ހދ. ވައިކަރަދޫގައި އިއްޔެ ދެ ސައިކަލު ޖެހި ހިނގި އެކްސިޑެންޓްގައި ހާލު ސީރިއަސްވި މީހާ އަދިވެސް ހޭ ނާރާތީ އިތުރު ފަރުވާއަށް މިއަދު މާލެ ގެނައުމަށް ހަމަޖެހިފައި ވާ ކަމަށް ކުޅުދުއްފުށީ ހޮސްޕިޓަލުން ބުނެފިއެވެ.
"ދަ ޕްރެސް" އަށް މައުލޫމާތު ދެމުން އެ ހޮސްޕިޓަލުން ބުނީ އެ މީހާ އަދިވެސް އޮތީ ވެންޓިލޭޓަރުގައި ކަމަށެވެ. އަދި އިއްޔެ ހިނގި އެ އެކްސިޑެންޓްގައި ހާލު ސީރިއަސްވި މީހާގެ ބޯ ފަޅައިގެން ގޮސް ސިކުނޑިއަށް ލޭ އެޅިފައި ވާކަމަށް ޑޮކްޓަރުން މައުލޫމާތު ދޭ ކަމުގައި އެ ހޮސްޕިޓަލުން މައުލޫމާތު ދެއެވެ.
މީގެ އިތުރުން އެ އޮސްޕިޓަލުން ބުނީ، އެ މީހާ މާލެ ގެންނަން ހަމަޖެހިފައި ވަނީ އެމަޖެންސީގައި ޗާޓަރު ފްލައިޓެއްގައި ކަމަށާ ކުޅުދުއްފުށިން މާލެ އަންނަން ފުރާނީ މެންދުރުފަހު 3:30 ގައި ކަމަށެވެ.
އިއްޔެ ހިނގި އެ އެކްސިޑެންޓްގައި ދެ މީހަކަށް އަނިޔާވި އިރު، ދެން އަނިޔާވި މީހާގެ ހާލު އެހާ ސީރިއަސްއެއް ނޫނެވެ. އޭނާއަށް ވައިކަރަދޫ ސިއްހީ މަރުކަޒުގައި ވަނީ ފަރުވާ ދީފައެވެ.
މި އެކްސިޑެންޓް ގައި އަނިޔާވީ 48 އަހަރުގެ ދިވެހި ފިރިހެނަކަށާއި 20 އަހަރުގެ ދިވެހި ފިރިހެނަކަށެވެ.
މި މައްސަލަ ފުލުހުން އިތުރަށް ތަހުގީގު ކުރަމުން ދާއިރު، ވައިކަރަދޫއަކީ ފުލުހުން ތިބޭ ރަށެއް ނޫނެވެ. ނަމަވެސް، އެކްސިޑެންޓް ހިނގަން މެދުވެރިވި ސަބަބު އޮޅުން ފިލުވުމަށްޓަކައި ފުލުހުން ދަނީ މައްސަލަ ތަހުގީގު ކުރަމުންނެވެ.
