް ދޮވެވޭނެހެން ސިންކުތަކެއް ބަހައްޓާފައެވެ. މާލޭގެ އިތުރުން އެހެން ރަށް ރަށުގައިވެސް އާންމު ތަންތަނުގައި އަތް ދޮންނަ ސިންކުތައް ކައުންސިލުތަކުންނާއި އާންމުން އިސްނަގައިގެން ވަނީ ބަހައްޓާފައެވެ. އަދި މާލެއާއި، ހުޅުލޭގެ މަގުތައް ޑިސްއިންފެކްޓް ކުރުމުގެ މަސައްކަތްވެސް ހިމެނެއެވެ. އޭގެއިތުރުން ފަތުރުވެރިން ނާއި އަދި މީހުންވެސް އެއް ރަށުން އަނެއް ރަށަށް ދަތުރު ކުރުން މަނާ ކުރުމާއި، މާލޭގައި ކަބޯތަކެތީގެ ހިދުމަތްދޭ ތަންތަން ބަންދު ކުރުމާއި، ރާއްޖޭގެ ހުރިހާ ސްކޫލް އަދި ޔުނިވާސިޓީތަކާއި ކޮލެޖުތައްވެސް ބަންދުކުރުން ހިމެނެއެވެ.
