އަދި މިހާތަނަށް ފަރުވާއެއް ނުވަތަ ވެކްސިންއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) ހަލުވިކަމާއެކު ފެތުރެމުންދާ އެމެރިކާގައި 24 ގަޑިއިރު ތެރޭގައި 4581 މީހަކު މި ވައިރަހަށް ޕޮޒިޓިވްވެފައިވާކަމަށް ސީއެންއެންގެ ރެކޯޑްތަކުން ދައްކާ ކަމަށް އެ ނޫހުން ބުނެފިއެވެ.
ސީއެންއެންއިން އާންމުކޮށްފައިވާ ރެކޯޑްތަކަށް ބަލާއިރު އެމެރިކާއިން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދަކީ މިހާރު 8898އެވެ. އަދި މަރުވި މީހުންގެ ޖުމުލަ އަދަދަކީ 149އެވެ. އެއީ 24 ގަޑިއިރު ތެރޭގައި ޕޮޒިޓިވްވި 4581 މީހުންނާ މި ވަގުތުގެ ތެރޭގައި މަރުވި 47 މީހުންނެވެ.
ސީއެންއެންއިން ބުނާ ގޮތުގައި މި ތަފާސް ހިސާބުތައް އެއްކޮށްފައިވަނީ އެމެރިކާގެ 50 ސްޓޭޓްއާއި ޑިސްޓްރިކްޓް އޮފް ކޮލަމްބިއާއާއި އެމެރިކާގެ މިލްކިއްޔާތުގައިވާ އެހެން ސަރަހައްދުތަކުގައި ގާއިމުކޮށްފައިވާ އާންމު ސިއްހަތުގެ ނިޒާމުގެ ތެރެއިން ޑިޓެކްޓްކޮށް ޓެސްޓުކުރި ކޭސްތަކަށް ބަލައިގެންނެވެ.
ކޮވިޑް-19އަށް ހާއްސަކޮށްފައިވާ ވައިޓް ހައުސްގެ ޓާސްކްފޯސްއާއި އާންމު ސިއްހަތާ ބެހޭ އޮފިޝަލުންވަނީ، ޓެސްޓުތައް ފުރިހަމަވަމުންދާ ވަރަކަށް ކޮވިޑް-19އަށް ޕޮޒިޓިވްވާ ކޭސްތައް ފެންނަ މިންވަރު އިތުރުވަމުން ދާނެކަމުގެ އިންޒާރު ދެއްވާފައެވެ.
