ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ނުރައްކާ އެންމެ ބޮޑުވެފައިވާ އިޓަލީވިލާތުގައި މި ބަލި ޖެހިގެން މަރުވާ މީހުންގެ އަދަދު 48 ގަޑިއިރު ވަންދެން ދަށަށް ދިއުމަށްފަހު އަނެއްކާވެސް، އިތުރުވާން ފަށާފައިވާކަމަށް ރެކޯޑްތަކުން ދައްކައިފިއެވެ.
24 ގަޑިއިރުގެ ތެރޭގައި މަރުވި 743 މީހުންނާއެކު އިޓަލީވިލާތުން މަރުވި މީހުންގެ އަދަދު މިހާރު ވަނީ 6820 އަށް އަރާފައެވެ. ޖޯން ހޮޕްކިންސް ޔުނިވާސިޓީގެ ރެކޯޑްތަކަށް ބަލާއިރު އިޓަލީވިލާތުން މަރުވި މީހުންގެ އަދަދު މިހާރު ވަނީ 7000އަށްވުރެ މައްޗަށް އަރާފައެވެ.
ފެބުރުވަރީ މަހުގެ 21 ވަނަ ދުވަހު އިޓަލީވިލާތުގައި ކޮވިޑް-19ގެ ބަލިމަޑުކަން ފެންނަން ފެށިފަހުން، އަންގާރަ ދުވަހަކީ އެގައުމުން 2 ވަނައަށް އެންމެ ގިނަ އަދަދަކަށް މީހުން މަރުވި ދުވަސްވެމެއެވެ. މިއާއެކު އިޓަލީވިލާތުގައި އޮތް ބަލިމަޑުކަން ހަމައަކަށް އެޅެމުންދާކަމަށް ކުރެވުނީ ކުށް ހީއެއްކަމަށް ގިނަ ބަޔަކު ވަނި ބުނަން ފަށާފައެވެ.
މުޅި ގައުމު ލޮކްޑައުން ހާލަތުގައި އޮތްއިރު، ކަމާބެހޭ ފަރާތްތަކުން އަންގާ އެންގުންތަކަށް ކިޔަމަން ނުވާ ފަރާތްތަކުން ދައްކަން ޖެހޭ ޖޫރިމަނާވެސް، އިޓަލީވިލާތުގެ ބޮޑުވަޒީރު ޖޫޒެއްޕެ ކޯންތެ ވަނީ، ގާތްގަނޑަކަށް 3000 އެއްހާ ޑޮލަރަށް ބޮޑު ކުރައްވާފައެވެ.
ކަންމިހެން އޮތްއިރު، އިޓަލީވިލާތުގައި ފެތުރެމުންދަނީ ކޮވިޑް-19އިން އުފެދުނު ވަރުގަދަ ވައިރަހެއް ކަމަށް ބުނާ ޚަބަރުތަކެއްވެސް ބައެއް މީޑިއާގައި ދަނީ ދައުރުވަމުންނެވެ. ނަމަވެސް މިކަމާ ބެހޭ ގޮތުން ރަސްމީ އެއްވެސް ފަރާތަކުން އަދި އެއްޗެއް ބުނެފައެއް ނުވެއެވެ.
