ރާއްޖޭގެ އަންހެނުންގެ ތެރެއިން 13 ޕަސެންޓަކީ ޒުވާން އުމުރުގައި ހިތާނު ކޮށްފައިވާ މީހުން ކަމަށް ޔުނިސެފުން ކުރި ދިރާސާއަކުން ދައްކައިފިއެވެ.

އެ ޖަމިއްޔާ އިން މިއަދު އާއްމުކުރި ދިރާސާ ރިޕޯޓެއްގައި ބުނެފައިވާ ގޮތުގައި ރާއްޖޭގެ، އުމުރުން 15 އަހަރާއި 49 އަހަރާ ދެމެދުގެ އަންހެނުންގެ ތެރެއިން 13 ޕަސެންޓް މީހުން ވަނީ ހިތާނުކޮށްފައެވެ.

އެގޮތުން އުމުރުން 45 އަހަރާއި 49 އަހަރާ ދެމެދުގެ 38 ޕަސެންޓް އަންހެނުން ހިތާނު ކޮށްފައި ވާއިރު، އުމުރުން ހަގުވާ ވަރަކަށް އެ ނިސްބަތް ވަނީ ދަށްވެފައެވެ. އެއީ މިހާރު އެފަދަ ކަންކަން ގަބޫލުކުރާ މީހުންނާއި އެފަދަ ކަންތަށް ކުރާ މީހުން މަދުކަމުގެ ހެއްކެކެވެ.

މީގެ އިތުރުން އެ ރިޕޯޓުގައިވާ ގޮތުން، 15 އަހަރާއި 19 އަހަރާ ދެމެދުގެ އަންހެން ކުދިން ހިތާނު ކޮށްފައި ވަނީ އެންމެ ޕަސެންޓެކެވެ. މިއީ ކުރިން ރާއްޖޭގައި އާންމު އަދި މިހާރު އުވެމުންދާ ސަގާފަތެއްކަން އެނގެއެވެ.

ދާދިފަހުން އަންހެނުން ހިތާނުކުރުމާ ގުޅޭގޮތުން އެޗްޕީއޭއިން އިސްލާމިކް މިނިސްޓްރީގެ ލަފަޔަކަށް އެދުނު މައްސަލައެއްވެސް ވަނީ ފެންމަތިވެއެެވެ. ނަމަވެސް ފަހުން ހެލްތު މިނިސްޓްރީން ވަނީ އެއީ ސަރުކާރުގެ ސިޔާސަތެއް ނޫން ކަމަށް ބުނެ އިސްލާމިކް މިނިސްޓްރީއަށް ފޮނުވި ސިޓީ ބާތިލްކޮށްފައެެވެ.

އަންހެނުން ހިތާނުކުރުމުގައި އިސްލާމީ އެއްވެސް އަސާސެއް ނެތްކަމަށް ކުރީގެ ރައީސް މައުމޫން އަބްދުލް ގައްޔޫމްވެސް ވަނީ ދާދި ފަހުން ވިދާޅުވެފައެވެ.

ހަބަރު ސިއްހަތު