ކުރީގެ މެންޗެސްޓާ ޔުނައިޓެޑްގެ މިޑްފީލްޑަރު މަރުއޯނޭ ފެލައިނީ ކޮވިޑް19 އަށް ޕޮޒިޓިވް ވެފައި ވާއިރު އޭނާ އާ ބައްދަލުވެ ކޮންޓެކްޓްވި ފަރާތްތަކުން އަވަހަށް ރިޕޯޓު ކުރުމަށް ކޮވިޑް19 ގެ ތަރުޖަމާނު މުހައްމަދު މަބްރޫކް އަޒީޒް ގޮވާލައިފިއެވެ.
ކޮވިޑް19 އާއި ގުޅޭ އެންމެ ފަހުގެ މައުލޫމާތު ހިއްސާ ކުރުމަށް މިހާރު ދަރުބާރުގޭގައި ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބަރޫކް ވިދާޅުވީ، ފުޓްބޯޅަ ކުޅުންތެރިޔާ މައުރޯނޭ ފެލައިނީއާ ކޮންޓެކްޓުވި މީހުން މާލެ ސަރަހައްދުގައި ތިބެދާނެ ކަމަށާއި އެއްވެސް ތަނަކުން އޭނާ އާއި ބައްދަލުވި މީހަކު ހުރިނަމަ އެކަން ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ 1676 އަށް ގުޅުމަށް އެދޭ ކަމަށެވެ.
މަބްރޫކް ވިދާޅުވީ ފެލައިނީ އަކީ އެއާޕޯޓަށް ދަތުރު ކުރި މީހަކަށް ވާތީ މާލެ ސަރަހައްދުންވެސް ބައްދަލުވި މީހުން ތިބެދާނެ ކަމަށާއި، އެހެންކަމުން އަމިއްލަ ރައްކާތެރި ކަމަށް އިސްކަންދީ މައުލޫމާތު ފޯރުކޮށް ދިނުމަށް އެދިވަޑައިގަންނަވާ ކަމަށެވެ.
އެ ކުޅުންތެރިޔާ ރާއްޖެއަށް ޗުއްޓީ ހޭދަކުރަން އައިސްފައި ވަނީ މާޗް މަހުގެ 8 ވަނަ ދުވަހެވެ. އޭނާ ރާއްޖެއިން އަނބުރާ ފުރައިގެން ދިޔައީ މާޗް މަހުގެ 12 ވަނަ ދުވަހެވެ. އަދި އޭނާ ކޮވިޑް19 އަށް ޕޮޒިޓިވް ވެފައިވަނީ މި މަހުގެ 20 ވަނަ ދުވަހު ކަމަށް މަބްރޫކް ވަނީ މީގެ ކުރިން ވިދާޅުވެފައެވެ. އަދި އޭނާ ކޮވިޑް19 އަށް ޕޮޒިޓިވް ވެފައިވާ ކަމަށް ބެލެވެނީ ރާއްޖެއިން ދަތުރުކޮށް ޗައިނާއަށް ދިޔަ ފަހުން ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ އޭނާ ޕޮޒިޓިވް ވީ ރާއްޖެއިން ފުރައިގެން ދިޔަ ފަހުން ކަމަށް ވެލުނު ކަމަށް ވިޔަސް އެކަން އިތުރަށް ބަލަމުން ގެންދަވާ ކަމަށެވެ. އަދި ކޮންޓެކްޓް ޓްރޭސިންގެ މަސައްކަތް ކުރިއަށް ގެންދަވާ ކަމަށާއި، އޭނާއާ ގާތް ކޮންޓެކްޓެއް ގޮތަށް ފާހަގަ ކުރެވުނު ފަރާތެއް މިހާރުވެސް ވަނީ އައިސޮލޭޝަނަށް ގެންދިފައި ކަމަށް މަބްރޫކް ވިދާޅުވިއެވެ.
ރާއްޖެއިން މިހާތަނަށް 13 މީހަކު ޕޮޒިޓިވް ވެފައިވާއިރު، އޭގެތެރެއިން ތިން މީހަކު ރަނގަޅު ވެފައިވާކަން ސަރުކާރުން ވަނީ ހާމަކޮށްފައެވެ. މި ބަލިން ރަނގަޅުވެފައިވާ ތިން މީހުންނަކީ ސޭންޑީސް ބަތަލާ ރިސޯޓުން ބައްޔަށް ޕޮޒިޓިވްވި އިޓަލީގެ ދެމަފިރިންގެ އިތުރުން ކުރެއްދޫ އިން ޕޮޒިޓިވްވި މީހެކެވެ.
ބަލާތި ތި ފެލަނީ ދަންނަ މީހަކުވެސް ނުހުންނާނެ.