ކޮރޯނާވައިރަސް ޑިޒީޒް (ކޮވިޑް-19)އަށް ޕޮޒިޓިވްވާ މީހުންގެ އަދަދު ހަލުވިކަމާއެކު އިތުރުވަމުން އަންނަ އެމެރިކާއަކީ، ދުނިޔޭގެ ނިސްބަތުން ބަލާއިރު މި ބަލިމަޑުކަމުގެ އެޕިސެންޓާ ނުވަތަ އެންމެ ނުރައްކާ ދަރަޖާގައި އޮތް ގައުމަށް ވުމުގެ ފުރުސަތު އެބައޮތްކަމަށް ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ)ގެ ތަރުޖަމާނެއް ކަމަށްވާ މާގްރެޓް ހެރިސް އިންޒާރު ކުރައްވައިފިއެވެ.
ކޮވިޑް-19ގެ ނުރައްކާ މިވަގުތު އެންމެ ބޮޑުވެފައިވަނީ ވިލާތު ބައްރުގައި ކަމަށް ޑަބްލިއު.އެޗް.އޯއިން މިހާރު ކަނޑައަޅާފައި އޮތް ނަމަވެސް، ކޮވިޑް-19ގެ އެޕިސެންޓާ އެމެރިކާއަށް ބަދަލުވެދާނެތޯ ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން ތަރުޖަމާނު ވިދާޅުވީ، އެމެރިކާއިން ކޮވިޑް-19އަށް ޕޮޒިޓިވްވާ މީހުންގެ އަދަދު އިތުރުވަމުން އަންނަނީ ހަލުވި ދުވެއްޔެއްގައި ކަމަށާ، އެޕިސެންޓާއަށްވުމުގެ ފުރުސަތު އެބައޮތް ކަމަށެވެ. ނަމަވެސް އެއީ އަދުގެ ހާލަތު ކަމަށް ބުނެވެން ނެތްކަމަށާ، ދެންނެވެން އޮތްހާވެސް އެއްޗަކީ އެފަދަ ހާލަތަކަށް ދިއުމުގެ ފުރުސަތު އެބައޮތް ކަންކަމަށްވެސް އޭނާވަނީ ފާހަގަކުރައްވާފައެވެ.
މިދިޔަ އަހަރުގެ ފަހުކޮޅު ޗައިނާއިން ފުރަތަމަ ފެނުނު ކޮވިޑް-19ގެ ކޭސްތައް އެންމެ ގިނައިން ފެނި، އެ ބަލީގައި އެންމެ ގިނަ ބަޔަކު މަރުވަމުން މިހާރު ދަނީ ވިލާތު ބައްރާ އެމެރިކާއިންނެވެ.
