އެމްޑީޕީގެ މެންބަރުންނަށް ހައްގުވާ މިންވަރު ނުލިބިގެން އުޅެނީ އެހެން ދިމާތަކަށް ބައި އަޅަން ޖެހޭތީ ކަމަށް ރައްޔިތުންގެ މަޖިލީހުގެ އަދި އެމްޑީޕީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ކައުންސިލް އިންތިހާބާ ދިމާކޮށް އެމްޑީޕީން ތިލަދުން މައްޗަށް ކުރާ ދަތުރުގެ ތެރެއިން ހއ. އިހަވަންދޫއަށާއި ހއ. ހޯރަފުއްޓަށް ވަޑައިގެން، ރައީސް ނަޝީދު ވިދާޅުވީ، އެމްޑީޕީ ވެރިކަމުގައި އޮވެ ރައްޔިތުންނަށް ހިތްހަމަ ނުޖެހުން ނުލިބިގެން އުޅެނީ އެމަނިކުފާނުގެ ނަޒަރުގައި ކޯލިޝަންއާ ހެދި ކަމަށެވެ.
މިފަދައިން ވިދާޅުވެ، ނަޝީދު ވަނީ އެމްޑީޕީން ބައި އަޅަމުން ދަނީ، އެ ބައި ހައްގު ބަޔަކަށްތޯ ސުވާލު އުފައްދަވާފައެވެ.
މި ސަރުކާރު އުފެދުނީ ކޯލިޝަނެއްގެ ތެރެއިންކަން ފާހަގަ ކުރައްވާ ނަޝީދު ވިދާޅުވީ، މަޖިލީހުގެ އިންތިހާބުގެ ނަތީޖާއިން ފެނިގެން ދިޔައީ ރައްޔިތުން އެމްޑީޕީ ހޮވަން ބޭނުންވިވަރު ބޭނުންވި ކަމަށެވެ. އަދި މަޖިލީހުގެ މެޖޯރިޓީ އޮތީ އެމްޑީޕީގައި ކަން ފާހަގަ ކުރައްވާ ނަޝީދު ވަނީ، މި ސަރުކާރު ރައްޔިތުންނަށް ޖަވާބުދާރީ ވެފައިވާ ކަމަށް ވިދާޅުވެފައެވެ.
ނަޝީދު ވިދާޅުވީ، މަޖިލީހަށް ހާޒިރު ކުރެވުނު ވަޒީރުންގެ އަދަދަކީ އެއީ ސަރުކާރު ޖަވާބު ދާރީ ވެފައިވާ މިންވަރު ހާމަ ވެގެންދާ ކަމެއް ކަމެވެ. އަދި މަޖިލީހުގެ ސުޕަ މެޖޯރިޓީ އޮވެމެ، އެމްޑީޕީ މެންބަރުން، އެމްޑީޕީގެ ވަޒީރުން ހާޒިރުކޮށް ސުވާލު ކޮށްފައިވާކަން ނަޝީދު ފާހަގަ ކުރެއްވިއެވެ.
