ދުނިޔޭގެ އެންމެ ދެކުނު ތަނޑި ނުވަތަ އެންޓާޓިކާ ފިޔަވާ އެހެން ހުރިހާ ބައްރަކަށް ފެތުރިފައިވާ ކޮރޯނާވައިރަސް ޑިޒީޒް (ކޮވިޑް-19)ގެ ޝިކާރައަކަށްވެ މަރުވި މީހުންގެ އަދަދު، މިއަދު ހެނދުނު 07:16 ހިނގުމުގެ ނިޔަލަށް، 14674 އަށް އަރައިފިއެވެ.
ދުނިޔޭގައި އޮތް 195 ގައުމުގެ ތެރެއިން 192ގައުމަކާ ސަރަހައްދަކުން ކޮވިޑް-19 ފެނިގެން މިހާރު ވަނީ ރިޕޯޓްކޮށްފައެވެ. މި 192 ގައުމާ، ޖަޕާނުގައި ބަނދަރުކޮށްފައިވާ 'ޑައިމަންޑް ޕްރިންސަސް' ކުރޫޒްލައިނާގެ ކޭސްތައް ހިމަނައިގެން، ދުނިޔޭގެ އެކި ކަންކޮޅުތަކުން ކޮވިޑް-19އަށް ޕޮޒިޓިވްވި މީހުންގެ އަދަދު މިހާރު ވަނީ 337442އަށް އަރާފައެވެ. މީގެ ތެރެއިން 5 ޕަސެންޓް، ނުވަތަ 10553 މީހެއްގެ ހާލު މިވަގުތު ސީރިއަސް/ކުރިޓިކަލް ކަމަށް ޚަބަރު ލިބެއެވެ.
އިންފެކްޓްވިކަމަށް ރެކޯޑްކޮށްފައިވާ މީހުންގެ ތެރެއިން 87 ޕަސެންޓް، ނުވަތަ 98627 މީހަކު ވަނީ ފަރުވާ ހޯދައިގެން ބަލިން ރަނގަޅުވެފައެވެ.
ކޮވިޑް-19ގެ ނުރައްކާ އެންމެ ބޮޑުވެފައިވާ އިޓަލީވިލާތަށް ބަލާއިރު ފާއިތުވީ 24 ގަޑިއިރެއްހާއިރު ތެރޭގައި އެގައުމުން 651 މަރު ރިޕޯޓްކޮށްފައިވާއިރު މި ބަލީގައި އިޓަލީވިލާތުން މަރުވި މީހުންގެ އަދަދު މިހާރު މިވަނީ 5476 އަށް އަރާފައެވެ. އެއީ މިދިޔަ އަހަރުގެ ފަހުކޮޅު މިބަލި އެންމެ ފުރަތަމަ ފެންނަން ފެށި ޗައިނާއިން މަރުވި މީހުންގެ އަދަދަށްވުރެ ބޮޑުތަން އިތުރު އަދަދެކެވެ. ޗައިނާއިން މި ބަލި ޖެހިގެން މިހާތަނަށް މަރުވެފައިވަނީ 3270 މީހުންނެވެ.
ޗައިނާއިން 81093 މީހަކު މި ވައިރަހަށް ޕޮޒިޓިވްވިއިރު 72703 މީހަކު ވަނީ ފަރުވާ ހޯދައިގެން ރަނގަޅުވެފައެވެ. އިޓަލީވިލާތުން ކުޑަ ދުވަސްކޮޅެއްގެ ތެރޭގައި 59138 މީހަކު މި ވައިރަހަށް ޕޮޒިޓިވްވިއިރު، 7024 މީހަކު ވަނީ ރަނގަޅުވެފައެވެ. އާބާދީގެ ނިސްބަތުން ބަލާއިރު ޗައިނާގައި ކޮންމެ 1 މިލިއަން މީހަކުން 56 މީހަކު ކޮވިޑް-19ގެ ޝިކާރައަކަށްވެފައިވާއިރު، އިޓަލީވިލާތުގައި ކޮންމެ 1 މިލިއަން މީހަކުން 978 މީހަކު ވަނީ ކޮވިޑް-19ގެ ޝިކާރައަކަށްވެފައެވެ.
މެދިއިރުމަތީގެ މަސްރަހު ބަލީގެ ނުރައްކާ އެންމެ ބޮޑުވެފައިވާ އީރާނަށް ބަލާއިރު 21638 މީހަކު ވަނީ ކޮވިޑް-19އަށް ޕޮޒިޓިވްވެފައެވެ. ފާއިތުވީ 24 ގަޑިއިރެއްހާއިރު ތެރޭގައި އެކަނިވެސް 1028 ކޭސްއެއް ވަނީ ޕޮޒިޓިވްވެފައެވެ. މިވަގުތުގެ ތެރޭގައި ރެކޯޑްކުރެވުނު 129 މަރާއެކު އީރާނުން މި ބަލީގައި މަރުވި މީހުންގެ ޖުމުލަ އަދަދު 1685އަށް ވަނީ އަރާފައެވެ.
ދިވެހިން އާންމުކޮށް ދަތުރުކޮށް އުޅޭ މަންޒިލްތަކުގެ ތެރެއިން މެލޭޝިއާއަށް ބަލާއިރު 1306 މީހަކު ޕޮޒިޓިވްވެފައިވާއިރު 10 މީހެއްގެ ފުރާނަ ވަނީ ގެއްލިފައެވެ. އަވަށްޓެރި އިންޑިއާއިން 396 މީހަކު ޕޮޒިޓިވްވިއިރު 7 މީހެއްގެ ފުރާނަވަނީ ގެއްލިފައެވެ. އެންމެ ގިނަ އަދަދަކަށް ދިވެހިން ވަޒަންވެރިވެގެން ދިރިއުޅެމުންދާ ސްރީލަންކާގެ ހާލަތަށް ބަލާއިރު، 82 ކޭސްއެއް ވަނީ ޕޮޒިޓިވްވެފައެވެ. ލަންކާއިން އަދި މިހާތަނަށް މީހެއްގެ ފުރާނަ ގެއްލިފައިވާކަމަށް ރިޕޯޓެއް ނުކުރެއެވެ.
ދެކުނު އޭޝިއާ ސަރަހައްދުގައި ކޮވިޑް-19ގެ ނުރައްކާ އެންމެ ބޮޑުވެފައިވަނީ ޕާކިސްތާނުގައެވެ. ޕާކިސްތާނުން 776 މީހަކު ޕޮޒިޓިވްވެފައިވާއިރު، 5 މީހެއްގެ ފުރާނަ ގެއްލިފައިވާކަމަށް ވަނީ ރިޕޯޓްކޮށްފައެވެ.
ކޮވިޑް-19ގެ ނުރައްކަލަށް ކުޑަނަމަވެސް ލުޔެއް ލިބިފައި ނުވާއިރު، މި ބައްޔަށް ކަށަވަރު ވެކްސިންއެއް އަދި ފަރުވާއެއްވެސް މިހާތަނަށް ހޯދިފައެއް ނުވެއެވެ.
