ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)އަށް ދުނިޔޭގެ އެކި ކަންކޮޅުތަކުން މިހާތަނަށް ޕޮޒިޓިވްވި މީހުންގެ ޖުމުލަ އަދަދު، 3 ލައްކައަށްވުރެ މައްޗަށް އަރައިފިއެވެ.
މިއަދު ހެނދުނު 07:20ގެ ނިޔަލަށް ލިބިފައިވާ އެންމެ ފަހުގެ ތަފާސް ހިސާބުތަކަށް ބަލާއިރު ޖަޕާނުގައި ބަނދަރުކޮށްފައިވާ 'ޑައިމަންޑް ޕްރިންސަސް' ކްރޫޒްލައިނާވެސް ހިމެނޭ ގޮތަށް 188 ގައުމަކާ ސަރަހައްދަކުން، ޖުމުލަ 307627 މީހަކު ވަނީ މިހާތަނަށް މި ވައިރަހަށް ޕޮޒިޓިވްވެފައެވެ.
ކޮވިޑް-19ގެ ޝިކާރައަކަށްވެ މަރުވި މީހުންގެ އަދަދު 13050އަށް އަރާފައިވާއިރު ބަލި ޖެހުނު މީހުންގެ ތެރެއިން 88 ޕަސެންޓް މީހުން، ނުވަތަ 95797 މީހަކު ވަނީ ފަރުވާ ހޯދައިގެން ރަނގަޅުވެފައެވެ.
ކޮވިޑް-19ގެ ނުރައްކާ މިހާރު އެންމެ ބޮޑުވެފައިވަނީ އިޓަލީވިލާތުގައެވެ. އެގައުމުން 53578 މީހަކު މި ވައިރަހަށް ޕޮޒިޓިވްވިއިރު 4825 މީހެއްގެ ފުރާނަ ވަނީ ގެއްލިފައެވެ. ކޮވިޑް-19ގައި އެންމެ ގިނަ ބަޔަކު މަރުވެފައިވަނީވެސް އިޓަލީވިލާތުންނެވެ. ބަލީގެ ފުރަތަމަ ކޭސްތައް ފެންމަތިވި ޗައިނާއިންވެސް މަރުވެފައިވަނީ 3261 މީހުންނެވެ.
ފާއިތުވީ 24 ގަޑިއެއްހާރިއަށް ބަލާއިރު އިޓަލީވިލާތުން 793 މަރު ރިޕޯޓްކުރިއިރު، ޗައިނާއިން ރިޕޯޓްކޮށްފައިވަނީ 6 މަރެކެވެ. މީގެ އިތުރުން ޗައިނާއިންވަނީ އެ ގައުމުގެ އާބާދީގެ ތެރޭގައި ކޮވިޑް-19 ފެތުރެމުން ނުދާތާ 3 ދުވަސްވެފައިވާކަމަށާ، މިހާރު ފެންނަމުންދާ އާ ކޭސްތަކަކީ އެގައުމަށް އިމްޕޯޓް ނުވަތަ ބޭރުން އައި ފަރާތުގެ ކިބައިން ފެނުނު ކޭސްތަކެއްކަން ހާމަކޮށްފައެވެ.
އިޓަލީވިލާތަށް ފަހު ކޮވިޑް-19ގެ ނުރައްކާ އެންމެ ބޮޑުވެފައިވަނީ އެމެރިކާގައެވެ. 26686 މީހަކު އެމެރިކާއިން މި ވައިރަހަށް ޕޮޒިޓިވްވެފައިވާއިރު އެގައުމުން މަރުވި މީހުންގެ އަދަދު 340އަށް އަރައެވެ.
މެދުއިރުމަތީގެ މަސްރަހަށް ބަލާއިރު ކޮވިޑް-19ގެ ނުރައްކާ އެންމެ ބޮޑު އީރާނުގައެވެ. އެގައުމުން މިހާތަނަށް 20610 މީހަކު މި ވައިރަހަށް ޕޮޒިޓިވްވިއިރު، މަރުވި މީހުންގެ އަދަދު 1556އަށް އަރައެވެ. ފާއިތުވީ 24 ގަޑިއިރެއްހާއިރު ތެރޭގައި އެކަނިވެސް، 123 މަރެއް، އީރާނުން ވަނީ ރިޕޯޓްކޮށްފައެވެ.
ގިނަ އަދަދަކަށް ދިވެހިން ދިރިއުޅެމުންދާ މެލޭޝިއާއަށް ބަލާއިރު ޖުމުލަ 1183 ކޭސް ވަނީ ރިޕޯޓްކޮށްފައެވެ. ފާއިތުވީ 24 ގަޑިއިރެއްހާއިރު ތެރޭގައި 153 ކޭހެއް ރިޕޯޓްކޮށްފައިވެއެވެ. ކޮވިޑް-19ގެ ޝިކާރައަކަށްވެ، މެލޭޝިއާއިން މަރުވި މީހުންގެ އަދަދު މިހާރު ވަނީ 8 އަށް އަރާފައެވެ.
ރާއްޖެ ހިމެނޭ ސާކް ސަރަހައްދަށް ބަލާއިރު ކޮވިޑް-19ގެ ނުރައްކާ އެންމެ ބޮޑު ޕާކިސްތާނުގައެވެ. އެގައުމުން 645 މީހަކު މި ވައިރަހަށް ޕޮޒިޓިވްވެފައިވާއިރު ފާއިތުވީ 24 ގަޑިއިރެއްހާއިރު ތެރޭގައި 144 ކޭހެއް ވަނީ ލޮގްކޮށްފައެވެ. މި ބަލީގައި 3 މީހަކު މަރުވި ކަމަށް ޕާކިސްތާނުންވަނީ ރިޕޯޓްކޮށްފައެވެ.
އިންޑިއާއިން ކޮވިޑް-19އަށް ޕޮޒިޓިވްވި މީހުންގެ އަދަދު 332 އަށް އަރާފައިވާއިރު 5 މީހެއްގެ ފުރާނަވަނީ ގެއްލިފައެވެ. ސްރީލަންކާއިން 77 ކޭހެއް ރިޕޯޓްކޮށްފައިވާއިރު، އެއްވެސް މީހަކު މަރުވިކަމަށް އެ ގައުމުން އަދި ރިޕޯޓްކޮށްފައެއް ނުވެއެވެ.
ފަތުރުވެރިކަމަށް އިންތިހާއަށް ބަރޯސާވެފައިވާ ދިވެހިރާއްޖެއިން ކޮވިޑް-19ގެ ކޭހެއް ފެނިގެން އެންމެ ފުރަތަމަ އިއުލާންކުރީ މިމަހުގެ 7 ވަނަ ދުވަހުއެވެ. އޭގެ ފަހުން 13 ކޭސް އެއް ޕޮޒިޓިވްވެފައިވާއިރު، މީގެ ތެރެއިން 3 މީހަކު ވަނީ ފަރުވާ ހޯދައިގެން ރަނގަޅުވެފައެވެ.
