ކުޑަކުދިންނަށް ޖިންސީ އަނިޔާ ލިބިދާނެ ކަމަށް ބެލެވޭ ތަންތަން ފާހަގަކޮށް، ސަރުކާރުން އެތަންތާނގައި ފާހަގަ ޖަހައި ބަލަހައްޓާނެ ކަަމަށާއި އެކަން ކޮށްނުދީ ރައީސް އިބްރާހިމް މުހައްމަދު ސޯލިހާއި މަޖިލިސްވެސް ނިދަން ނުދާނެ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ކ. ގުރައިދޫއަށް ވަޑައިގެން އެރަށުގައި ހަދާފައިވާ އެމްޑީޕީގެ ހަރުގެ ހުޅުވި ރަސްމިއްޔާތުގައި ރައީސް ނަޝީދު ވިދާޅުވީ ރާއްޖޭގެ ރައްޔިތުންނާއި ހުރިހާ ދަރީންނަށް ޔަގީންކޮށްދޭ އެއް ކަމަކީ ޖިންސީ ގޯނާގެ ޝިކާރައަށް ހުށަހެޅިދާނެ ކަމަށް ބެލެވޭ، ނުވަތަ ޝިކާރައަކަށް ވެދާނެ ކުއްޖާ ހުންނާނެ ތަން ބެލޭނެ ގޮތް ހޯދިފައިވާ ކަމުގެ ޔަގީންކަން ކަމަށެވެ.
ނަޝީދު ވިދާޅުވީ ރާއްޖެ ބަދަލުކުރަން ބޭނުންވަނީ ނަމަ، އެންމެ ފުރަތަމަ ވާން ޖެހެނީ އިންސާނުންނަށް ކަމަށެވެ. އަދި މާތް ރަސްކަލާންގެ އަންގަވާފައިވާ ގޮތްތަކުގެ މަތިންނާއި އިންސާނީ އާންމު އުސޫލުތަކުގައި ދިރިއުޅޭ ބަޔަކަށް ދިވެހިން ވާންޖެހޭ ކަމަށެވެ. އަދި ކުޑަކުދިންގެ ހައްގުތައް ރައްކާތެރިކުރުމަށް މުއައްސަސާތަކުންވެސް ތާ އަބަދުމެ ފާރަލައިލައި ތިބެން ޖެހޭ ކަމަށް ވިދާޅުވިއެވެ.
އެމަނިކުފާނު ވިދާޅުވީ ފުރަތަމަ ކަށަވަރު ކޮށްދޭންވީ ކުޑަކުދިންގެ ހައްގުތައް ކަމަށާއި އެންމެ ވޯޓެއް ނުލިބުނު ކަމުގައިވިޔަސް، އެއީ ކުރަންޖެހޭ ކަމެއް ކަމަށެވެ. އަދި އެއީ އެމްޑީޕީގެ ހަގީގީ މަގުސަދަށް ވާންޖެހޭ ކަމަށްވެސް އެނަމިނުފާނު ވިދާޅުވިއެވެ.
ނަޝީދު ވިދާޅުވީ ކުޑަކުދިންނަށް ޖިންސީ ގޯނާކުރާ މައްސަލަތަކުގައި އާއިލާއާއި އަދި ގާތްތިމާގެ މީހުން ހަނު ނުތިބުމަށެވެ. އަދި ކުދިންނަށް ސަލާމަތްތެރިކަމާ އެކުގައި ނޫޅެވޭނެ މާހައުލެއް އޮތުމަކީ އެމްޑީޕީން ސަރުކާރުން ގަބޫލުކުރާނެ ގޮތެއް ނޫންކަމަށެވެ.
ޒަމާންތަކެއް ވަންދެން މިމައްސަލައާ މެދު "ވަރިހަމަ" ވެފައި ތިބެވިއްޖެ ކަމަށާއި ދެން އެހެން ކަން ވިޔަ ނުދެއްވާނެ ކަމަށްވެސް ނަޝީދު ވިދާޅުވިއެވެ. އަދި ކުޑަކުދިންގެ ހައްގުތައް ރައްކާތެރިކޮށް ނުދެވެނީނަމަ، ސިޔާސީ މަސައްކަތުގައި އުޅުމުގެ ބޭނުމެއް ނެތް ކަމަށްވެސް ނަޝީދު ވިދާޅުވިއެވެ.
