ސަފާރީއަކުން ބިދޭސީއެއްގެ ސާމްޕަލް ނަގައިފައިވާ ކަމަށް ކޮވިޑް19 ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެއެވެ.
ކޮވިޑް19 އާއި ގުޅޭ އެންމެ ފަހުގެ މައުލޫމާތު ހިއްސާ ކުރުމަށް ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ، "މަހާ" ނަމަކަށް ކިޔާ ސަފާރީއަކުން ބިދޭސީއެއްގެ ސާމްޕަލް ނަގާފައިވާ ކަމަށެވެ. އެ ސަފަރީގައި ޖުމްލަ ތިން ބިދޭސިއަކު ތިބި ކަމަށްވެސް މަބްރޫކް ވިދާޅުވިއެވެ.
މާހަ ސަފާރީ މޮނިޓަރިންގެ ހާލަތަށް ގެނެސްފައިވާއިރު، މިއީ މޮނިޓަރިންގެ ހާލަތަށް ގެނައި ތިންވަނަ ސަފާރީއެވެ. މީގެކުރިން އައިލެންޑް ސަފާރީ އާއި އީކުއޭޓާ ސަފާރީ ވަނީ މޮނިޓަރިންގެ ހާލަތަށް ގެނެސްފައެވެ. މީގެތެރެއިން އައިލެންޑް ސަފާރީގެ ދެ މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. އެ ސަފާރީގެ އެންމެންވެސް ވަނީ އެކަހެރިކޮށްފައެވެ.
މިއަދާ ހަމައަށް 5 ދުވަސް ވެފައިވާ އިރު އަދިވެސް އީކުއޭޓާ ސަފާރީ ވަނީ މޮނިޓަރިންގެ ހާލަތުގައެވެ. އެ ސަފާރީން ދިވެއްސެއްގެ ގައިން ކޮވިޑް-19އަށް ޝައްކު ކުރެވޭ އަލާމާތްތައް ފެނިގެން ވަނީ ޓެސްޓުކުރަން ފަށާފައެވެ.
މިހާތަނަށް ރާއްޖެއިން މި ބައްޔަށް ޕޮޒިޓިވް ވެފައި ވަނީ ހުސް ބިދޭސީންނެވެ. ޖުމްލަ 13 މީހުން ޕޮޒިޓިވް ވެފައިވާ އިރު 5 މީހަކު ވަނީ ރަނގަޅު ވެފައެވެ. މިހާރު މި ބައްޔަށް ފަރުވާ ހޯދަމުންދާ 8 ފަރާތެއް ހުރި އިރު އެމީހުންގެ ހާލު ރަނގަޅު ކަމަށް އެޗްޕީއޭއިން ބުނެއެވެ.
