މިދިޔަ އާދިއްތަ ދުވަހު ވެލާނާ އިންޓަނޭޝަނަލް އެއާޕޯޓުގެ އެއާކްރާފްޓް މޫވްމަންޓް އަނެއްކާ ވެސް ރެކޯޑް އަދަދަކަށް އިތުރުވެފައިވާ ކަމަށް މޯލްޑިވްސް އެއާޕޯޓް ކޮމްޕެނީ (އެމްއޭސީއެލް) އިން ބުނެފިއެވެ.
މިއީ މިމަހުގެ އެއްވަނަ ދުވަހު އެއާޕޯޓްގައި ފްލައިޓް މޫވްމެންޓް ރެެކޯޑަށްވުރެ އިތުރު އަދަދެކެވެ. އެ ދުވަހު 226 ފްލައިޓް މޫވްމެންޓް ރެކޯޑު ކުރެވިފައިވެއެވެ.
ވީއައިއޭ ހިންގާ، އެމްއޭސީއެލުން ބުނީ މިދިޔަ އާދިއްތަ ދުވަހު ފްލައިޓް މޫވްމެންޓް 239 އަށް އަރާފައިވާ ކަމަށެވެ. އެގޮތުން އެދުވަހު 101 އިންޓަނޭޝަނަލް ފްލައިޓް މައި އެއާޕޯޓު ބޭނުން ކޮށްފައިވާއިރު އެ ދުވަހު ބޭނުންކުރި ޑޮމެސްޓިކް ފްލައިޓުގެ އަދަދު 121 އަށް އަރާ ކަމަށެވެ.
މީގެ އިތުރުން ޝެޑިއުލް ނޫން 17 ފްލައިޓެއް އެއާޕޯޓް ބޭނުން ކޮށްފައިވާ ކަމަށެވެ.
އެންމެ ފަހުން އެއް ދުވަހެއްގެ މައްޗަށް އެއާޕޯޓު އެންމެ ގިނައިން ބޭނުން ކޮށްފައި ވަނީ މިމަހުގެ އެއްވަނަ ދުވަހުއެވެ. އެ ދުވަހު 226 ފްލައިޓް މޫވްމެންޓް ރެކޯޑު ކުރެވިފައިވެއެވެ.
ރަންވޭ އަށް މަތިންދާބޯޓެއް ޖެއްސުމާއި ފުރުމަކީ ވެސް އެއާކްރާފްޓް މޫމްމަންޓެކެވެ
މިދުވަސް ވަރަކީ އާންމު ގޮތެއްގައި އެއާޕޯޓަށް ބާރުބޮޑު ދުވަސްވަރެކެވެ. ބޮޑު ޗުއްޓީ ދުވަސްވަރު ރާއްޖޭގެ އެތެރޭގެ އުދުހުންތައް އިތުރުވެއެވެ. އަދި ކްރިސްމަސް އާއި އާ އަހަރާ ދިމާކޮށް ބައިނަލްއަގުވާމީ ދަތުރުތައްވެސް އިތުރުވެއެވެ.
