އަނަންތަރާ ރިސޯޓުން ކޮވިޑް19 އަށް ޝައްކު ކުރެވޭ އަލަމާތްތައް ހުރެގެން އެއް ބިދޭސީއަކާއި ދެ ދިވެހިންގެ ސާމްޕަލް ނެގުމުގެ މަސައްކަތް ކުރަމުންދާ ކަމަށް ކޮވިޑް19 ގެ ތަރުޖަމާން މުހައްމަދް މަބްރޫކް އަޒިޒް ވިދާޅުވެއްޖެއެވެ.
ކޮވިޑް19 އާއި ގުޅޭ އެންމެ ފަހުގެ މައުލޫމާތު ހިއްސާ ކުރުމަށް ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބަރޫކް ވިދާޅުވީ، މި ތިން މީހުންގެ ސާމްޕަލް ނަގަިއ ކޮވިޑް19 އަށް ޓެސްޓު ކުރުމުގެ މަސައްކަތް ކުރަމުންދާތީ އެ ރަށް މޮނީޓަރިންގެ ހާލަތަށް ގެނެވިފައިވާ ކަމަށެވެ.
އަނަންތަރާއިން ތިން މީހެއްގެ ސާމްޕަލް ނެގުމުގެ މަސައްކަތް ކުރަމުން އަންނައިރުު ރާއްޖެއިން ކޮވިޑް19 އަށް ޕޮޒިޓިވްވި މީހުންގެ ތެރެއިން އަނަންތަރާއިން ވެސް ޕޮޒިޓިވްވި ދެ މީހަކު ހިމެނެއެވެ. އަދި އެމީހާ ކޮވިޑް19 އަށް ޕޮޒިޓިވްވުމާއި ގުޅިގެން އެ ރިސޯޓުން އެތައް ބައެއް މީގެކުރިން ވަނީ ކޮންޓެކްޓު ޓްރޭސްވެފައެވެ. މީގެއިތުރުން އެ ދެ މީހުންނާއި ޑައިރެކްޓު ކޮންޓެކްޓުވި ދިވެއްސަކުވެސް ދާދިފަހުން ޓެސްޓުކުރިއެވެ. ނަމަވެސް އެ ދިވެހި މީހާ އެ ބައްޔަށް ނެގެޓިވް ވެފައިވާ ކަމަށް ސަރުކާރުން ވަނީ ބުނެފައެވެ.
މުޅި ރާއްޖެއިން ކޮވިޑް19 އަށް 13 މީހަކު ޕޮޒިޓިވްވިއެވެ. އޭގެތެރެއިން ތިން މީހަކު މިހާރު ވަނީ ރަނގަޅު ވެފައެވެ. އެއީ ޕެރެޑައިސް އައިލެންޑު ރިސޯޓުން މި ބައްޔަށް ޕޮޒިޓިވްވި މީހުންގެ ތެރެއިން އެކަކަކާއި ސޭންޑީޒް ބަތަލާއިން ޕޮޒިޓިވްވި ދެމަފިރިންނެވެ.
