ހަކުރާހުރާ ކޭސްއާ ގުޅިގެން ގިނަ ބަޔަކު އައިސޮލޭޓްވާން އަންގައިފިއެވެ. އޭގެ ތެރޭގައި ކަސްޓަމްސްގެ 17 މުވައްޒަފަކާއި އެމްއޭސީއެލްގެ 41 މުވައްޒަފަކާއި އިމިގްރޭޝަންގެ އެކަކާއި ޓީއެމްއޭގެ 3 ސްޓާފެއް ހިމެނެއެވެ. އެނގިފައިވާ ގޮތުގައި މި މީހުންނަކީ ހަކުރާ ހުރާ ކޭސްގައި ހިމެނޭ މީހަކާ އެއާޕޯޓުން ކޮންޓެކްޓް ވެފައިވާ މީހުންނެވެ.
ކޮވިޑް19 އާއި ގުޅޭ އެންމެ ފަހުގެ މައުލޫމާތު ހިއްސާ ކުރުމަށް ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ، ސިނަމަން ހަކުރާ ހުރާގެ ސާމްޕަލްގެ ނަތީޖާ ނުލިބޭތީ އާއި މި ކޭސްއާ ގުޅިގެން އައިސޮލޭޝަނަށް ދިއުމަށް ގިނަ ބަޔަކަށް އެންގިފައި ވާ ކަމަށެވެ.
މިހާތަަނަށް ރާއްޖޭގައި 13 މީހަކަށް މިބަލި ޖެހިގެން ފެނިފައި ވާ އިރު 5 މީހަކު ވަނީ ރަނގަޅު ވެފައެވެ. މިހާތަނަށް ރާއްޖެއިން މި ބަލި ޖެހިފައިވަނީ ހުސް ބިދޭސީންނަށެވެ. ނަމަވެސް މިއާއި ގުޅިގެން އައިޖީއެމްއެޗްގެ ޑޮކްޓަރު މުހައްމަދް އިސްމައީލް ވިދާޅުވީ ރާއްޖޭގައި ކޮވިޑް19 އަށް ޕޮޒިޓިވްވި ފަސް މީހަކު އެ ބަލިން ރަނގަޅުވި ނަމަވެސް، އޭގެ މާނައަކީ ރާއްޖެއަށް މި ކަމުން އޮތް ރިސްކް ކުޑަ ވެގެން ދިއުން ނޫން ކަމަށެވެ. އެހެންކަމުން އަދިވެސް ގޭގަ އެކަހެރިވެ، ސޯޝަލް ޑިސްޓޭންސް ވުން ހުއްޓާލަންވީ ކީ ނޫން ކަމަށާއި، ސަބަބަކީ ރާއްޖެއިން ބޭރުން އަދިވެސް މީހުން އަންނަ ކަމަށާއި، އަދި އެއާ އެކީގަ ބަލި މީހުންނަށް އަދިވެސް ފަރުވާ ދެމުންދާ ކަމަށެވެ. އަދި ކޮންމެ ބަލި މީހެއް ފަރާތުންވެސް އެ ބަލި ފެތުރުމުގެ ފުރުސަތު ބޮޑު ކަމަށް ޑރ. އިސްމައީލް ވިދާޅުވިއެވެ.
