އިތިއޮޕިއާގެ އަމްހާރާ ސަރަހައްދުގެ 4 މިސްކިތެއް ރޯކޮށް އަންދާލި މައްސަލައާއި ގުޅިގެން، ތުހުމަތުގައި 5 މީހަކު ހައްޔަރުކޮށްފައިވާކަމަށް އެ ސަރަހައްދުގެ ތަރުޖަމާނު ގެޓްނެޓް ޔިރްސޯ ވިދާޅުވެއްޖެއެވެ.
ފޭސްބުކް މެދުވެރިކޮށް އާންމުކުރި ޕޯސްޓެއްގައި ޔިރްސޯ ވިދާޅުވީ، މިސްކިތްތަކުގައި ހުޅުޖެހުމުގެ އަމަލު ރޭވުމުގައި އިސްކޮށް ހަރަކާތްތެރިވި މީހުންނާ އެކަން ކުރި މީހުންކަމަށް ތުހުމަތު ކުރެވޭ މީހުން މިހާރު ތިބީ ކަމާބެހޭ ފަރާތްތަކުގެ ބެލުމުގެ ދަށުގައި ކަމަށެވެ.
އިތިއޮޕިއާގެ މިސްކިތްތަކުގައި ހުޅުޖެހި މައްސަލައާއި ގުޅިގެން އެގައުމުގެ ބޮޑު ވަޒީރު އަބީ އަހުމަދު ސޯޝަލް މީޑިއާއަށް ދޫކޮށްލެވި ބަޔާންތަކެއްގައި ވިދާޅުވީ، އެކި ދީންތަކުގެ މީހުން ގުޅިގެން އެކުގައި އުޅުމުގެ މުއްސަނދި ތާރީހެއް އޮތް އިތިއޮޕިއާއިން އެކަން ނައްތާލުމަށް ހައްދުފަހަނައަޅާފައިވާ މީހުން ކުރަމުންދާ މަސައްކަތްތަކަށް، ކާމިޔާބީއާއި ތަރައްގީގެ ތަސައްވުރެއްގައި އަމާޒު ހިފާފައި އޮތް އިތިއޮޕިއާއިން މިހާރު ދެވޭނެ ފުރުސަތެއް ނޯންނާނެ ކަމަށެވެ. އަބީ އަހުމަދަކީ މިއަހަރުގެ ނޮބެލް ސުލްހައިގެ އިނާމު ހާސިލުކުރެއްވި ޝަހްސެވެ.
މިސްކިތްތަކަށް ދިން ހަމަލާ ކުށްވެރި ކުރައްވާކަމަށާ، އެއްބަޔަކު އަނެއް ބަޔަކަށް އިހުތިރާމްކޮށްގެން ދިރިއުޅުމަށް ގޮވާލައްވާކަމަށްވެސް ބޮޑުވަޒީރު ވަނީ ވިދާޅުވެފައެވެ.
ނަސްލީ ބޮޑެތި ހަމަނުޖެހުންތަކެއްގެ ތާރީހު އޮތް އިތިއޮޕިއާގައި މިހާރު ހިންގަމުންދާ ހަމަނުޖެހުންތަކަކީ ދީނީ ފިކުރު ތަފާތުވުމުގެ ސަބަބުން އުފެދިގެން އުޅޭ ހަމަނުޖެހުންތަކެކެވެ.
